Los Conceyos Abiertos vuelven a Noreña tres les elleiciones

L'agrupación d'electores celebra un conceyu abiertu el próximu llunes nel Antiguu Depósitu de l'Agua

   Conceyu Abiertu por Noreña va decidir el so posicionamientu pa la constitución de la nueva corporación nuna asamblea pública y abierta a la participación, depues de qu'esti día, l'agrupación d'electores ficiera anuncia de la celebración d'un conceyu abiertu el próximu llunes 8 de Xunu nel Antiguu Depósitu de l'Agua.

  Conceyu Abiertu por Noreña siguiendo col so funcionamientu asambleariu y abiertu va decidir el so posicionamientu de cara a la constitución de la nueva corporación onde se va escoyer alcalde o alcaldesa de Noreña.

   L'agrupación d'electores noreñesa convocó pal próximu llunes día 8 un conceyu abiertu, xunta a la que pueden asistir tolos vecinos y vecines, pa decidir el so posicionamienyu nel Plenu, onde esti mandatu va cuntar con dos representantes tres ser la tercer fuerza política más votada. Nesta asamblea va informase de la xunta caltenida con Independientes por Noreña, la otra agrupación d'electores noreñesa, que ye la única fuerza político que, enagora, púnxose en contactu con Conceyu Abiertu por Noreña. Dende Conceyu Abiertu per Noreña animen a los y les noreñeses a participar el llunes a les 21:00 hores na Aula de talleres del Antiguu Depósitu de l'Agua y recuerda que, dende la so formación en 2011, lo decidío nos conceyos abiertos ye lo que los representantes treslladen al Plenu exercitando asina la democracia directa y la participación popular na política municipal ensin cortapises.                                                                                                  Fonte: asturnews.com

PSOE y PP torguen en Noreña la tramitación d'una ordenanza d'usu del asturianu

    L'Ayuntamientu de Noreña volvió a torgar ayeri l'estudiu d'una ordenanza pal usu de la llingua asturiana nel conceyu. PSOE y PP votaron xuntos pa refugar la urxencia -y polo tanto la discusión na sesión d'ayeri- de la propuesta presentada por Conceyu Abiertu pa regular l'usu de la llingua nel municipiu. FDLI, IPÑ, Conceyu Abiertu y Foro votaron a favor mientres qu'IDEAS abstúvose. El conceyal Pablo Pérez Fonseca, que denunció la represión llingüística nel conceyu, defendió la so propuesta d'ordenanza pa garantizar el derechu a espresase n'asturianu. L'alcalde del conceyu, César Movilla, refugó la urxencia de la propuesta porque "hai  problemes  más  importantes".

Plenu 27-02-2014. Moción d'urxencia de Conceyu Abiertu sobre l'usu del asturianu (vía InfoNoreña)

   Nun ye la primer vegada que l'aprobación d'unes ordenances d'usu del asturianu llega alAyuntamientu de Noreña. En xunetu de 2012, el plenu del conceyu refugó colos votos en de PSOE yá Ideas aprobar la propuesta de Conceyu Abiertu y que namái cuntó col sofitu del conceyal d'esi partíu y el representante del Frente de la Izquierda.

   Tamién ye frecuente la torga d'escritos pol equipu de gobiernu local por tar n'asturianu. Va un mes, l'Ayuntamientu obligó al Coleutivu de Paraos y Precarios de Siero y Noreña a presentar un documentu "en castellano, la lengua oficial de la Comunidad Autónoma". Fonte: Qué ye ho!

