31/12/15

Bon añu 2016




Bon Nadal y Bayurosu Añu 2016
Bon Nadal i Feliç 2016
Bom Natal e Feliz 2016
Zorionak eta Urte Berri On 2016
Bon Nadau e Erós 2016
Merry Christmas and Happy 2016
Joyeux Noël et Bon Anné 2016
Fröliche Weihnachten und ein gutes neues Jahr 2016
Feliz Navidad y Próspero 2016


30/12/15

Faciendo País refuga la política llingüística del Executivu nuevu


  Esixe a Javier Fernández que rectifique nel so discursu de fin d'añu "el menospreciu que tuvo pa col idioma" cola felicitación.
  Víctor Suárez, coordinador de Faciendo País, estaya asturianista d'Izquierda Xunida (IX), recuerda al presidente d’Asturies y líder del PSOE que “dende un Gobiernu en precario nun puede siguir dando'l llombu a gran parte de la sociedá asturiano que siente la llingua asturiana como propia y que la fala a diario, como seguramente fadrá Javier Fernández na intimidá, avergoñáu quiciás d’una seña d’identidá tan asturiana como cualquier otru elementu sociocultural del nuestru país y que, amás de tar protexíu pol nuestru marcu xurídicu qu’afala a les instituciones al so usu y difusión, dende’lpuntu de vista estrictamente políticu tamién taba afitáu nel alcuerdu d’investidura al so partíu. Ye dicir, por más que’l nuestru presidente tea empeñáu en viaxar en Madrid a trabayar pa salvar al so partíu y escondese nel procesu catalán como cortina de fumu, nun pue inorar el conflictu llingüísticu llatente n’Asturies y, muncho menos, dende un gobiernu en minoría”.
  Faciendo País refuga tamién la "nula Política Llingüística desendolcada por esti Gobiernu nos sos primeros meses" y afirmó que “vamos tar atentos a cualquier pasu atrás no poco avanzáu hasta agora nesta materia y al incumplimientu de los alcuerdos no que cinca a dignificación y planificación llingüística".                                                    Fonte: asturies.com

Presentóse en L’Entregu “Mina de Palabras”


 Esti martes 29 a les 20 hores, nel Salón d’Actos del Muséu de la Minería d’Asturies (MUMI) en L’Entregu, presentóse’l llibru “Mina de Palabras” de la Asociación d’Escritores d’Asturies
 La presentación tuvo al cargu del profesor del IES de L’Entregu Severino Antuña y va cuntó cola participación tamién del Editor d’Hifer, Angel Luis Fernández y Esther García, presidenta de l’AEA. Nel actu los autores de los textos que recopila la edición dieron llectura a dellos.                                                                                     Fonte: asturnews.com

29/12/15

Taller de Navidá en Xixón: “Texendo Estrelles. Cuentos d’Iviernu”

Na semeya el Muséu Nicanor Piñole, Xixón

 Muséu Nicanor Piñole va ufrir esti martes 29 y miércoles 30 d’avientu, de 11:00 a 13:00 hores, d talleres lliterarios pa neños y neñes.A manera d’epílogu de la esposición “El Muséu consteláu. 20 años de didáctica nos Museos municipales de Belles Artes”, esti taller apigura’l suañu d’un tiempu máxicu como ye la Navidá. Vamos Texer estrelles, vamos cuntar cuentos tirando del filo y vamos tresformar l’espaciu del Muséu nun llugar únicu, faciendo esta esperiencia inolvidable.
 . Taller martes 29 d’avientu de 11 a 13 hores: Taller1: neños y neñes de 4 a 6 año. Taller2: neños y neñesde 7 a 10 años
 . Taller miércoles 30 d’avientu de 11 a 13 hores: Taller3: neños y neñes de 4 a 6 año. Taller4: neños y neñes de 7 a 10 años. Places:20 pa cada taller. Preciu:2 € / taller. Inscripciones dende’l 14 d’avientu nes Oficines d’atención ciudadana, Internet o nos caxeros ciudadanos.                                                                               Fonte: Asturies.com

Iniciativa pol Asturianu afala a Javier Fernández a usar l’idioma nel so mensaxe de fin d’añu


