La Tertulia Malory escueye 'Lluvia d’agostu' meyor llibru n’asturianu de 2016

L'escritor xixonés Francisco Álvarez

   La Tertulia Malory, de L’Entregu, escoyó como meyor llibru n’asturianu de tolos que s’editaron nel 2016 la novela Lluvia d’agostu, del escritor xixonés Francisco Álvarez. Fízolo’l vienres 23 de xunu nun actu que se celebró nel pub Tom Malory de L’Entregu, sé de la tertulia lliteraria dende 1998.

  La Tertulia Malory, de L’Entregu, escoyó como meyor llibru n’asturianu de tolos que s’editaron nel 2016 la novela Lluvia d’agostu, del escritor xixonés Francisco Álvarez. El xuráu formáronlu los escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García, Lluis Aique Iglesias y Henrique G. Facuriella, que fallaron el premiu nun actu celebráu na tertulia’l 23 de xunu del 2017.

  El xuráu destacó, nel acta del fallu, «la maestría cola que l’autor resuelve una empresa tan ambiciosa como la de contar la historia del anarquista Buenaventura Durruti ensin perder de vista al home que la historia convirtiera nun símbolu. Tres d’esti trabayu narrativu, onde Álvarez fai rescamplar el so dominiu del asturianu pa facer llegar al públicu la historia al traviés d’un llinguaxe contemporaneu, apréciase un llabor de documentación rigorosu, que mete dafechu al llector na trama y lu conecta colos sos protagonistes».

  El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu na seronda d’esti mesmu añu. Esta ye la sesta vez que’l grupu concede esti premiu. L’añu pasáu resultó ganadora la obra L’aire ente la rama, poemariu de la escritora Ángeles Carbajal, y, n’ediciones anteriores, premiáronse les obres Más espeso que l’agua, de Consuelo Vega; Carne de melandru, de Milio Rodriguez Cueto; La Chelita, de Ruma Barbero, y La ñeve del Cuquiellu, de Xabiero Cayarga. Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu.

  Lluvia d’agostu (Hoja de lata, 2016) tien como filu conductor la historia de Buenaventura Durruti, símbolu del anarquismu ibéricu, dende 1923 –fecha del atracu al Bancu d’España en Xixón– hasta’l 20 de payares de 1936, cuando la muerte convierte al home nun mitu. Cincuenta años más tarde d’esa fecha, una periodista francesa marcha a la busca de respuestes que la ayuden a esclariar el misteriu de la so muerte. Nesta historia ye la que somorguia al llector Francisco Álvarez, que desenvolvió un llabor intensu de documentación histórica pa escribir una novela que yá algamó, nel 2015, el  XXXVI Premiu Xosefa Xovellanos, qu’entrega’l Gobiernu d’Asturies.

  Francisco Álvarez (Xixón, 1970) ye periodista, traductor lliterariu y autor de delles obres como Patiu de prisión (VTP, 1998), En poques pallabres (Trabe, 1998), Dixebra, cróniques d’un pueblu (L’Aguañaz, 2003), Historia de cinco goles. El Mundial de ‘El Guaje’ (La Cruz de Grado, 2010), Rumbo a la Historia. Navíos emblemáticos de todos los tiempos (Seronda, 2011), La tierra de la libertad. Crónica de los derechos humanos y civiles en el mundo (Seronda, 2012) y Un país llamáu Dixebra. La historia y les lletres de la banda decana del rock n’asturianu (Seronda, 2013).

  Tamién tradució al asturianu la novela de Leonardo Sciascia Una historia cenciella (Seronda, 2012) y, del italianu al castellanu, les noveles Lobos frente al mar, de Carlo Mazza (Seronda, 2013); Memoria del vacío, de Marcello Fois (Hoja de Lata, 2014), y Choque de civilizaciones por un ascensor en Piazza Vittorio, d’Amara Lakhous (Hoja de Lata, 2016).                                                                                            Fonte: asturnews.com