L'Academia conderga la reiterada desconsideración del Alcalde Noreña pa col emplegu de la llingua asturiana

L’Academia de la Llingua Asturiana (l'ALLA) vien siguiendo con esmolición los continuos casos de discriminación llingüística que tán sufriendo los ciudadanos de Noreña a lo llargo d’estos años pola actitú del so alcalde, César Movilla, pa col usu de la llingua asturiana na vida diaria del conceyu. La cabera decisión del alcalde de refugar la petición d’un coleutivu de “Paraos y Precarios de Siero y Noreña” por tar redactada n’asturianu, ye una vegada más una falta de respetu hacia la llingua y la cultura asturiana, ya inda más, hacia’l propiu derechu de los ciudadanos del conceyu a usar la llingua d’Asturies.     N’efeutu, refugar el mentáu escritu cola xida de tener que tar “redactada en castellano, lengua oficial de esta Comunidad Autónoma”, da cuenta perfeutamente del allugamientu, oxetivamente anti-asturianu, del Sr. Alcalde y del so desconocimientu del marcu xurídicu qu’ampara’l derechu de los ciudadanos al llibre usu de la llingua asturiana. L’Academia de la Llingua Asturiana treslladó a la FSA-PSOE (partíu al que pertenez l’alcalde) la so más fonda preocupación y perplexidá énte esti nuevu atropellu a la llingua asturiana y encamentó-y poner igua a una actuación que, con toa xusticia, podría calificase de pre-constitucional y antiestatutaria.    Fonte:  Asturnews

Movilla niega l'usu d'un llocal municipal a un coleutivu de paraos por solicitalo n'asturianu

     L’alcalde socialista de Noreña, César Movilla, torna a protagonizar una falta de respetu a la ciudadanía por mor de la so llingua. Nesta ocasión niega l’usu d’un llocal municipal a un coleutivu de paraos por solicitalo n’asturianu.

    “En relación a su escrito de fecha 13/12/13, deberá ser redactado en castellano, lengua oficial de esta Comunidad Autónoma”  foi la contestación breve del alcalde nuna carta remitida a Mariu Arbesú, representante del Coleutivu de Paraos/es y Precarios/es Siero-Noreña, firmada por Movilla con fecha del 26 d’avientu. Esta asociación de formación nueva pretendía solicitar l’usu d’un llocal municipal p’aconceyar tolos miércoles en Noreña, recibiendo la refuga d’esti políticu de la FSA-PSOE. “Pensábemos que quiciabes nun tendríamos un sofitu abondu de les instituciones públiques, pero lo que nun esperábamos yera atopanos con un portazu na cara de buenes a primeres.

La solicitú

    Ye un insultu a tolos paraos y paraes de los conceyos de Siero y Noreña nun atender los sos pidimientos por una cuestión formal relativa a la llingua que s'use pa presentar una instancia y paeznos una falta de sensibilidá absoluta del alcalde de Noreña escontra los paraos. Un alcalde asina tendría de dimitir darréu y l'oposición tendría d'esixir la so dimisión porque nos demuestra que nun ta al altor de les circunstancies y paez desconocer la realidá social y económico del propiu conceyu que rixe, onde hai más de 500 paraos y un porcentaxe de desemplegu cimeru al 20 por cientu y onde, a éstes,  l'asturianu ye la llingua tradicional, colo cual nun entendemos como puede negase el so usu a los ciudadanos”, espliquen nun comunicáu.

    Esta situación llevó a esti coleutivu a refugar la posibilidá de siguir les instrucciones de Movilla y a celebrar los sos aconceyamientos en Siero, en concreto nel salón d'actos del Llar del Pensionista d'El Berrón, onde mañana va tener llugar la presentación oficial de la organización a les 19 hores. Paraos y emplegaos en trabayos precarios y temporales de la zona deciden dar forma a esti proyeutu “p'analizar y buscar una respuesta coleutiva al problema del paru y la precariedá. A un problema coleutivu tenemos que buscar soluciones colectives”, espliquen al tiempu que recuerden qu’en Noreña hai más de 500 desemplegaos y, en Siero, 5.000. Ente los oxetivos de l’asamblea destaca l’enfotu n’implicar a les instituciones a iguar esti problema, la esixencia de polítiques que frenen la emigración forciada de xente mozo y la puesta en marcha d’esperiencies d’autoemplegu y cooperativismu, ente otros asuntos.

