El Sporting B recupera plaza en Segunda B

Sporting B - Beasain en Mareo, Xixón, semeya obra de Cristian López García.

 Tres derrotar en Mareo por 5-2 al Beasain (7-4 nel global). L'ascensu del conxuntu roxiblancu permite al Valdesoto, al Manuel Rubio y al Unión Astur el dar un saltu de categoría.

 Un añu duró la travesía del Sporting B pela Tercer División. Con un equipu mui renováu con respeuto al que baxó l'añu pasáu y con xente bien mozo, José Alberto López consiguió devolver al filial roxiblancu a la Segunda División B, l'oxetivu únicu de la temporada.

 Tres firmar una lliga regular espectacular, los roxiblancos tuvieron que siguir la vía llarga del ascensu tres perder la eliminatoria de campeones con un Olot que nun demostró ser superior a los xixoneses. El siguiente rival del Sporting B foi otru filial, el del Almería, teniendo que xugase'l saltu a la categoría de bronce del fútbol estatal col Beasain en Mareo tres empatar a dos goles na ida.

 El partíu comenzó de cara pa los de José Alberto, cuando l'árbitru señalaba un penalti por mano nel minutu 5 que conllevó una espulsión rigurosa. Claudio anotaba'l primeru de la tarde y Jon Aranda tomaba'l camín de vestuarios práuticamente inéditu.

Con diez tol partíu

 Claudio volvió a ver puerta nel 16 y la eliminatoria parecía sentenciada, pero'l Beasain nunca-y perdió la cara al partíu y Jon Ander foi más llistu que Nacho Méndez y anotó'l 2-1 nel minutu 38, tres intentar sacar rápidu'l sportinguista una falta na frontal del área propia. Sicasí, Pablo Fernández consiguía marcar enantes del descansu y dar tranquilidá al equipu.

 Otra vegada Jon Ander, nel 59, superaba a Dani Martín y ponía'l mieu nel cuerpu a los aficionaos qu'abarrotaben Mareo –colgóse'l cartelu de 'entraes escosaes'–, ente ellos a un grupín llegáu de Valdesoto cola esperanza de que'l so equipu compitiera l'añu próximu en Tercera, pa lo que yera necesariu un ascensu roxiblancu. Un tantu vascu daba la eliminatoria al Beasain.

 Y los guipuzcoanos tuvieron ocasiones pa ello, anque foi Claudio, l'héroe del partíu, el qu'acabaría cola incertidume al anotar nel 85 el so tercer tantu. Rubén, nel añadíu, redondería'l resultáu pa poner un definitivu 5-2.

 Felicidá, poro, en Mareo, Valdesoto y otros puntos de Xixón, yá que l'ascensu del Sporting B provocó tamién el de dos equipos xixoneses: el Manuel Rubio, a preferente, y l'Unión Astur, a Primera Autonómica.                                                                                   Fonte: asturies.com