Recuerda que’l presidente Miguel Ángel Revilla felicitó les fiestes a los cántabros cantando un villancicu n’asturianu. La organización llamenta l’ausencia del idioma nel mensaxe de Navidá de Felipe VI.
“Sabemos que'l presidente suel espresase n'asturianu en priváu y nun somos quien a entender qué-y fai avergoñase d'usar l'asturianu, mientres el presidente de la comunidá vecina, Miguel Ángel Revilla, apaeció felicitando les fiestes con un villancicu n'asturianu”, afirmen dende Iniciativa pol Asturianu en referencia a la interpretación de ‘En el portalín de piedra’ nos Torreones de Cartes por parte del líder del Partido Regionalista de Cantabria (PRC). Revilla tien como costume cantar un villancicu pa estes feches, escoyendo nesta ocasión la composición de Víctor Manuel.
“Nel discursu de Navidá tien una oportunidá Fernández pa reconciliase cola so llingua materna, y la llingua del territoriu que gobierna, y usala con normalidá”, añaden dende la organización que trabaya pola normalización del idioma. Ta tovía recién la polémica de la felicitación navidiega del socialista, na qu’emplegó catorce llingües y nenguna foi l’asturiana.
Marxinación de la Casa Real
“La llamentable situación del idioma que se ta viendo nestes feches dende toles instituciones, que nin siquier faen un usu simbólicu del idioma”, abarca tamién Madrid, en concreto a la Casa Real. “El xefe d'estáu, el Rei Felipe VI, nun felicitó les fiestes n'asturianu, como si fizo col restu de les llingües del Estáu nel discursu de Navidá”, dalgo que yá denunciara l’añu pasáu Iniciativa pol Asturianu, recibiendo namái bones pallabres dende Casa Real.
La organización cívica afirma que “recibimos una carta na que s'espresaba l'apreciu del Rei pola llingua asturiana. Sicasí, esti ‘apreciu’ nun s'espeya en nengún usu del idioma pela so parte, nin nes visites a Asturies, nin n'usos simbólicos como la felicitación que fai nel restu de les llingües d'España al final del so discursu”. Sicasí esta marxinación “nun sorprende” cuando nin el presidente del país felicita a los asturianos nel idioma propiu. 
Fonte: Asturies.com

28/12/15

La presentación de 'Bestiariu' dexó pequeñu'l salón del CP Xovellanos de Xixón

"Bestiariu", un CD qu'axunta a 10 bandes cantando n'asturianu pa la Reciella
Presentación de "Bestiariu" nel Colexu Públicu Xovellanos de Xixón

 Ésitu de públicu y crítica nel conciertu qu'abrió'l Festival Escenines pa la Reciella.
 Les diez bandes que conformen esta producción de La Fabriquina xunto con Araz.net –empresa editora d'Asturies.com– quixeron participar nesta estrena anque nun pudieren acudir cola formación completa. Ello permitió a los pequeños asitiaos nes primeres fileres y a los padres, colocaos mayormente na parte d'atrás d'un salón d'actos del Colexu Públicu Xovellanos que quedó pequeñu pa la ocasión, disfrutar de los diez cantares dedicaos a animales de la nuesa fauna y dalgún más. Toos arrancaron los aplausos d'un públicu mui entregáu.
 El miércoles va celebrase la segunda sesión d'Escenenines pa la Reciella, actividá entamada por 'Reciella. Families pol Asturianu', dando pasu al teatru. Asina, El Callejón del Gato va representar a les 19 hores nel CP Xovellanos la versión asturiana de la obra 'Grana de cardamomu', que fala del viaxe fantásticu que fai una neña a la busca de la grana d’una enigmática planta. La entrada a toles actividaes d'esti festival ye de baldre. Fonte: asturies.com