Iniciativa pol Asturianu pide la so dimisión.
     Tres conocer la postura del alcalde de Noreña, reincidente n’ataques a la llingua asturiana dende la so posición na Casa Conceyu, Iniciativa pol Asturianu reclamó la so dimisión. “Yá intentó prohibir  l'usu del asturianu n'otros ámbitos, como'l Plenu del Conceyu de  Noreña”, polo qu’esixe a la FSA-PSOE que tome midíes “contra esti alcalde antidemocráticu que reprime a  ciudadanos por querer usar la so llingua propia, tal y como recueye  como drechu la Llei d'Usu del Asturianu, vixente dende 1998”. Respeuto al fechu en concretu que denuncia’l Coleutivu de Paraos/es y Precarios/es Siero-Noreña, señala que “ye un ataque a la dignidá y la igualdá de los  ciudadanos asturianos que deciden en llibertá espresase na so llingua propia”, amás d’una aición que va “contra la llexislación vixente”.     Fonte:  Asturies.com.

Presentación del proyeutu editorial de l’Asociación Cultural N’Ast y N'Ast 9 en Noreña

Preséntase en Noreña esti vienres la revista "N'Ast. Cartafueyos d'Ensayu", qu'asoleya l'Asociación Cultural N'Ast coincidiendo cola espublización del so novenu númberu nesti mes d'avientu. El vienres 3 de xineru Noreña va acoyer una charra al rodiu del proyeutu editorial de l’Asociación Cultural N’Ast, la revista “N’Ast. Cartafueyos d’Ensayu”, na que van intervenir el direutor de la espublización asina comu otros miembros del coleutivu que desplicarán cómu nació, en qué consiste, qué oxetivos tien y cómu se pue participar nella. L’actu, organizáu a comuña cola Asociación Cultural InfoNoreña, va tener llugar na sala d’aconceyamientos del Vieyu Depósitu del Agua (Plaza El Rebollín, s/n; xunto a La Torre’l Reló), a les 20’00 hores, y el mesmu va aprovechase pa presentar el númberu 9 de “N’Ast. Cartafueyos d’Ensayu”, polo que se cuntará, amás, cola presencia de dellos de los autores que participen na espublización. Nesta novena entrega de los cartafueyos, pa los que por primer vegada nun se cuntó col sofitu de la Conseyería Cultura, recuéyense los trabayos “Remanar la hestoria d’Asturies” (Xuan Porta Allende); “Totalitarismu (os): notes sobre les sos carauterístiques cimeres y la so aplicación al facismu español” (Natalia Fernández Jimeno); “La llucha de clases na Corona de Castiella” (Eduardo Abad García y Sergio Alonso Pampliega) y “El republicanismu federal na Asturies decimonónica” (Javier Cubero de Vicente). La revista, que tien un llargor de 118 páxines y un preciu de venta al públicu de 10 €, yá ta a la venta nes meyores llibreríes del país, anque tamién se pue mercar al traviés del corréu lletrónicu nast.oficialida@gmail.com. Fonte: Infoasturies

La Sidra asoleya ‘Noreña y la sidra’, estudiu de Martínez Fernández ganador del Emilio Trabanco 2012

