15/6/17

Novedaes educatives pal asturianu o como falar muncho ensin facer res

Nel panorama la enseñanza n’Asturies rescamplen dos novedaes qu’afeuten  a la nuesa llingua mui direutamente: la inclusión del asturianu n’infantil ya’l so usu como llingua veicular. Comu temíemos, la lletra piqueña déxales en papel moyao

Llucía F. Marqués
 La llingua asturiana paez ser la protagonista de les novedaes pal viniente cursu escolar: la puesta en marcha del plan esperimental que convierte a la llingua en idioma veicular y la estensión de les clases de llingua a infantil. Les posibilidaes de desendolcar estes dos idegues pa rescatar del so estáu de minorización al asturianu abulten perbones… si nun fore qu`al cocer mengua. Analicemos les dos cuestiones al detalle.
1– Plan pilotu o esperimental del billingüismu.
Va unos meses acoyíemos gayasperos la noticia del usu del asturianu como llingua veicular na educación. Interpretámoslo –non ensin cierta rocea que resultó acertada- comu que los nuesos neños tendríen por fin el drechu, básicu, d’estudiar na so propia llingua. Al cocer, mengua; tanto que cuasi desapaez.
Seis colexos, un solu cursu (cuartu de primaria), una única materia (ciencies o educación física), con inversión cero y namás una hora a la selmana. El conocimientu de la llingua nun se valorará y de fechu tará permitío falar n’español na hora asturiana, pero non al contrario. Esa ye la ufierta pa los colexos que seyan quien a pasar les condiciones lleonines que tienen de cumplir pa entrar nel proyeutu “d’usu del asturiano como llingua veicular”.
Pa tar pente los seis colexos pioneros tendrán de cuntar con un índiz previu de matriculación d’asturianu perriba’l 75% de los escolinos del cientru, teniendo que presentase autorización por escrito de les families que quieran a participar nel proyeutu. Arriendes d’ello, el colexu tien de cuntar con profesores abondos capacitaos pa dar les clases dientro’l so horariu, daqué abegoso tres de los recortes de docentes que carecemos. Tou ello en menos d’un mes, a solicitar anantes del trenta de xunu.
En conxuntu, una riestra de torgues que requerirán de muncho enfotu por parte los interesaos y tamién de muncha suerte, pa que concurran el porcentaxe de families interesaes, los profesores ya’l conseyu escolar. Les families asturfalantes que s’alcuentren en minoría nel so colexu sedrán direutamente discriminaes, torgándoseyos cualesquier opción de participación nel proyeutu y la casualidá sedrá la que decida la concurrencia de pás y mas enfotaos con profesores y direición dimpuestos. Una auténtica carrera d’ostáculos a cambiu d’un plan tan ruin que movería a risión si nun moviera a tanta pena.
“Esto ye tou simbólico” valoren en SUATEA, “Un reconocimientu mínimu ensin trascendendia nin repercusión nel futuru l’idioma”.
Sicasí, cada vegada son más los colexos que n’Asturies ufren enseñanza billingüe n’inglés y la comparanza rescampla: non un, sinón tolos cursos, dende 3 años a sestu, profesoráu específicu y non una, sinón fasta cuatro asignatures impartíes dafechu n’inglés con alrodiu de diez hores selmanales d’esti idioma.
2- La conseyería tramita por vía “urxente” un decretu pa implantar el prósimu cursu les clases d’asturianu n’infantil.
¿Urxente? La reforma aporta cuasi venti años depués de ser recoyía na llei d’usu y promoción de 1998, pero entá asina dase un plazu de tres años pa que seya obligatorio en tolos cientros. “Ye cierto qu’en dellos colexos ya se taba impartiendo asturianu n’infantil, en cumplimientu de la llei y gracies al enfotu los cientros, esos sedrán los que sigan ufiertando asturianu l’añu que vien” comenten dende SUATEA, sindicatu d’enseñantes que presentó delles enmiendes a esta reforma, denguna de les cuáles foi aceutada.
“Tou esto nun son más que pasos de formiguina pa dar una cierta imaxen de llegalidá, otra oportunidá perdía” llamenten. El primer añu namás se reflexará`l llabor  d’aquellos colexos que dientro la so autonomía pedagóxica ya incorporaren l’asturianu al currículu d’infantil cinco años. El cursu viniente, 2018/2019, la ufierta estenderáse a toles clases de 5 años d’Asturies y namás de magar el 2019/2020, recibirán asturianu, si así-y petez al conseyeru del momento, los de 3 y 4 años… siempres que`l cientru cuente colos medios pa ello, apreciación qu’ufre perpoques garantíes a la so aplicación.
Los conteníos nun tan afitaos, eso déxase más p’alantre. La obligatoriedá pa los cientros queda nel aire, al venceyase`l so desendolcu a la disponibilidá de profesores y medios. Los profesores sedrán los  mesmos de primaria y nun cuenten con ampliar el númberu de docentes según demanda. La  imprecisión ta nidia y la única anotación curricular alcontrámosla nos oxetivos «descubrir y participar en dalgunes manifestaciones sociales, culturales y artístiques del so alrodiu, desendolcando una actitú d’interés y apreciu faza’l el padrimoniu cultural asturianu y, en so casu, al padrimoniu llingüísticu”.
Otra de les enmiendes presentaes –y refugaes- ye la cincante al tiempu –una hora selmanal-, menos que  d’inglés y que de cualesquier otra materia.
Arriendes d’ello“Va ser voluntario pa los escolinos, dientro’l marcu llegal de falta d`oficialidá que torga`l so tratamientu como una asignatura más. Fasta que nun algamemos la oficialidá de la llingua siguiremos careciendo esta situación de marxinalidá, esti apartheid llingüísticu nel que la falta de garantíes ye norma.”                            Fonte: infoasturies.com

2 comentarios:

  1. Una altra de les coses que m'ha sorprès (bé, sorprendre ja no gaire) és que es garantirà que els alumnes aprenen també el lèxic de la matèria en castellà. Per què? Doncs perquè no es preveu que aquests alumnes puguin examinar-se en asturià i, per tant, només s'examinaran en la llengua important, el castellà.

    Mala forma de valorar una llengua.

    ResponderEliminar

Los comentarios tán pendientes de moderación. Espublizaránse lo primero dable.