La mitoloxía asturiana aporta estes vacaciones a Candás

La mitoloxía asturiana nel centru Polivalente "La Baragaña" de Candás

   Del llunes 28 d’avientu al 10 de xineru nel Centru Polivalente “La Baragaña” de Candás va poer visitase la esposición “Mitos Asturianos” que s’inaugurara hai dellos meses na seronda mitolóxica de Samartín del Rei Aurelio.
  La que se va ver estos díes en Candás ye una esposición formada polos trabayos del dibuxante Javier Iván Villa Vilches y que va tar acompañada por dellos testos onde s’espliquen les característiques d’estos personaxes. La muestra cuenta amás con un videu esplicativu y dellos xuegos destinaos a toles edaes pa que la xente s’arime a esta temática d’un mou cenciellu y afayadizu. Esta mesma esposición va poder visitase dempués a lo llargo de tol mes de febreru nos conceyos de Carreño y Gozón y va tar empobinada, sobre manera, al alumnáu de los centros educativos. Pa entós yá se va comunicar l’allugamientu de la mesma.
  Dende’l SNL de la Mancomunidá d’El Cabu Peñes agradecen de mano la collaboración del mesmu autor de los dibuxos por facilitalos a la oficina y al SNL de Samartín del Rei Aurelio por apurrir los testos y videu esplicativos que s’amuesen na esposición, toos revisaos pol escritor, etnógrafu y dibuxante, Alberto Álvarez Peña. Fonte: astunews.com

Belén Fernández repite como merecedora de la Bullada de Purpurina

Belén Fernández González repite como merecedora de la Bullada de Purpurina

 La Coordinadora Ecoloxista d’Asturies dio a conocer esti llunes, Día de los Inocentes, la persona o entidá merecedora del so antipremiu la ‘Bullada de Purpurina’. La conseyera Belén Fernández González lleva otra vegada un gallardón que yá ganara nel 2005.
 Ésti “reconoz el llabor y aiciones d’empreses, instituciones y alministraciones que más destacaren nel so llabor contra la conservación de la naturaleza y el mediu ambiente asturianu” y dende hai ventitrés años se falla’l 28 d’avientu. Nesta ocasión taben nominaos xunto cola conseyera d’Infraestructures, Ordenación del Territoriu y Mediu Ambiente, l’Autoridá Portuaria d’Avilés, Arcelor-Mittal, Orovalle –enantes Kinbauri–, HC-EDP Energía y la papelera ENCE.
 Finalmente Belén Fernández González llevó la XXIII Bullada de Purpurina por “una xestión malísima al llombu de les necesidaes d’Asturies y les asturianes, llegando a superarse nesta so cuarta llexislatura”. Asina, en 13 años algamó que’l país continúe como ún de los “más contaminaos d’España; los que menos reciclemos; que sigamos incumplimiento la direutiva d’agües residuales al arramar más de la méta de les agües de la población ensin depurar”, amás de que la socialista “siga apostando por la peligrosa incineradora por más sentencies que pierda”.
 A ello la Coordinadora Ecoloxista d’Asturies suma la so postura de negativa continua con respeuto a los esmolecedores datos de contaminación del aire por partícules, la falta d’información ambiental, la so postura a favor de les empreses contaminantes y la comunicación inesistente y “despreciu” que caltién colos grupos ecoloxistes.
Fonte: asturies.com

27/12/15

Videoxuegos con sellu aragonés

La zaragozana Mechanical Boss preve llanzar el so primera gran proyectu en xunu del 2017
 RUBÉN LÓPEZ.
  Al aragonés Juan Castillo siempres-y gustaron los videoxuegos. El so Super Nintendo echó fueu mientres la so infancia y güei entá recuerda cuál foi'l primer títulu al que xugó: el míticu Mario Bros. Lo que nun sabía entós daquella ye que dalgún día la so pasión diba convertise nel so trabayu. Esti entamador de 24 años fundó n'agostu del 2014 Mechanical Boss, una empresa dedicada a la producción y al desenvolvimientu de videoxuegos. El so primera gran proyectu, nel que lleven trabayando más d'un añu, va estrenar na so versión alfa (en pruebes) en xunu del 2016 y va tar totalmente concluyíu un añu dempués.

  "Llámase DoM (Dungeons of Madness) y ye un xuegu multijugador on line de cuartones competitivos", esplica Castillo, qu'apunta que n'España nun se ta faciendo nada asemeyao y que ta a mediu camín ente los conocíos League of Legends y World of Warcraft.

  El mozu zaragozanu ta convencíu de que va ser un ésitu. Y asina lo creen tamién les 23 persones que s'embarcaron nel proyectu. Nenguna d'elles recibe un salariu porque la firma entá nun tien ingresos, pero confíen en qu'eso va camudar llueu. "De primeres tábamos nueve; yo y otros ocho compañeros del mundu de la programación y el 3-D a los que-yos espunxi el mio plan; nengún díxome que non", comenta Castillo, qu'antes yá trabayara n'otres iniciatives rellacionaes col sector.

