La llingua asturiana sigue prohibida en Noreña

PSOE ya IDEAS torguen una moción sobre l’usu del asturianu.

La moción, presentada por Conceyu Abiertu-Noreña pidía que’l plenu conceyil tratare mociones escrites n’asturianu. Tres dos votaciones, nes que se valoraba si incorporala o non al alderique del plenu, foi torgada pol alcalde. Nuna primer votación, dióse un empate a cinco conceyales (1 Conceyu Abiertu, 3 d’IPÑ y 1 de FDLI a favor, 4 del PSOE y 1 d’IDEAS en contra, mientres que PP y FORO con 2 y 1 respeutivamente astuviéronse).
Na segunda votación, repitióse’l mesmu resultáu y, poro, foi l’alcalde Cesar Movilla (PSOE) quien col so votu d’alcalde y presidente del plenu resolvió l’empate votando en contra de l’almisión a plenu.

Na moción de Conceyu Abiertu solicitábase que’l conceyu de Noreña realizara xestiones pa llograr convenios con instituciones como l’Academia de la Llingua Asturiana (ALLA) y la Oficina de Política Llingüística pal asesoramientu y les traducciones o col Institutu Adolfo Posada pa la formación voluntaria de trabayadores, funcionarios y conceyales. Y amás, proponíase aprovechar el trabayu voluntariu de varios conceyales p’aidar al funcionariáu en xeres de torna.

Dende Conceyu Abiertu-Noreña, denuncien l’actitú del alcalde de Noreña y del so partíu (PSOE) al considerar que "anecia en poner torgues al usu de la llingua asturiana nel nuesu conceyu. De primeres, porque prohibe’l so usu, al nun almitir escritos n’asturianu pa ser trataos en plenu municipal, y de segundes, porque nin siquiera almite que pueda aldericase una propuesta, anque seya billingüe, na que se solicita que sí se puedan tratar mociones escrites n’asturianu".

Añaden que "los drechos de los noreñenses asturfalantes siguen suspendíos non solo pola actitú antiasturiana del alcalde y los ediles del PSOE ya IDEAS que gobiernen en Noreña y votaron en contra, sinón tamién pola indecisión del conceyal de Foro Asturias, Inaciu Iglesias, quien, si bien fala n’asturianu nos plenos, astúvose na votación pa que nun se pudiere tratar la moción, y pola indecisión del PP que prefirió tamién l’astención".
Sicasí, Conceyu Abiertu-Noreña tien enfotu en que podrán "esclariar les dubies que tanto FAC como PP y restu formaciones puedan tener al respeutu y aguardamos poder debatir y aprebar a la mayor brevedá esta moción que namás trata de garantizar un drechu elemental".

Conceyu Abiertu-Noreña anuncia que va siguir aportunando "al traviés de tolos calces llegales hasta consiguir que se cumplan los drechos de los asturfalantes en Noreña".

Fonte: Aruelu.com