¿P'hacia ónde vas, Asturies?

Roberto González-QuevedoSecretariu de l'Academia de la Llingua Asturiana

El pasáu d'Asturies ye grande y complexu. El presente nun tien un aquel risón, sinón amurniáu poles crisis que dende hai años castiguen a la sociedá. Pero, ¿y el futuru?

El futuru depende de lo que se faiga agora y eso implica una responsabilidá. A l'Academia de la Llingua Asturiana como institución correspuénde-y proponer la rempuesta al desafíu que vien en cuantes a la llingua y a la cultura asturianes.

Tenemos una llingua que naz nos raigaños d'Europa y que xune y troquela la personalidá de la cultura astur. Tantos sieglos d'historia dexaren mui valoratibles creaciones lliteraries. Y anque esta llingua anduvo siempre castigada poles autoridaes y hasta hai poco prohibióse nes escueles, el pueblu siguió calteniéndola. Ye, entós, necesario da-y una oportunidá al tiempu que ta por venir.

Ensin cooficialidá l'asturianu tien zarraes les puertes que lleven al futuru: vive marxinada ya invisible. Amás de ser una inxusticia, esto torga les posibilidades d'un crecimientu curiosu. Ye verdá qu'esta llingua llogró caltenese a lo llargo de los sieglos, pero les coses son diferentes nel presente: el poder de los medios y la difusión electrónica de la cultura tán rompiendo les vieyes formes de tresmisión llingüística. Y asina les llingües marxinaes van quedar más arrequexaes entovía.

Escontra esti penosu llevar la llingua al desaniciu, la cooficialidá del asturianu sedría un bien capaz de dar al futuru más fuerza, más autoestima y más confianza. Y esto necesítalo la sociedá asturiana, depués de les frustraciones y decepciones que dexó la crisis.

Nos caberos años abriérense nueves estayes y semóse en nuevos espacios. Cada vez vertebra más la llingua asturiana les actividaes culturales y más coleutivos s'identifiquen con esti llabor. L'Academia tien puestes les bases de calter filolóxicu pa que la clas política normalice la llingua asturiana como un bien coleutivu. Y los políticos tienen que tener en cuenta dos realidaes sociolóxiques. Per un llau, la política negativa ta faciendo que l'asturianu nun pueda avanzar. Pero, per otru, la xente más xoven, el futuru, tien una actitú favoratible a normalización del asturianu pa que la cultura asturiana brille otra vuelta. Per ehí va'l futuru.

Fonte: La Voz de Asturias

Formientu presenta'l so númberu 12 esti sábadu en La Manzorga de Xixón

El recital que va celebrase nel actu de presentación del númberu 12 de la revista Formientu va cuntar con dellos autores y la música a la viola de Naomi Suárez. Nesta publicación fundada en 2006 asoleyense testos lliterarios n'asturianu d'autores de menos de trenta años. La revista, dirixida por Inaciu Galán dende la so fundación en 2006, sigue apostando por ser cantera de nuevos autores en llingua asturiana, dándolos a conocer y apurriendo un espaciu pa los sos testos. El viniente sábadu 11 de xineru va presentase nel espaciu cultural La Manzorga, en Xixón (cai del Carmen 20), de magar les 19 hores y cola presencia d'autores, que darán llectura y comentarán los testos de la revista. Na seición "Cuando... yera autor mozu" apaez nesti casu un testu de Pachín de Melás. Na sección búscase dar a conocer la obra escrita por autores clásicos o contemporáneos, escrita demientres la so mocedá. El poema asoleyáu nesta ocasión espublizólu l'autor xixonés con 22 años. Nesti númberu apaecen testos d'Alberto Cla, Andrés Astur Treceño, Laura García Calvo, Cristina Menéndez Martín, Fonsu Suárez, David Carrasco Díaz, Naomi Suárez González, Ismael Carmona García, Nayar Crespo Sánchez, Jaime Martínez Menéndez, Pablo M. Testa, Alba Llaneza Pulido, María García Díaz, Blanca Fernández Quintana y Xurde Álvarez Antón. Amás, ta ilustráu pol xoven fotógrafu y cineasta Pablo Casanueva. Toos ellos tienen menos de trenta años y asoleyen la so obra n'asturianu. Fonte: Infoasturies

II Concursu de música y llingua asturiana pa xente mozo

Hasta'l día 12 de marzu de 2012 podrán presentase los trabayos al II Concursu "Que suene la llingua".

