La cantante bretona Lleuwen Steffan -orixinaria de Gales- ganó la final del Liet International 2012 col tema tituláu «Ar gouloù bev» («La lluz viva»), nuna gala qu'axuntó a numberosu públicu nel Teatru de Llaboral Ciudá de la Cultura, en Xixón. Amás, Asturiana Mining Company fíxose col Premiu del Públicu nun actu marcáu pola reivindicación de la oficialidá. Asina, los glayíos a coru de «L'asturianu llingua oficial» y unes lletrones que formaben la frase n'inglés «S.O.S. Asturian Language» tuvieron presentes nel eventu al qu'acudió la conseyera d'Educación, Cultura y Deporte, Ana González, y de la directora xeneral de Política Llingüística, Ana Fueyo.
La gran trunfadora de la nueche, Lleuwen, llevó pela primer vez el premiu del xuráu del Liet pa Bretaña. Trátase d'una cantante nacida y criada nel norte de Gales, pero que vive normalmente en Bretaña, onde aprendió a falar y cantar en bretón. Por eso, tien una perbona reputación tanto en Bretaña como en Gales y viaxa davezu ente les dos naciones celtes. Musicalmente, ye complicao etiquetar a Lleuwen y, anque tienen dicho d'ella que tien aires de jazz, a esta cantautora tamién-y presta'l rhythm and blues y el rock.
Per otru llau, l'Asturiana Mining Company fixo que'l premiu del públicu quedara en casa, convirtiéndose nel primer grupu en llingua asturiana que lleva dalgún de los premios d'esti prestixosu festival européu. Parez que «Si nun conoces Val.louta» prestó al públicu que votó per Internet a lo llargo de toa Europa y a la xente qu'enlleno les butaques del Teatru de la Llaboral -onde destacaben, amás de les d'Asturies, les banderes corses-. Y ye que'l grupu lideráu por Michael Lee Wolfe realizó una de les sos actuaciones en directo más potentes, onde resaltó la fuercia de la voz de Berto Varillas.
El resultáu del premiu del xuráu ye'l siguiente: Lleuwen (Bretaña), 87 puntos; Dopu Cena (Córcega) 86 puntos; The Voodoolectric (Frisia Oriental), 76 puntos; Asturiana Mining Company (Asturies), 66 puntos; Brian O hEadhra (Escocia), 64 puntos; Claudia Crabuzza and Claudia Gabriel Sanna (L'Alguer), 64 puntos; Yldau (Frisia), 52 puntos; Enkore (País Vascu), 41 puntos; Ivan B & 4CP (Udmurtia), 35 puntos; Inger Karoline Gaup (sami), 35 puntos; y Jonokognos (Friul), 32 puntos.
Amás, el grupu asturianu Dixebra dio un conciertu nel tiempu que duraron les votaciones del públicu y les deliberaciones del xuráu, conciertu qu'amás fixo llevantase y blincar a tol Teatru de Llaboral. Les consignes del líder de la banda, Xune Elipe, reivindicando los derechos llingüísticos de los asturianos valieron pa que la mayor parte del patiu de butaques glayara al empar «L'asturianu llingua oficial» o «Independencia, Puxa Asturies Dixebrá» nun eventu que se taba retresmitiéndose en directo per televisión y per Internet, con presencia de medios como Al-Jazeera o la televisión pública vasca, qu'amás va emitir el festival el sábadu próximu en diferíu.
Sicasí, Dixebra nun foron los únicos que reivindicaron un meyor marcu llegal pal nuestru idioma: el cantante del grupu vascu Enkore, Xabi Hoo, acabó la so actuación con un «munches gracies» y lleendo les lletres que formaben «S.O.S. Asturian Language» y que portaron dellos activistes llingüísticos dende les butaques del teatru.
L'añu que vien, el Liet International va celebrase en Córcega, anque van tener bien difícil llegar al nivel de la gala entamada pol Gobiernu d'Asturies, onde músicos, organización, públicu y el mesmu equipu que retresmitió la gala per TPA conxugáronse a la perfeición pa facer la que posiblemente foi, dexando a un llau lo musical, la meyor edición del festival de la canción nes llingües minoritaries europees.
Fonte: Les Noticies
Los meyores Dixebra ensín dulda. Los dos premios tan bien daos. Non ye lóxicu un grupu asturianu y falante con nome n'inglés? ye bien raru, non?
ResponderEliminarL'actu foi un arguyu p'Asturies y en concretu pa Xixón, perfecta organización y sincronización d'espaciu y tiempu difícil de superar con unos llocutores bien entrenaos y dando una llección de bon faer y bon dicir, discretos y bien efectivos: sobresalientes.
ResponderEliminarResultó un eventu realmente entrañable y axilosu, un exemplu de daqué perfectamente lleváu a cabo.
Norabona a tola la organización ya intervinientes y tamién a un públicu maraviyosu y exemplar.
Pa ripitir.
Pos sí que foi una pasada en tolos sentíos, yo tuvi ellí colels míos amigues y esfrutamos cantidá, a esgaya.
ResponderEliminarPal mio gustu, y el de muchos, el grupu asturianu Asturiana Mining Company taría meyor nomándose o adoptando un nome n'asturianu y non n'inglés, ¿non vos paez collacios?
ResponderEliminarDiose una imaxe digna de ser esportada al mundu. El público decidió qu'el so premiu yera pal so equipu anque portara un estrañu nome inglés.
ResponderEliminarQué bona llección de too y pa casi toos que se pasen la vida sentaos mirando y criticando na más pero ensin faer nada positivu pola llingua nin por nada. Un 10.
ResponderEliminar