4/6/17

¿P'hacia ónde vas, Asturies?


Roberto González-Quevedo
El pasáu d'Asturies ye grande y complexu. El presente nun tien un aquel risón, sinón amurniáu poles crisis que dende hai años castiguen a la sociedá. Pero, ¿y el futuru?
El futuru depende de lo que se faiga agora y eso implica una responsabilidá. A l'Academia de la Llingua Asturiana como institución correspuénde-y proponer la rempuesta al desafíu que vien en cuantes a la llingua y a la cultura asturianes.
Tenemos una llingua que naz nos raigaños d'Europa y que xune y troquela la personalidá de la cultura astur. Tantos sieglos d'historia dexaren mui valoratibles creaciones lliteraries. Y anque esta llingua anduvo siempre castigada poles autoridaes y hasta hai poco prohibióse nes escueles, el pueblu siguió calteniéndola. Ye, entós, necesario da-y una oportunidá al tiempu que ta por venir.
Ensin cooficialidá l'asturianu tien zarraes les puertes que lleven al futuru: vive marxinada ya invisible. Amás de ser una inxusticia, esto torga les posibilidades d'un crecimientu curiosu. Ye verdá qu'esta llingua llogró caltenese a lo llargo de los sieglos, pero les coses son diferentes nel presente: el poder de los medios y la difusión electrónica de la cultura tán rompiendo les vieyes formes de tresmisión llingüística. Y asina les llingües marxinaes van quedar más arrequexaes entovía.
Escontra esti penosu llevar la llingua al desaniciu, la cooficialidá del asturianu sedría un bien capaz de dar al futuru más fuerza, más autoestima y más confianza. Y esto necesítalo la sociedá asturiana, depués de les frustraciones y decepciones que dexó la crisis.
Nos caberos años abriérense nueves estayes y semóse en nuevos espacios. Cada vez vertebra más la llingua asturiana les actividaes culturales y más coleutivos s'identifiquen con esti llabor. L'Academia tien puestes les bases de calter filolóxicu pa que la clas política normalice la llingua asturiana como un bien coleutivu. Y los políticos tienen que tener en cuenta dos realidaes sociolóxiques. Per un llau, la política negativa ta faciendo que l'asturianu nun pueda avanzar. Pero, per otru, la xente más xoven, el futuru, tien una actitú favoratible a normalización del asturianu pa que la cultura asturiana brille otra vuelta. Per ehí va'l futuru.
Fonte: La Voz de Asturias

11 comentarios:

  1. Fantásticu, el mayestru González-Quevedo tien toa la razón del mundu. La oficialidá ye clave na perviencia de la llingua asturiana coles bases científiques que pon la Academia de la Llingua. Los políticos tienen enforma responsabilidá : a) pa con la llingua y b) pa con los asturianos y asturianes n'especial los xóvenes que demanden la oficialidá.

    ResponderEliminar
  2. Esto ye lo que piensen la gran mayoría de los asturianos. Políticos de la Xunta Xeneral, ¿pa cuándo vais dexar de torgar la oficialidá del asturianu? ¿pa quién o pa quiénes trabayáis n'Asturies? ¿a quién servís? ¿pa lo vuesos intereses de partíu namás? ...y la xente ¿qué?, y la llingua ¿qué? ¿qué facéis ehí sentaos?

    ResponderEliminar
  3. Profesor González-Quevedo, siempres hai persones erudites y entidaes académiques (munches) que faen, que construyen, que llaboran pola llingua y pola cultura asturiana en particular; pero hai otres (que faen bultu asgaya) ensin alma, que paez que trabayen pal pueblu asturianu pero non, trabayen pa derribar lo de nuesu, y namás pa conservar lo suyu. les sos poltrones, les sos idees polítiques, los sos sueldos, y les sos desaxeraes ventayes sociales namás. Esa ye la grande pena y el bien grande cabréu.

    ResponderEliminar
  4. ¿P'hacia ónde vas, Asturies? pal desaniciu pal que nos lleven esta 'clas política' egoísta que mira namás pa los sos intereses y non polos intereses ayenos, los de la mayoría d'asturianos y la so llingua materna que glayan y se manifiesten en vanu pola so cultura.

    ResponderEliminar
  5. ...vamos pal desastre cultural, al desaniciu llingúísticu, económicu y de futuru, la culpa ye de los incapaces y pal nuedo de xente inepta que nos "gobiernen".

    ResponderEliminar
  6. La Academia de la Llingua Asturiana, la normalización y la oficialidá son el futuru de la llingua asturiana. Hai que lluchar por estos oxetivos y si les palabre non basten basten hai que dir a lo pocu prestoso de les cacerolaes y al ruíu enforma.

    ResponderEliminar
  7. Magníficu artículu y bien real.

    ResponderEliminar
  8. Quants asturians valoren l'oficialitat? Quants la consideren prioritària o imprescindible? Quants consideren que hauria de ser matèria obligatòria a l'ensenyament? Els polítics possiblement ho saben i per això no fan res.

    I si no, organitzeu una enquesta i treieu-ne conclusions sobre una base sòlida.

    ResponderEliminar
  9. Va asoleyase estos díes la III encuesta sociollingüística d'Asturies. Ehí va vese bien.

    ResponderEliminar

Los comentarios tán pendientes de moderación. Espublizaránse lo primero dable.