N’Ast énte les aspiraciones colonialistes sobro l’occidente asturianu.
L’Asociación denuncia una vuelta más les intenciones d’un seutor del nacionalismu gallegu y la responsabilidá de la política galleguista del PSOE-IU na so etapa nel gobiernu’l “Principado”.
Con motivu de la cellebración esta fin de selmana de l’Asamblea Nacional del BNG los medios de comunicación vienen informando de que nella plantegóse la intromisión política nel territoriu asturianu con oxetivos nidiamente imperialistes. Asina en función de la falacia de que los conceyos más occidentales d’Asturies falen gallego y son de cultura gallega pretenden ampliar la cadarma organizativa del BNG al nuesu País. Yá inclusive se quier desendolcar una política de collaboración colos conceyos asturianos col únicu fin d’impulsar un colonialismu cultural como pasu previu a les sos aspiraciones polítiques.
N’Ast considera qu’estos fechos son consecuencia direuta de la política galleguista prauticada pol PSOE-IU na so etapa nel gobiernu del “Principado”, con una tolerancia estrema a les inxerencies gallegues nos conceyos del ocidente asturianu, y cola invención de lo que dieren en llamar gallego-asturianu pa referise a les variedaes llingüístiques del asturianu faláu nesos conceyos.
Asina mientres estos conceyos lleven sufriendo dende hai décades un procesu de desaniciu social, económicu y cultural por mor de la incompetencia, cuandu non complicidá de la clas política “asturiana”, dende Galicia nuevamente pretende revitalizase un proyeutu imperialista pan-gallegu qu’implica una agresión direuta a la integridá identitaria y territorial d’Asturies como País.
Poro una vegada más dende N’Ast reivindicamos y desiximos la fin de les polítiques galleguistes dende’l “Principado” y l’activación de dinámiques qu’afirmen l’asturianidá social y cultural del occidente del País poniendo fin a la so marxinación estructural por mor de l’aplicación de los esquemes centralistes del nacionalismu españolista a la rialidá asturiana.
* Asociación Cultural N'Ast.
Fonte: Infoasturies
