L'asturianu queda fora del alderique de la "Llei Wert"

  El Ministeriu d'Educación, Cultura y Deporte va volver a convocar a la Conferencia Sectorial el 19 d'avientu próximu a pidimientu de los conseyeros de País Vascu, Andalucía y Cataluña, según confirmó a Europa Press la viceconseyera d'Educación vasca, Marian Ozcariz. A xuiciu d'estes tres comunidaes autónomes, frayóse'l reglamentu al presentar cambios nel testu normativu con menos de 24 hores d'antelación. Otra manera, la Comunidá Valenciana (PP) consiguió que la «llingua valenciana» sía tratada n'igualdá de condiciones col castellanu na evaluación de la ESO y Bachiller, mentes que Baleares (PP) pidió que nes comunidaes billingües, los dos idiomes tengan un tratu asemeyao. Asina, y depués de qu'hai un mes la Chunta Aragonesista (CHA) pidiera la comparecencia de Wert nel Congresu pa falar de la realidá trillingüe d'Aragón, l'asturianu ye la única llingua del Estáu que queda fuera del debate sobre la realidá multillingüe del Estáu español y el so reflexu del sistema educativu.

    La conseyera vasca afirmó que'l testu de la LOMCE llegó-yos 3 d'avientu «con cambios bien importantes sobre lo que tábemos negociando'l vienres pela tarde», denunció Ozcariz, que señaló qu'esto supón un «defectu de forma» porque los conseyeros vinieron opinar sobre un borrador que'l departamentu unvió pela primer vez esti llunes pela tarde. «L'usu de la llingua na enseñanza debatímoslo güei pela primer vez», añadió. Nesta llinia, la conseyera andaluza, Mar Mora, añadió que «la llegalidá ye la llegalidá». «Nun podemos dexar que con 24 hores d'antelación escondan cambios grandes pal debate y analís de les comunidaes autónomes y la Conferencia conviértase nun papel moyáu. Anque tuviemos qu'enseñar dientes, finalmente va convocase otra», indicó la dirixente andaluza.

    Sicasí, el ministru d'Educación, Cultura y Deporte, José Ignacio Wert, afirmó depués de la Conferencia Sectorial d'Educación que l'anteproyectu nun modifica'l modelu llingüísticu, nin «minusvalora» la llingua catalana. «Na reforma nun hai nengún elementu que minusvalore la importancia del catalán. Díxose dende'l Gobiernu de Cataluña que lo que se propón va a en contra de la inmersión llingüística. Eso ye radicalmente falsu», afirmó'l ministru, que recordó que lo que plantea'l borrador ye «lo mesmo» que sentenciaron el Tribunal Supremu y el Constitucional. Recordó que dambos tribunales concluyeron que'l catalán «pue ser utilizáu en proporción superior al castellanu, pero qu'ésti nun pue ser amenorgáu a namás una apariencia».

    Per otru llau, el conseyeru d'Educación, Cultura y Universidaes del Gobiernu balear, Rafael Bosch, propunxo que nes comunidaes billingües s'añada una disposición adicional al borrador pa otorgar al catalán un tratamientu análogu al castellanu, «de forma qu'a tolos efectos tenga la mesma considerancia». Bosch dixo que, independientemente de que s'incluya o non, «va tener los mesmos efectos prácticos, porque nel currículum básicu van siguir evaluándose les dos llingües por igual». En rueda de prensa, el conseyeru afirmó que Wert, «nun estableció'l catalán como llingua troncal porque nun ye una competencia del Estáu».

    Otra manera, la conseyera d'Educación, Formación y Empléu de la Generalitat valenciana, María José Català, destacó que'l ministru d'Educación tresmitió-y que la llingua y lliteratura valenciana «va ser incluida na evaluación final d'ESO y Bachilleratu» y va ser evaluada «na mesma proporción que la castellana». Por eso, mostróse «bien satisfecha», porque na xunta escucharon les solicitúes de la Comunitat y, amás, confirmó qu'esta prueba va puntuar «exactamente igual en valencianu qu'en castellanu».

    Amás, depués del plantón de la conseyera catalana d'Enseñanza, Irene Rigau, la presidenta del PP catalán, Alicia Sánchez-Camacho, anunció que va aconceyar la selmana que vien con Wert p'axustar cambios nel borrador de la Llei Orgánica de Meyora de la Calidá Educativa (Lomce). En rueda de prensa, esplicó que depués de falar col ministru y el presidente del Gobiernu, Mariano Rajoy, alcordó esta cita -previsiblemente esti llunes en Madrid- pa falar de la proporción de catalán y castellanu na enseñanza en Cataluña.

    Tamién tuvo presente en tol debate la otra llingua del Estáu -xunto al asturianu- que nun ye oficial. Asina, a primeros de payares, el diputáu de (CHA) nel Congresu, Chesús Yuste, solicitó la comparecencia del ministru d'Educación y Cultura, José Ignacio Wert, pa informar sobre la realidá trillingüe y la protección de les llingües falaes n'Aragón. Yuste recordó que'l Gobiernu d'España «tien una obligación inescusable col aragonés y el catalán, porque robló la Carta Europea de Llingües Minoritaries que tamién compromete a la defensa y protección de la realidá trillingüe aragonesa». Hai qu'alcordase que l'aragonés, depués de l'aprobación de la Llei de Llingües d'Aragón, empezó a entrar nes escueles de forma optativa y dientro del horariu escolar.

    Sicasí, la nuestra llingua, con cuasi trenta años de presencia nel sistema educativu y con más de 200 profesores qu'imparten una materia a la qu'acuden más de 20.000 escolinos, quedó fuera del debate. Asina, les crítiques d'Ana González, conseyera d'Educación, centráronse en que'l testu llegara un día enantes del conceyu. Amás, señaló que nel Ministeriu hai «una desconsideranza bien importante hacia lo que supón la busca de consensu y de diálogu», amás d'un «despreciu» a un númberu de comunidaes autónomes y, por eso, a «un númberu importante de ciudadanos y ciudadanes». Sicasí, nun fixo la conseyera nenguna referencia a los ciudadanos y escolinos que falen y deprenden la llingua propia d'Asturies.

Fonte:  Les Noticies.