La compañía, na que'l mozu entamador invirtió en redol a 60.000 euros, ta allugada nel centru empresarial qu'hai na estación d'autobuses de Delicies, onde se camudaron n'agostu en tando un añu nel edificiu Etopia. "Empezábanos a faltar espaciu y la verdá ye qu'equí tamos bien a gustu y l'arriendu ye bastante económicu", indica.

  Por que Dungeons of Madness convertir nuna realidá nel plazu previstu, va ser necesaria la entrada d'un sociu inversor. Y en eso lleva dellos meses trabayando la empresa, que yá estableció contactos con delles multinacionales del sector (una coreana, otra china y otra americana) p'atopar un partner estratéxicu que distribuya'l videoxuegu.

  Bastante ye que, xuegos d'una calidá similar al so riquen d'un costu de producción de "ente 50 y 100 millones d'euros". "Confiamos en que vamos atopar a esi inversor, pero si nun ye asina vamos siguir alantre pola nuesa cuenta y lo autopublicaremos, anque nos costar muncho más tiempu", sorraya.

Al respective de les cifres d'empléu, esti tipu de xuegos suelen mover a ente 100 y 300 emplegaos a lo llargo de too el desenvolvimientu. "Si tenemos sofitu financieru, solo na nuesa firma esperamos superar les 50 persones", indica Castillo, qu'apunta que xuegos como'l League of Legends xeneren una facturación diaria de 1,8 millones d'euros. La so empresa ye ambiciosa nesti sentíu porque quier asitiar a Dungeons of Madness, que yá foi testeado (con bones crítiques) por xugadores profesionales, dientro del top cinco del mercáu internacional de los videoxuegos competitivos on line.

  Anguaño, la plantiya de Mechanical Boss ta formada por inxenieros informáticos, programadores, espertos en 3-D, músicos o dibuxantes que nun superen los 30 años d'edá.

  Mientres desenvuelven el so proyectu principal, toos ellos tán trabayando nel diseñu de dos xuegos "más senciellos" colos qu'esperen llograr los sos primeros ingresos nun plazu de cinco meses. Amás, tán pindios d'una subvención pública pa realizar otru videoxuegu pa la tienda on line de PlayStation.

  Como munchos espertos d'esti sector, y anque ente otres coses estudió matemática computacional o un máster en 3-D, Castillo tien enforma d'autodidacta. "Inda nun hai una formación concreta y de nivel nesti país", llamenta. Por eso, decidió impulsar un cursu nes sos instalaciones pol que pasaron 15 alumnos nel últimu añu. "Cuanta más xente preparada, meyor pa nós", conclúi.           Fonte: elperiodicodearagon.com

25/12/15

Buonas Fiestas (Boas Festas): Froles mirandesas


- Buonas Fiestas i feliç Anho Nuobo, cun salude, muita spráncia i fé, para todo bós i buossos familiares son ls mius deseios i de la mie família.
Faustino Antão

Nota: L retrato ye dun persépe da l'outorie de Amável Antão, un grande mestre que yá mos aquestou a tan guapas i eicelentes obras, nesta i an muitas criaçones na area de trabalhar la madeira.  
Fonte: Froles mirandesas.blogspot.com.es
Fonte

24/12/15

L'Arena espera la llegada de L'Anguleru

Llegada de L'Anguleru, semeya propiedá de l'Asociación Cultural Garabuxada.

El so barcu yá aportó a Asturies esti xueves y llegará al cai del pueblu a les 19.30 hores.
Los neños y neñes asturianos esperen ansiosos la llegada del pescador procendente del mar de los Sargazos, que tien previsto dedicar la nueche a pescar angula y, coles perres que saque, mercar regalos pa los más pequeños y repartilos esta Nuechebona. Precisamente, esta mañana tuvo nel Acuariu de Xixón recoyendo cartes colos pidimientos de la reciella.
La so llegada a L'Arena ta prevista pa les 19.30 hores. Tres saludar a los neños y neñes de la villa, pondráse manes a la obra pa trayer la felicidá a tolos llares asturianos.
                                                                                      Fonte: asturies.com/A la Gueta los Sueños

