7/6/17

Gala de teatru escolar (n'asturianu)

Los escolinos de los colexos públicos de Felechosa y Returbiu representen l’ocho de xunu les obres premiaes nel IV Certame de Teatru Escolar n’Asturianu


  Nel caberu Certame de Teatru Escolar n’Asturianu, convocáu pola Conseyería d’Educación y Ciencia del Principáu d’Asturies durante’l cursu escolar 2016/2017, con motivu de la 38º Selmana de les Lletres Asturianes,  foron premiaos los grupos de teatru de cuatro colexos y tres istitutos.  Dos d’ellos, el  C.P. Felechosa ya’l C.P. Returbiu, representarán les sos obres na Gala de teatru escolar que se cellebrará na Casa Cultura Manuel Llaneza, en Mieres. Seique los primeros premios nun foron pa estos colexos –el primer premiu d’educación primaria foi pa la obra “El Cenicientu”, del CRA Baxu Nalón, ya’l de secundaria pa “Un fin d’añu sele”del I.E.S. de Pravia- si que foron estes obres les que más premios algamaron.
  Asina “Anovase o morrer” algamó’l Premiu al Meyor Testu Orixinal, Premiu al Meyor Actor y Premiu al Meyor Vestuariu, demientres que la obra de Returbiu, “Un simple anunciu de llotería” recibió’l Segundu Premiu na categoría d’educación Primaria, el Premiu a la Meyor Escenografía ya’l Premiu a la Meyor Direición.
  “Anovase o morrer”, interpretada polos escolinos de sestu cursu,  ye una comedia que se centra nuna alloriante mañana nuna oficina del SEPE na que les persones que van a pidir un trabayu nuevu son daqué especiales: la mesmísima Güestia, la Guaxa, el temíu Home del Sacu y el semi-xabaz Home Llobu; la crisis aporta a toles estayes de la sociedá y ellos nun diben ser menos, asina que van a la gueta un nueu trabayu, poniendo de los nervios a la trabayadora de la oficina. Na media hora llarga que dura la obra los personaxes desendolquen una sátira crítica del usu desaxeráu de les nueves teunoloxíes y la pérdida de vezos y tradiciones.
  “Un anunciu de Navidá namás” interpretada polos escolín@s de 5º y 6º del C.P. Returbiu, narra en trece menutos el trescursu’l díi del sortéu de la llotería de Navidá nuna residencia d’ancianos “Residencia La Minería” nun pequeñu pueblín averáu a Mieres.
  N’entrambes obres espéyase la influyencia de la tradición ya una cierta señaldá por tiempos pasaos. Podrán vese de magar les 18:00 del díi 8, na casa Cultura Teodoro Cuesta –Mieres- y la entrada sedrá a la voluntá.                               Fonte: infoasturies.com

No hay comentarios:

Publicar un comentario

Los comentarios tán pendientes de moderación. Espublizaránse lo primero dable.