Pablo R. Guardado Los asturianos yá pueden disfrutar del estudiu d’Antonio Martínez Fernández ‘Noreña y la sidra’. Esta obra, ganadora del Premiu Emilio Trabanco na so tercer edición, fai un repás a la historia sidrera del conceyu dende’l sieglu XVIII hasta’l XX. “‘Noreña y la sidra’ ye una aportación novedosa a la historiografía sidrera asturiana, y a la llocal. Una primer hestoria sidrera de Noreña, que quier contribuyir a los estudios socioculturales asturianos y a ser preséu pa investigaciones asemeyaes”, informen dende l’equipu editorial de la revista La Sidra, qu’añade que’l trabayu de Martínez Fernández, vecín de Noreña nacíu nel 1980, “surde d’una investigación afitada nel trabayu archivísticu, hemerográficu y bibliográficu, a la que se-y amiesta material fotográficu, publicitariu y d’ellaboración propia”. Llicenciáu n’Historia con un máster n’Análisis Sociocultural pola Universidá d’Uviéu, l’autor pretende con esti ensayu “emponderar una industria escaecida nel conceyu, la de la sidra, que tuvo un pesu relevante na historia de Noreña”. En concreto, l’historiador estudia la época que va dende mediaos del sieglu XVIII hasta finales del sieglu XX, momentu nel que se vive un procesu de decadencia de la industria sidrera. Na obra, que se centra nel sector sidreru, en xeneral, y na industria sidrera, en particular, Martínez Fernández tien en cuenta les connotaciones socioculturales de la sidra n’Asturies y la importancia del chigre y el llagar como espacios d’ociu y sociabilidá. L’esfuerciu del de Noreña nesti trabayu permitió-y algamar el Premiu d’Ensayu Emilio Trabanco qu’entama La Sidra en collaboración de Sidra Trabanco y que tien como oxetivu gallardonar a los autores qu’estudien sobre’l mundu sidreru. El ganador de la primer edición foi Fernán Gonzali gracies al so ‘Diccionariu sidreru’, mientres qu’Arantzazu Ortiz llevó la segunda pol so estudiu ‘La sidra y la manzana asturiana. De la tradición al arte’. Con esta espublización, Martínez Fernández suma’l so segundu llibru. El primeru foi ‘Exiliu asturianu (1937-1939)’. Presentación, el miércoles Esti miércoles va tener llugar la presentación de ‘Noreña y la sidra’ coincidiendo coles fiestes del Ecce Homo que ta viviendo esta población del centru del país. L’actu va tener llugar, a les 19.30 hores, na Casa Cultura Severo Ochoa, y va contar con una amuesa gastronómica de la cocinera llocal Estefanía Ferreras consistente en pinchos cola mazana y la sidra como protagonistes. Nel entamu d’esta actividá collaboren la Sociedad Noreñense de Festejos y l’Asociación Cultural InfoNoreña. Fonte: Asturies.com

L’alcalde socialista de Noreña sigue prohibiendo l’usu del asturianu

Pa Conceyu Abiertu “esta ye la potenciación de la normalización social del asturianu que prometía’l PSOE nel so programa elleutoral”

Documentu nel que Movilla torga l'usu del asturianu

L’alcalde de Noreña, Cesar Movilla (FSA-PSOE) ye yá conocíu pol so odiu contra l’asturianu, que lu llevó en más d’una ocasión a tratar de prohibir el so usu nel plenu y nes actividaes del so Conceyu. Agora dase un nuevu casu de represión llingüística protagonizáu por él. Cesar Movilla niégase a tramitar dos solicitúes de documentación de Conceyu Abiertu por Noreña con fecha d’entrada nel rexistru del 17 y 21 d’esti mes, por tar escritos n’asturianu.

Trátase en dambos casos de testos cenciellos nos que se pide documentación, el día 17 un llistáu con documentación en xeneral de dellos temes (Ponte del Rebalde, actes de plenos celebraos, les normes subsidiaries que sustitúin al PXOU, los presupuestos de 2012, el borrador de los de 2013... Nel casu del testu del pasáu 21 trátase d’una copia de los antecedentes de les comisiones celebraes el xueves pasáu, día nel que, según espliquen dende Conceyu Abiertu “entrégasenos una carta de contestación” onde l’alcalde comunica que “previo a su tramitación deberá presentarlos en lengua castellana”.

