L’ALLA centra na onomástica les XXX Xornaes Internacionales d’Estudiu.
L’Academia de la Llingua Asturiana acaba de facer públicu’l programa de la edición XXX de les sos Xornaes Internacionales d’Estudiu, qu’esti añu van centrase na organización d’un Conceyu Internacional de Toponimia y Antroponimia Asturiana, ente los díes 8 y 10 de payares. Conferencies, presentaciones de llibros y revistes, meses redondes y alderiques van enllenar trés tarde d’acto na Facultá de Filosofía y Lletres de la Universidá d’Uviéu.
El martes 8 a les 16:45 hores van entamar los actos con una ponencia Xavier Terrado Pablo, de la Universidá de Lleida, alredor del “Léxicu románicu arcaicu na toponimia catalana y asturiana”. A les cinco y media Martín Sevilla va falar de “Los topónimos asturianos Taloca / Camoca”. Darréu, Xabiel Fernández García va lleer la comunicación “Oiconimia asturiana. La casa como elementu vertebrador del sistema socio-económicu tradicional”, siguiéndolu Francisco Javier Redondas Maseda, que va falar de los “Rasgos toponímicos nel Suroccidente Astur”.
Dempués de la posa de media tarde, a les 18:45, Pablo Suárez García va dedicar la so comunicación a “La deturpación toponímica n’Asturies”, rematando les comunicación Xosé Lluis García Arias con “Documentación asturiana y toponimia” y Alda Rossebastiano, de la Universidá de Torino, con “La onomástica na Universidá de Turín”.
A les ocho y cuartu van presentase dos revistes. La edición dixital del númberu 105 de Lletres Asturianes y la nueva publicación de l’Academia de la Llingua Asturiana “Ciencies. Cartafueyos Asturianos de Ciencia y Teunoloxía 1, una revista dixital espublizada a comuña cola Universidá d’Uviéu.
Segunda xornada.
La segunda xornada, la del martes 9 de payares, va entamar cola ponencia d’Emili Casanova, de la Universidá de Valencia, “Topónimos y antropónimos valencianos esplicaos al traviés de la onomástica asturiana”. A les cinco y cuartu la tarde, Fernando Bello Garnelo daré llectura a la comunicación “Toponimia y antroponimia na zona de Las Médulas (Lleón)”, siguiendo cola intervención d’Iván Huerga Antuña alredor de “La organización territorial y familiar na conformación de la toponimia y l’antroponimia en Piloña”, un repás a la “Topoantroponimia berciana” per parte de Jesús García y García, y darréu, una posa de quince minutos.
A les 18:30 hores, los periodistes Inaciu Galán y González & Próspero Morán van falar de “La toponimia asturiana nos medios de comunicación: situación y perspeutives”, pa darréu, el lleonés Héctor García Gil tratar dalgunes cuestiones alredor de la exonimia.
A les siete y cuartu Carmen Díaz Alayón, de la Universidá de La Laguna, va fala de “La toponimia de Canaries: rasgos particulares y aportes llingüísticos”, rematando la xornada la presentación del llibru “Toponimia hispánica. Origen y evolución de nuestros topónimos más importantes”, coordináu por X. Ll. García Arias y editáu por Emili Casanova na editorial Denes, de Valencia.
Tercer xornada.
La xornada tercera y cabera d’esti Conceyu Internacional va entamar a les cuatro y media cola ponencia d’Ana Isabel Boullón, de la Universidá de Santiago, alredor de “Cuestiones de onomástica gallega y asturiana”. A les cinco y cuartu, la presidenta de l’Academia de la Llingua Asturiana, Ana María Cano González, va falar de “Más apellíos modernos vinientes de xenitivu”.
A les cinco y media, Xuan Xosé Lajo Martínez comentará dalgunes cuetiones alredor de “La formación y emplegu de los antropónimos en Senabria: nomes oficiales, oficiosos y nomatos”, siguiendo Clara Elena Prieto Entrialgo cola comunicaicón “Nomes comerciales del vinu, la sidra y la cerveza n’Asturies”.
Les últimes conferencies de les Xornaes van dales María Dolores Gordón Peral, de la Universidá de Sevilla, que va falar de les “Güelgues hestóriques de la presencia d’asturianos y lleoneses n’Andalucía Occidental y la Baxa Estremadura y Stefan Ruhstaller de la Universidá Pablo de Olavide con “Los primeros diccionarios etimolóxicos de nome de llugar.
Los interesaos n’apuntase pueden facelo na sede de l’Academia, na cai l’Aguila d’Uviéu. Van recibir un certificáu d’asistencia.
Fonte: Asturnews
Les XXX Xornaes Internacionales d'Estudiu tán perguapes, norabona y llarga vida nel so magníficu castiellu de cristal nos altores filosóficos, romántiques y preciosistes.
ResponderEliminarPero... la esixencia de la oficialidá de l'asturianu según la convocatoria d'una pergrande manifestación bien ruidosa na cai pidicnedo la oficialidá, ¿l'ALLA va facer el di 8, el 9, o'l 10? ¿o la va a faer amás de les Jornaes?
Bien de asturianos y asturianes tamos provecíes a la espera.
Quiciabes nun sía cometíu propiu del tou de l'ALLA emburriar de la manera que tu dices, pero ta claru que si se punxera al mandu de les reivindicaciones seguir biende xente y coyería muncho más prestíu ente la mayoría de la xente, esto ye del pueblu asturianu y non solu ente los "eruditos" que paez que nun-yos interesa nada la oficialidá, que tán perbien asina.
ResponderEliminarYe comprensible, al meyor ye que tienen mieu de perder les poques prebendes o subvenciones qu'esfruten del gobiernu asturianu faciendu usu d'aquel refrán que diz "...y callar ye bonu" por si acasu.
ResponderEliminarMuncho falar y poco aportar... la oficialidá algámase dando rigor a la llingua, que ye precisamente lo que faen esos "eruditos" a los que tan poco respetais, pazguatos!
ResponderEliminarConfórmanse con filosofar y estudiar munchu encerraos na so urna que tá perbién, pero poco lluchar nos medios y na cai pola llingua.
ResponderEliminarSolo con los "eruditos" nun se llogra la oficialidá nin la reconocencia de las llingua asturiana, hai que faer muncha más presión porque llevamos asina bien de tiempu y nun se llogró nada positivu ¿tamos d'alcuerdu o non, Xabi "el sabiu"?
ResponderEliminarChencho T. que sabrás tu de llucha na cai... tolai!
ResponderEliminarTú sabes munchu, a tocín (ranciu) si te unten...
ResponderEliminarNun vos dais cuenta que l'ALLA ta pa da rellumanza a la llingua y nun pa dir dándose sopapos colos políticos, pa ewso ta'l vulgu lléase'l pueblu llanu, pernoble y brutu, esto ye la man d'obra barata.
ResponderEliminarFlacu favor tamos faciendo a la llingua escribiendo babayaes y criticándonos ente toos, d'ALLA nun depende la oficialidá, depende del Estáu español (y demás instituciones), y ésti enxamás va dala, asina que pa qu'echar mas tierra...
ResponderEliminar