23/12/15

L'Arribada adelanta'l fallu de los Timón

Los Timón 2016, con trés candidatos por categoría


   María Esther García López lleva'l premiu destináu a autores n'asturianu y eonaviego, y Ramón d'Andrés, el de Cultura Asturiana.
  Previstu nun primer momentu pal sábadu, l'Asociación Cultural L'Arribada decidió adelantar a esti miércoles el fallu de los Premios Timón 2016. Asina, el X Premiu Timón p’autores en llingua asturiana y eonaviego, destinada a escritores nacíos nel 1966 o enantes, recayó en García López. Mentes, el IV Premiu Timón de Cultura Asturiana foi pal filólogu Ramón d'Andrés.
  Na tercer estaya de los gallardones, el d'autores asturianos en llingua castellana, la ganadora foi Pilar Sánchez Vicente. Esta tarde, a les 20 hores, van lleese los fallos de los Premios Timón dientro de les actividaes de los '10 años de L'Arribada', con una axenda amplia pa güei.                                                                                         Fonte: asturies.com

Designáu’l xuráu de les ayudes a creadores de La Factoría Cultural


 Tán previstes 7 ayudes de 2.000 euros caúna nes siguientes disciplines: arte plástico, arte gráfico, arte escénico y creación dixital y audiovisual.
 La Factoría Cultural va potenciar la cultura y la producción artística al traviés d’una convocatoria d’ayudes a la creación contemporanea pa la realización de proyectos artísticos de cualquier disciplina, de manera individual o grupal. La Comisión d’Evaluación yá foi designada y va axuntase el próximu llunes 28. “Queremos financiar el trabayu de les persones creadores y entamadores que promueven y lleven a cabo creaciones artístiques”, en palabres de la conceyala de Cultura, Yolanda Alonso.
 Coles mires de promover la producción artística de persones y colectivos locales, la Factoría Cultural ufierta les sos instalaciones a los creadores por que lleven a cabu les sos propuestes d’espresión, creación y pensamientu, “lo que va dexar impulsar l’arte y la creatividá n’Avilés y n’Asturies, favoreciendo la industria cultural, la relación ente les distintes cañes de la cultura y el so acercamientu a los públicos”, según esplicó Alonso.
 El plazu de presentación de les solicitúes y la documentación remató’l sábadu 19 d’avientu. Más información na Factoría Cultural (Avenida de Portugal, 13), teléfonu 985 54 86 17.
 Los artistes escoyíos tendrán de desenvolver la so obra nun períodu de seis meses y la resultancia final va poder amosase nos eventos culturales entamaos pol Conceyu d’Avilés nos distintos espacios de la ciudá.
 Van otorgase un máximu de 7 ayudes con una dotación de 2.000 euros caúna d’elles nes siguientes disciplines artístiques:
2 ayudes a la producción y l’estudiu rellacionáu col arte plástico (pintores, escultores y ceramistes).
2 ayudes a la producción y l’estudiu rellacionáu col arte gráfico (grabadores, ilustradores, fotógrafos y diseñadores gráficos).
2 ayudes a la producción y l’estudiu rellacionáu col arte escénico (baillarinos, actores y músicos).
1 ayuda a la producción y l’estudiu rellacionáu cola creación dixital y audiovisual (artistes plásticos, gráficos o escénicos qu’utilicen les nueves tecnoloxíes na producción y estudiu de la so obra).                                                                                      Fonte: asturnews.com

22/12/15

La rede enciéndese por otru despreciu más de Javier Fernández

La felicitación navidiega de Javer Fernández vien en 14 idiomes menos n'asturianu 