Dende CA espliquen que “los testos son dafechamente entendibles y cenciellos, simplemente se trataría de dar el so consentimientu pa que se facilite al nuestru Grupu Municipal una copia de los documentos pidíos”.

Dende la formación política camienten que “pese a que la postura antiasturiana del alcalde ye bien conocida y ta suficientemente documentada, paeznos que nesta ocasión tamién se trata d’una nueva esculpia pa torgar un normal accesu a la información, como venimos denunciando tolos grupos de la oposición dende l’aniciu de la llexislatura”.

La formación del conceyu condal afirma que “queda claro que nesta ocasión axúntense dos de les ‘polítiques estrella’ d’esti mandatu de Movilla: Torgar tolo posible’l llabor de los conceyales de la oposición y la represión constante al drechu a utilizar l’asturianu”, lo que pa CA dexa a les clares que “la Noreña de Movilla tien una perbaxa calidá democrática”.

Pa solucionar estos casos de represión llingüistica y de prohibición del asturianu, pa Conceyu “faise necesario reaniciar la busca d’una formula que permita aprobar una midida nel ámbitu municipal, que solucione esta grave discriminación que prohibe de facto, por causa de la nula voluntá de los gobernantes, l’usu escritu del asturianu”.

Dende Conceyu Abiertu sorrayen que “l’actitú del alcalde del PSOE choca col propiu programa de la llista elleutoral qu’encabezaba”. Y ye que nel puntu 63 del programa elleutoral comprométense colos vecinos y vecines a “Potenciar la normalización social del asturiano”. Dende CA prestaría-yos saber “qué entiende’l PSOE y Movilla por normalizar l’asturianu”, y recuerden que “podríen empezar por dexar utilizalu…”.

Dende Conceyu Abiertu califiquen el puntu 63 del programa de “brinde al sol elleutoralista, cuando nin si quiera pidieron les sovenciones al Principáu, precisamente pa la normalización social del asturianu, o nin esiste partida nenguna pa ello nel presupuestu”, dalgo que, esperen “debería solucionase na redaición del d’esti añu”.

Fonte: Asturnews

L'alcalde de Noreña torga falar n'asturianu a un conceyal

L'alcalde de Noreña pide a un conceyal que nun use l'asturianu.

Nel Plenu Municipal de Noreña d'esti 27 de setiembre, l'asturianu, y concretamente la palabra anguaño, foron protagonistes de la sesión. El motivu foi una pregunta del conceyal de Conceyu Abiertu, Pablo Pérez, al Gobiernu municipal sobre una petición fecha pol so partíu de poner una valla nel apeaderu de FEVE en Noreña, «dende'l pasu cebra hasta la qu'hai anguaño». Nesi momentu, Pérez foi interrumpíu por otra conceyala y pol alcalde de Noreña, César Movilla, que dixo qu'había muncha xente que nun lo entendía, «polo que-y pidiría qu'usara'l castellanu», dalgo a lo que se negó'l conceyal asturianista.

Na polémica tamién intervieno'l conceyal de Foru Asturies, Inaciu Iglesias, que-y esplicó al alcalde'l significáu de la palabra y la so equivalencia cola castellana hogaño. Otra manera, rogó-y a Movilla que fixera usu del diccionariu que-y regaló n'agostu del 2011, depués de que l'alcalde de Noreña retirara una moción de Conceyu Abiertu por tar redactada n'asturianu. Un fechu que recibiera les crítiques de l'Academia de la Llingua y que fixo que Movilla fora gallardonáu col madreñazu de los Premios Andrés Solar de la Xunta pola Defensa de la Llingua Asturiana.

Depués de la interrupción, Pablo Pérez siguió cola so intervención traduciendo ironicamente delles palabres del asturianu al castellanu. Al acabar, pidió «qu'al igual que yo intento mantener el respetu hacia'l restu de compañeros y hacia'l publicu, tolos demás faigan lo mesmo».

