L'Asociación de Trabayadores de la Normalización Llingüística alarma sobre les sovenciones pa la normalización

Dende l’Asociación de Trabayadores de la Normalización Llingüística vienen d'amosar nun comunicáu esti vienres "la nuesa preocupación cola “tranquilidá” que ta teniendo’l Gobiernu Asturianu pa resolver les sovenciones d’asociaciones, empreses y particulares pa la normalización social del asturianu. Vemos con munchu esmolecimientu’l fechu de que téamos a día de güei, 6 d’ochobre, (a piques de que fine’l períodu llegal pa resolver los espedientes presentaos) a la espera de la resolución de la Conseyería de Cultura no tocante a les sovenciones pa la normalización social del asturianu y del gallego-asturianu pa empreses, asociaciones y particulares, que se convocaron por resolución d’esa mesma Conseyería’l 14 d’abril del 2011 y publicaes nel BOPA del 29 d’abril del 2011".

Pa l'asociación "ye chocante que tovía nun se sepia nada al respeutu, teniendo como tienen les persones o entidaes beneficiaries d’atropar tola documentación requerida, asina como les muestres escrites o/y fotográfiques que xustifiquen el destín de les perres sovencionaes, si ye que les hubiere, primero del 30 de noviembre, por nun mencionar a les persones y organismos que yá invirtieren eses perres nos proyectos pa los que solicitaren sofitu económicu".

Dende l’ATNLL "preocúpanos que nun se resuelvan nel plazu llegal porque eso supondría la pérdida de les sovenciones, como yá ta pasando n’otres comunidaes con llingua propia".
Estes sovenciones sofiten proyeutos mui importantes pa la normalización social de les llingües d’Asturies. Empreses y asociaciones desenvuelven actividaes de sensibilización social, usen l’idioma como llingua vehicular de la empresa, etc., cumpliendo de llargo col oxetivu pal que se destinen eses ayudes que nun ye otru que prestixar y normalizar los idiomes d’Asturies.

Por too esto, a l’Asociación de Trabayadores de la Normalización Llingüística "prestaría-y enforma que la Conseyería de Cultura materializara l’apoyu a la normalización del asturianu y del gallego-asturianu anunciada na campaña del so partíu y nes sos intervenciones públiques resolviendo aína les sovenciones destinaes a la normalización ente empreses, asociaciones y particulares, tan necesaria pa finar cola diglosia que se vive n’Asturies".

Fonte: Asturnews