  La felicitación navidiega del presidente del Principáu d’Asturies, Javier Fernández, vien en 14 idiomes, pero ninguno ye’l d’Asturies. La xente entrúgase na rede si ésta ye la forma de promocionalu.
  Nun ye la primer vegada nin sedrá la ultima que’l Presidente del Principau desprecia lallingua asturiana de les formes más variaes. Pero otra vuelta ye nun detallucu simbólicu que nun supón dengún pronunciamientu y namai que retrata la calidá humana de la xente: la felicitación navidiega.
  Y los asturfalantes vienen dende esti llunes amosando’l so enfadu pa con un despreciu más ensin xacíu del presidente asturianu pa cola llingua que refrenfa l’Estatutu d’Autonomía como propia, el mesmu Estatutu que lu obliga por llei a promocionala, incumpliendo esa llei xornada tres xornada.
  Pa felicitar l’añu venideru, Javier Fernández unviara la selmana pasada una felicitación en 14 idiomes y dengun d’ellos ye l’asturianu. Poco más se pue dicir.
  Les reacciones entamaran yá esti martes, nun solo nes redes sociales. La Xunta pola Defensa de la Llingua Asturiana (XDLA) emitía esti día un comunicáu nel que decaba a les clares la so crítica a “una postal con una dedicatoria curtia y ensin imaxinación, como correspuende al personaxe, y amás escoyendo un modelu de tarxeta que reproduz les felicitaciones presidenciales hasta en 15 llingües. Nenguna d’elles ye l’asturianu”.
  Asina, la XDLA atalanta que “d’esta manera tan llamentable, podemos ver como Javier Fernández vuelve a aprovechar la más mínima ocasión pa despreciar, inorar y negar visibilidá a la llingua asturiana”.
El comunicáu de l’asociación de defensa del idioma fina con sarcasmu y desilusión: “Namás nos queda esperar al deprimente discursu que da por navidá a ver si saluda en chinu”.                                                                                                    Fonte: asturnews.com

Bestiariu, un CD qu'axunta a 10 bandes cantando n'asturianu pa la reciella

Vuelve Escenines con teatru y música n'asturianu nes vacaciones escolares

 Dixebra, Pauline en la Playa, Los Bonsáis o Felpeyu son delles de les bandes que participen nesti trabayu discográficu qu'aporta mañana a les tiendes nuna producción de La Fabriquina editada por Araz Net

 Un llobu bonu, dos oricios con raigañu en Verdicio, un gochín que come cereales mirando’l mar o una sacavera que xuega a les cosadielles; son dellos de los protagonistes d’esta decena de cantares enxertaos embaxo del títulu de “Bestiariu” y
compuestes a costa fecha polos diferentes artistes.

 La Fabriquina, creaciones culturales, un proyectu nel que s'axunten Alicia Álvarez y David Guardado, atópase tres d’esta producción, editada por Araz Net, que pretende non solo averar l'asturianu al públicu infantil al traviés de la música, sinón tamién, crear materiales nuevos orixinales pa los neños nesta llingua.

 Pa ello cuntaron cola collaboración de diez destacaes bandes asturianes, tanto de la escena independiente como de la del folk y del rock. El proyectu axunta a FMM, Felpeyu, Los Bonsáis, Pauline en la Playa, Nacho Álvarez y el Quarteto Bendición, GuillerMomonje, La Villana, Dixebra, Muga y el corín de la Reciella, y David Varela con Pop Piquiñín (Petit Pop), qu'interpreten cantares, pensaos pa que les esfrute tola familia, colos animales como filu conductor dedicaos a la sacavera, el ratu, el catasol, la vacalloria, el gochu, el burrín, el xilgueru, el ñerbatu, el llobu y l'oriciu.

 El discu, foi ilustráu pol reconocíu diseñador Marco Recuero y grabáu na so mayor parte nos estudios Teisco de Xixónbaxo la batuta del músicu xixonésPedro Vigil (PenelopeTrip, Edwin Moses y Petit Pop) Bestiariu va tar a la venta'l próximu 23 d'avientu y la so presentación enmárcase dientro del ciclu Escenines organizáu por Reciella (families pol asturianu), nel Colexu Públicu Xovellanos, el próximu 27 d'avientu a les 12 hores.                                                                  Fonte. asturies.com

