LA XDLLA pide al Gobiernu aición col asturianu

Tres cumplise 100 díes del nomamientu de conseyeros del Gobiernu nuevu, la Xunta pola Defensa de la Llingua Asturiana (XDLLA) pide al Executivu que pase a los fechos col asturianu. Teme que les bones impresiones primeres sían fumu.

Nun comunicáu, el so voceru, Carlos Pulgar, recuerda que “yá tuvimos les oportunes entrevistes cola conseyera d'Educación y col direutor xeneral de Política Llingüística, responsables direutos del enseñu y de la normalización social de la llingua asturiana, pa tresmiti-yos les nueses demandes pa facer frente a la situación actual de marxinación y falta de drechos”. Tres estos aconceyamientos, les impresiones de los responsables del coleutivu “foron rellativamente positives”, anque Pulgar asegura que “nestes feches”, tres pasar cien díes del nomamientu de los conseyeros, “ta caducando aquel marxe d'enfotu y queremos entamar a ver midíes y fechos concretos que confirmen qu'aquelles impresiones primeres nun yeren namás fumu”.

Pa la XDLLA “ye’l momentu de los fechos.Ye'l momentu de saber si tamos o non énte l'enésimu engañu al asturianu y a los drechos de los falantes. Ye'l momentu p'alcordase de la llaceriosa situación que carez l'idioma nel sistema educativu, nos medios de comunicación y na propia Alministración. Ye'l momentu pa que les Alministraciones a lo menos tengan a bien dar cumplimientu al marcu llegal vixente. Ye'l momentu de que los falantes d'asturianu dexen de sentise y de ser ciudadanos de segunda; y pa eso fai falta que paren les declaraciones d’intenciones baleres, les dilaciones, los xuegos florales, los cálculos interesaos y les estratexes eleutoralistes”. Sobre la influyencia que pue tener la crisis económica sobre la promoción del idioma, Pulgar recordó que “la gran mayoría de midíes normalizadores, con voluntá política, tienen un coste cero pa los presupuestos y la ciudadanía. Cumplir les lleis, respetar la toponimia oficial, visualizar el idioma nos medios y na Alministración pública, nun suma nengún gastu y sí amiesta drechos, oportunidaes y desarrollu. Pa esto namás hai que tener presente, nes aiciones de gobiernu, la importancia d’un patrimoniu fundamental de tola ciudadanía que, pola so fraxilidá, necesita d’un compromisu inequívocu na so difusión per toles cañes de les alministraciones, los medios de comunicación y el sistema educativu”.

Pa finar, el coleutivu de defensa del idioma avisa de que “si se sigue ensin facer nada, dexando’l tiempu pasar, faciendo dexación de funciones, la complicidá y culpabilidá pa cola agonía del idioma va ser la mesma que la de munchos responsables anteriores que tampoco quixeron o supieron da-y la vuelta a esta desastrosa situación”, polo que llama a los responsables actuales a “cumplir les lleis y decretos que nos asisten” y “facer y tomar les determinaciones que faigan que la llingua asturiana tea presente con normalidá en tolos aspeutos de la vida pública y que la población que s'espresa nella tenga asegurada la so igualdá xurídica al traviés d'un marcu d'oficialidá nel Estatutu d'Autonomía”.

Fonte: Asturies.com