Fonte: Les Noticies

Noreña va debatir les ordenances sobre l'usu del asturianu

Noreña va debatir les ordenances sobre l'usu del asturianu que propón Conceyu Abiertu

El Plenu del Conceyu de Noreña va debatir esti xueves, 26 de xunetu, la propuesta d'ordenanza pal usu de la llingua asturiana que presentó Conceyu Abiertu por Noreña a finales de mayu. D'entós p'acá, los grupos políticos tuvieron oportunidá d'estudiar el testu y presentar aportaciones a una propuesta que, a xuiciu de Conceyu Abiertu, ye «asumible perfectamente» por toles formaciones con representación nel Conceyu y «axustada a la llegalidá vixente».


La formación asturianista pretende que la norma sía aprobada por unanimidá de los grupos porque, na so opinión, «la llingua ye patrimoniu de tolos noreñenses, independientemente de la so ideoloxía». Por esti motivu, l'aprobación d'una norma local que reconoza los drechos llingüísticos de tolos ciudadanos, que regule'l so usu nel Conceyu y incluya midíes de promoción y normalización, como ye la que se propón, diba ser, en palabres de Conceyu Abiertu por Noreña, «amás d'un actu de dignificación de la llingua y cultura asturianes, un avance democráticu necesariu».

El testu que se va debatir empieza col reconocimientu del drechu de tolos vecinos del Conceyu de Noreña a usar l'asturianu y que les comunicaciones –orales o escrites– cola alministración local tengan la mesma validez que si foren en castellanu. Tamién s'afita la obligación del Conceyu de redactar toles comunicaciones, notificaciones y documentación alministrativa –como les actes del Plenu y les comisiones informatives– tanto n'asturianu como en castellanu, inclusive nes rellaciones con otres Alministraciones, como la central del Estáu o la Xunión Europea .

Ente les midíes de promoción y normalización del idioma, la propuesta d'ordenances recueye la publicación en castellanu y asturianu de tola publicidá que faiga'l Conceyu, l'usu del asturianu polos cargos públicos n'actos institucionales, la valoración del conocimientu de la llingua propia nes convocatories públiques d'empléu que supongan atención a la ciudadanía o la organización de cursos pa deprender y perfeicionar l'asturianu destinaos a los trabayadores municipales.

Fonte: Les Noticies

El concursu de rellatos curtios “Cenciella” tien abiertu plazu hasta fin de mes

El primer concursu de rellatu curtiu «Cenciella», entamáu pola asociación xuvenil Naurenia, entra na so fase final. Los interesaos en participar nel certame,dirixíu a mozos nacíos ente 1982 y 1996, dambos inclusive, pueden presentar lossos rellatos na Casa de Cultura de Noreña hasta les 13.30 hores del 31 de mayu,na modalidá en papel, y hasta les 23.59 d'esi mesmu día, na modalidá Twitter,venceyándolos al perfil @Lituiteratura. El premiu pal ganador de cada modalidá ye de 250 euros.

Fonte: asturnews

Conceyu Abiertu propón una Ordenanza pal usu del asturianu en Noreña

El conceyal d’esta formación nel conceyu condal presentó una propuesta al restu de partíos col oxetivu d’intentar que s’apruebe por unanimidá.

Conceyu Abiertu por Noreña presentó-yos al restu d’organizaciones polítiques del conceyu (PSOE, IPÑ, PP, FDLI, FAC ya IDEAS) una propuesta d’Ordenanza municipal pal usu de la llingua asturiana nel Conceyu de Noreña pa que la puean estudiar y facer propuestes de cara a llevala a los órganos de decisión del conceyu nes próximes selmanes. La propuesta tien como referencia otres ordenances d’usu del asturianu vixentes anguaño n’otros conceyos asturianos.

