Google Maps abre la posibilidá d'iguar la toponimia asturiana

Cola fin d'ameyorar la información, Google Maps activó un serviciu que va permitir informar de cualquier error que s'atope na toponimia d'esti serviciu, lo qu'abre la posibilidá de correxir la toponimia asturiana. La iniciativa surde depués de que Google actualizara los mapes de dellos estaos europeos -Andorra, España, Bulgaria, Estonia, Xibraltar, Hungría, Letonia, Lituania, Eslovaquia y Eslovenia- pa recoyer munchos más datos, a los que s'añaden agora los que vengan de les collaboraciones ciudadanes.

Asina, esperen actualizar los mapes del so serviciu añadiendo too tipu d'información, como puen ser rutes, llinies de tren, llinies en construcción, campus universitarios... Pa indicar un error namás hai que primir l'iconu qu'aparez abaxo a la derecha: «Informar d'un problema». Nesi momentu, Google Maps diz que va facer los cambios afayadizos en cuestión de minutos o hores y que va informar al usuariu que fixera la información al traviés d'un corréu lletrónicu.

Pel momentu, al dir al mapa d'Asturies en Google Maps namás se puen ver dos topónimos xenuinamente asturianos: Lluanco y A Veiga.

Fonte: Les Noticies