Convoca: La Oficina Municipal de la Llingua de la FMCEUP del Conceyu de Xixón.
Fin del plazu de presentación: Los trabayos presentaránse enantes día 12 de marzu de 2012.

Dotación: El premiu va consistir na edición del cantar y l’actuación del grupu durante la celebración de la IX Edición de los Alcuentros “Saca la llingua”, que se van cellebrar nel mes d’abril de 2012.

Observaciones: Van poder presentase grupos de cualesquier estilu de música, de xente mozo d’hasta 20 años empadronao nel conceyu de Xixón. L’oxetivu d’esti concursu ye axuntar la llingua asturiana y la música pa creyar un cantar que sirva d’himnu pa los futuros Alcuentros de la Mocedá cola Llingua.

Fonte: llingua.gijon.es

VIII Alcuentros de la Mocedá cola Llingua Asturiana en Xixón

El martes 12 d'abril, el Conceyu de Xixón, al traviés de la Oficina Municipal de la Llingua, entamó la ochava edición de los Alcuentros de la Mocedá cola Llingua Asturiana Saca la llingua, que desenvolviéronse en Llaboral Ciudá de la Cultura a lo llargo de la mañana d'esi día, y nos que participaren más de cuatrocientos escolinos.

El programa faise en collaboración colos centros educativos del conceyu y busca qu'éstos asuman el so papel como axentes de normalización llingüística, potenciar el desenvolvimientu d'actividaes de promoción social de la llingua asturiana que sían atractives pa los más mozos, favorecer una reflexón sobre la situación del asturianu y la importancia d'activar acciones a favor d'ello y asociar esa reflexón llingüística a actividaes coleutives, lúdiques, prestoses, culturales y interdisciplinaries.

Al ser 2011 l'Añu Internacional de los Montes, los Alcuentros ficiéronse nun sitiu especialmente significativu como ye la Universidá Llaboral, y ente los actos destaca una gimkana cultural alredor de los montes y lo verde y un percorríu pa descubrir la intrahestoria de la Llaboral. Amás d'eso, tamién hebo cuentacuentos, talleres de rap, de baille, de cómic, de doblaxe y de rock, xuegos tradicionales y proyeición de vídeos. Fonte: RTPA-Estaya d’asturianu

I Xornaes sobre mocedá y llingües minorizaes

Los díes 8 y 9 de mayu cellébrense nel auditoriu d'Uviéu les primeres Xornaes sobre Mocedá y Llingües Minorizaes, entamaes pol Conseyu de la Mocedá del Principáu d'Asturies y Xunta Moza. Nelles van desendolcase una serie de debates y talleres nos que van participar espertos non solo d'Asturies, sinón tamién de Galicia, Cataluña, País Vascu, Baleares o Gales.
Xunto coles ponencies desendolcaes nel auditoriu, van impartise talleres nes instalaciones de caún de los conseyos (Principáu, Xixón, Uviéu), nel Palaciu Valdecárzana d’Avilés y nel polideportivu de La Pola Llaviana.

“L'Estáu español tien una realidá plurinacional, pluricultural, plurillingüística. Sicasí, ésti tovía tien qu'asumir, con toles consecuencies, la so diversidá nacional nos ámbitos políticu, socioeconómicu, cultural y llingüísticu. La reconocencia d'esta realidá tendría qu'implicar la protección efeutiva de toles llingües presentes nel so territoriu. Dempués de Bélxica y Lluxemburgu, ye l'Estáu de la Xunión Europea onde'l fenómenu del plurillingüismu ye más importante, llegando a constituyir una carauterística distintiva y non un fechu aneudóticu”, s’afita na información sobre les xornaes.