20/12/15

35 años d’un robu llegal a la llingua asturiana



INACIU GALÁN

N’avientu de 1981, pocos meses dempués del intentu de golpe d’estáu del 23-F, producíase nel mesmu escenariu un significativu robu a la integridá del testu del Estatutu d’Autonomía p’Asturies, un robu a les posibilidaes d’espoxigue del asturianu.
El testu aprobáu n’Uviéu llegaba a Madrid con una redacción del artículu cuartu, el dedicáu a la llingua asturiana, que diba desapaecer parcialmente na redaición final. Esti recorte de cinco pallabres, unes mui concretes y bien aclaratories, va suponer una importante torga al desarrollu llexislativu del idioma nos trentaicinco años siguientes.
Aquel artículu cuartu aprobáu n’Asturies pola segunda comisión que preparó l’Estatutu, “la de los venticuatro”, dempués de la enmienda del entós diputáu socialista Xuan Xosé Sánchez Vicente a la primer propuesta de testu de la nomada “comisión de los ocho”. Magar que nun declaraba la oficialidá, dexaba clara la categoría filolóxica (y polo tanto llegal) del asturianu:
  1. El bable, como lengua específica de Asturias, gozará de protección. Se promoverá su uso, su difusión en los medios de comunicación y su enseñanza, respetando en todo caso, las variantes locales y la voluntariedad en su aprendizaje.
  2. Una ley del Principado regulará la protección, uso y promoción del bable.
Pero nel Congresu de los Diputaos, la redacción orixinal desanició aquelles cinco pallabres, “como lengua específica de Asturias”, dexando al asturianu ensin una definición clara de lo que ye nel Estatutu d’Autonomía y polo tanto, fuera del amparu llegal que da a les llingües la Constitución. Mientres otres comisiones sobre l’Estatutu d’Asturies tienen colgaes les actes y hasta l’audiu de los conceyos na web del Congresu, d’esta discusión nun s’atopa nada.
La razón d’esta fras borrada del Estatutu ta clara. Si yá la redaición actual del Estatutu podría dar pie a inconstitucionalidá del testu por nun-y dar el rangu d’oficialidá a la llingua asturiana, tal y como afita la Constitución, non como posibilidá, sinón como mandatu, una redaición como aquella aprobada n’Asturies en 1981, diba permitir que’l Tribunal Constitucional pudiere reconocer, si esistiera una reclamación d’un terceru, la necesidá d’oficializar una llingua reconocida como tala, nel Estatutu.
Trentaicinco años más tarde d’aquel robu llexislativu que supunxo una indefinición llegal de gravísimes consecuencies pal asturianu, y que relegó la reconocencia llegal como llingua a la Llei d’Usu del asturianu de 1998, ye un bon momentu pa recordar la necesidá de camudar esta situación, de da-y al asturianu un rangu llegal en pie d’igualdá col restu de les llingües del estáu.
Entós robáronmos la posibilidá, pero la sociedá asturiana, que lleva trenta años movilizada a favor del reconocimientu del idioma, nun pue dexar pasar agora otru tren, que podría apaecer si se pon en marcha un procesu de reforma de la Constitución o del Estatutu d’Autonomía, como proponen cásique toles fuercies polítiques. La sociedá asturiana nun pue permitise siguir perdiendo oportunidaes de poner en valor l’asturianu y cualesquier procesu de reforma del estáu que pueda producise tendrá de reconocer la realidá llingüística d’Asturies y la plena igualdá xurídica de los ciudadanos, independientemente de la llingua qu’usen.


Fonte: Asturies24

19/12/15

Esti sabadu entréguense los XXXI Premios Andrés Solar

Cartelu_de la entrega_de_los_XXXI_Premios Andrés Solar

  L'actu d'entrega de los XXXI Premios Andrés Solar celebrense güei, sabadu 19, a les 19.30 hores nel Centru de Cultura Antiguu Institutu. 
  El Madreñazu ye pal discursu antiasturianu de delles instituciones y medios de comunicación, exemplificáu nel 'casu Miguel Alarcos'. La entrega de los XXXI Premios Andrés Solar va celebrase'l sábadu 19 nel xixonés Centru de Cultura Antiguu Institutu.
  El Pegollu, que premia a una entidá o persona que rescamplara pol so llabor en defensa o promoción del asturianu, ye nesta edición pa Sidra L'Allume, llagar qu'etiqueta la so producción en llingua asturiana. D’esta forma, la Xunta pola Defensa de la Llingua Asturiana (XDLA) quier reconocer el llabor d'esta empresa, “que vien llevando alantre un proyectu cooperativu d'ellaboración y comercialización de sidra usando y visibilizando l'asturianu tanto nel productu como na so difusión comercial y publicitaria. Por eso son bonos merecedores d'esti premiu”.
  Por contra, el Madreñazu, el premiu negativu que la organización cívica entrega a la persona o entidá que rescamplara pol so llabor negativu pa cola llingua asturiana, recayó nel "discursu ranciu, asturianófobu y discriminatoriu que sigue presente en dalgunes instituciones y que, sistemanticamente amplificáu por determinaos medios de comunicación", que tuvo esti añu "la so espresión más clara nel casu recién de Miguel Alarcos. Por too esto, la Xunta pola Defensa de la Llingua Asturiana considéralu bon merecedor del antipremiu".
Fonte: asturies.com

