Soliciten una Llei d'etiquetaxe pa les entidaes comprometíes col idioma asturianu

Iniciativa solicita una Llei d'etiquetaxe pa les empreses comprometíes col idioma

Iniciativa pol Asturianu refuga dafechu los planes de la conseyera d'Educación y Cultura, Ana González, de quitar les llinies de subvenciones en concurrencia competitiva p'asociaciones, empreses y p'actividaes cinematográfiques. Pa la organización, eso va suponer «un ataque al texíu asociativu y empresarial que s'espresa en llingua asturiana». Amás, señalen que ye dalgo que se fixo «dando'l llombu a tol colectivu asturfalante y ensin posibilidá nenguna de negociación». Por eso, afirmen que ye indispensable iguar la problemática del etiquetaxe n'asturianu, al qu'afecten estos recortes, «porque les empreses qu'etiquetaben de forma billingüe dexen de recibir subvenciones pa sufragar el coste qu'ello suponía», y soliciten una Llei d'etiquetaxe que permita facelo namás n'asturianu.


Pa Iniciativa, la convocatoria de subvenciones taba bien lloñe de ser ideal y acepten que yeren necesarios cambios, «pero nun ye d’esta manera como han facese». Asina, señalen qu'hai que tener en cuenta a los afectaos y escuchase toles voces, «non acabar coles ayudes de forma unillateral y ensin alternatives». Por eso, afirmen que'l Gobiernu ta tocando la llinia de flotación de munches empreses del sector cultural n'asturianu, como les editoriales, «que yá taben pasando la so propia crisis y van ver amenorgaes les sos posibilidaes de visibilización de la so producción». Con too, consideren positiva la medría del presupuestu n'otres partíes, «principalmente l'apoyu a la música n'asturianu qu'ensin dulda va apoyar la medría y promoción d'esta estaya de la cultura asturiana».

L'asociación diz que ye necesario una protección llegal, en forma de Llei d'etiquetaxe asemeyada a la que tienen otros territorios, pa que les empreses que lo deseen puedan etiquetar esclusivamente n'asturianu y asina reconocer los derechos llingüísticos de les falantes del nuestru idioma, asina como apoyar l’etiquetaxe billingüe y l’usu del asturianu nel sector priváu con midíes que pueden salir a costu cero y dar frutos na normalización del idioma.

Fonte. Les Noticies