28/10/11

SUATEA pide una RTPA pa la normalización de la llingua del país


El sindicatu Suatea defende al traviés d'un comunicáu la esistencia d'una RTPA de calidá, bien xestionada y al serviciu de les necesidaes de la sociedá y non d'intereses partidistes. Ente les razones qu'espón tán el valir educativu y cultural nel fomentu y normalización de la llingua y cultura asturiana.

La organización afirma que la sociedá del futuru nun s'entiende ensin medios de comunicación. Por eso, señalen que ye necesaria la esistencia d'una RTPA con una programación infantil y xuvenil de calidá que permita aprovechar l'importante potencial pedagóxicu que tienen los medios de comunicación, «con unos convenios de collaboración cola Conseyería y los centros educativos de cara a la produción de programes con utilidá nos centros educativos».

Amás, señalen el valir social na tresmisión de valores que fomenten una sociedá más xusta y el so papel económicu y llaboral. «El pieslle de la RTPA supón mandar a muncha xente a la cai y abocar a la emigración a otra tanta que, güei en día, enllena les aules de los centros formativos qu'hai n'Asturies», señalen.

Por too ello, Suatea esixe l'anulación del recorte qu'afeuta al Ente y apunta al Parllamentu como única vía de solución del conflictu «y d'establecimientu d'una braera RTPA al serviciu de la sociedá y fuera de prautiques chanchulleres y clientelares que nos recuerden a époques anteriores».

Pa finar, el sindicatu fai un llamáu a la participación nes movilizaciones que tán llevando a cabo los trabayadores de la RTPA y denuncia'l tratamientu que tán faciendo los políticos de la situación, «como daños collaterales d'una guerra ente dos exércitos inmersos nuna llucha d'intereses».

Fonte: Les Noticies

2 comentarios:

  1. Fai falta una tele qu'amuese la nuesa cultura na nuesa llingua propia.

    ResponderEliminar
  2. Suatea ye'l únicu sindicatu de clase que siempres da la cara de verdá...

    ResponderEliminar

Los comentarios tán pendientes de moderación. Espublizaránse lo primero dable.