El Festival Escenines pala Reciella entama’l 27 cola presentación del CD “Bestiariu”


El Festival Escenines pala Reciella entama’l 27 cola presentación del CD “Bestiariu”
El Festival de Teatru Infantil y Xuvenil n’asturianu organizáu pola asociación “Reciella, families pol asturianu” va desenvolvese dende’l día 27 col sofitu del Ayuntamientu de Xixón, la Caxa Rural y el C.P. Xovellanos onde tienen llugar les representaciones. El Festival entama esti añu cola presentación del CD Bestiariu.
El programa arranca esti domingu 27 d’avientu a les 12.00 hores col conciertu presentación del CD recopilatoriu “Bestiariu”, que ya tien na rede un adelantu del discu y pal que yá ta confirmada la presencia de casi toles bandes , con entrada gratuita como toles actividaes d’Escenines.
El miércoles 30 d’avientu, a les 19 hores, representarase la obra “Grana de cardamomu” d’El Callejón del gato. Y el sábadu 2 de xineru, a les 12 hores asocederá lo mesmo cola obra “Arriba’l periscopiu” d’Higiénico Papel.
El llunes 4 de xineru, a les 19 hores, pesllarase la programación d’esti Festival de l’Asociación Reciella, con “Xuan Soldáu” del actor y monologuista Carlos Alba “Cellero”.
Fonte: Asturnews

18/12/15

La revista Cultures celebra 25 años col so númberu 19


  L'actu de celebración de los 25 años de la revista Cultures, el próximu llunes 21 d’avientu, a les 19:30 de la tarde, na sala de conferencies del Antiguu Institutu Xovellanos (cai Xovellanos 21) de Xixón dientro de les actividaes del décimu aniversariu de L’Arribada va sirvir tamién pa presentar el númberu 19 de la revista.
  Nel actu de presentación del nuevu númberu de la revista qu’edita l’Academia de la Llingua Asturiana van participar l’etnógrafu Alberto Álvarez Peña y el direutor de Cultures, Roberto González-Quevedo.                                          Fonte: asturnews.com

Iniciativa pol Asturianu celebra un alcuentru d’entrega de carnés a socios nuevos


Iniciativa pol Asturianu celebra un alcuentru d’entrega de carnés a socios nuevos
L’actu lúdicu va ser una folixa na que van entregase los nuevos carnés de sociu/a, amás de cuntar con otres actividaes como una preba de cerveza Bayura, cerveza fabricao en Xixón y etiquetao n’asturianu, de la mano de Serxu Solares.
La folixa, organizada pa los socios, ta abierta tamién a otres persones que quieran averase a conocer la organización. Ente les actividaes tamién ta previsto celebrar la entrega de diplomes del cursu d’asturianu en Xixón, que remata estos díes la so edición seronda-iviernu 2015.
Fonte: Asturnews

17/12/15

Concedíes sovenciones a 7 proyeutos pa promoción de la música n’asturianu

Concedíes subvenciones a 7 proyectos pa promoción de la música n’asturianu
Na resolución d’esti añu namái tres de los proyeutos son individuales, axuntando los otros cuatro interpretaciones de varios autores. Los 7 CD suvencionaos son “Que nun t’aborreza la naturaleza” de Petit Pop, “Con estes y otres palabres” de Fernando Valle Roso; el CD llibru “A guerra dos mundos” del grupu Bacotexo de pop-rock en gallego-asturianu; y los recopilatorios “Bestiariu”, “Cuenca del Caudal, 18 aniversariu”, “XX Concurso de la Nueva” y “Viendren 2015″.
L’oxetu d’esta llinia d’actuación ye la concesión d’ayudes económiques en réxime de concurrencia competitiva a empreses privaes (persones físiques o xurídiques) que presenten proyeutos discográficos onde l’asturianu y/o gallego-asturianu seya la llingua normal y vehicular na qu’aparezan les lletres de los cantares y tolos testos impresos o dixitales qu’acompañen la obra musical. A lo menos la metá de los temes del discu han tar escritos y cantaos en dalguna d’eses llingües.
La resolución de la concesión de les sovenciones pa promoción de la música puen consultase nel BOPA. Fonte: Asturnews
Llistáu de Subvenciones concedíes
Sovenciones concedíes