Conceyu Abiertu por Noreña espera poder aconceyar con representantes de toles organizaciones, “de cara a recoyer les sos impresiones y propiciar l’aprobación d’una ordenanza por unanimidá”, espliquen. D’aprobase, esta sedría la primer vegada que Noreña se dote d’una normal llocal sobre la llingua propia del conceyu, se reconozan los drechos llingüísticos de tolos vecinos y vecines, se regule l’usu nel ayuntamientu y dalgunes midíes de promoción y normalización. Ye por ello que dende Conceyu Abiertu albidre que “sedría preferible aprobalo tolos grupos, siendo amás la llingua patrimoniu de tolos noreñenses independientemente de la so ideoloxía”.

Mientres los últimos meses, espliquen, “en Conceyu Abiertu por Noreña venimos estudiando les ordenances sobre l’asturianu vixentes n’otros conceyos d’Asturies, de cara a llevar alantre esti puntu del nuesu programa elleutoral”.

Recuerden la necesidá d’estes ordenances con un casu asocedíu va unos meses, cuando pa Conceyu Abiertu “volvió a vese claramente nel conflictu llingüísticu que se vivió en Noreña a finales del añu pasáu”, en referencia a la negativa del alcalde a almitir mociones n’asturianu y el rechazu a una propuesta posterior de solución provisional, que presentaron dende Conceyu Abiertu.

Aquella polémica fizo que l’Academia de la Llingua Asturiana amosara’l so descontentu pola actuación del alcalde, xunto a otres organizaciones de defensa de la llingua y cultura asturianes.

Conceyu Abiertu alvierte que presenta “unes ordenances axustaes a la llexislación vixente y asumible por tolos grupos municipales y pol propiu gobiernu municipal (PSOE-IDEAS)” y recuerden que’l PSOE “tien aprobao ordenances d’esti tipu n’otros conceyos asturianos”, recordando amás que “les ordenances nun supondríen un coste económicu al Conceyu, dependiendo gran parte de les actuaciones de la voluntá política y que tres aprobala, diría poniéndose en práutica paulatinamente, según los medios disponibles”.

Pa la formación nacionalista “l’aprobación de la ordenanza, amás de ser un actu de dignificación de la llingua y cultura asturianes, supón un necesariu avance democráticu”.

Fonte: Asturnews

Conceyu Abiertu por Noreña denuncia que nun se cumple la toponimia oficial

Otra vuelta, problemes col cumplimientu de la toponimia oficial n'Asturies. Énte la instalación de señalización toponímica nel enllaz de Noreña cola Autovía Minera Conceyu Abiertu por Siero y Conceyu Abiertu por Noreña denuncien que “nun se respeta la toponimia oficial, dándose'l casu que la oficial “Ferrera” se convierte en “La Ferrera”, apaeciendo amás “La Ferrera de Abajo” y “La Ferrera de Arriba”, en llugar de les denominaciones oficiales “Ferrera de Baxo” y “Ferrera de Riba””. Los miemros de CA recuerden que la toponimia tradicional ye la oficial del Conceyu de Siero dende 2009, cuando s’espublizaó nel BOPA’l correspondiente decretu.
Pa CA ye “surrealista” que más de dos años más tarde nun se señalice respetando la toponimia oficial, “llegando al esperpentu d'inventar topónimos como “La Ferrera”, espliquen. Recuerden que nel casu d’esti topónimu, parte “pertenez al Conceyu de Noreña, siendo oficial el topónimu dende 2007”, cuando s’espublizó’l decretu de toponimia del conceyu condal.
Conceyu Abiertu por Noreña, que cunta con representación nel Plenu Municipal va solicitar que'l Conceyu de Noreña tome la iniciativa y pida que se respete, como sedría lóxico, la toponimia oficial nes instancies que correspuendan y que contacte col Conceyu de Siero de cara a faer causa común. Fadrálo yá en forma de ruegu nel Plenu que se celebra mañana, xueves 26.
Amás d'esto, recuerden que “na señalización del enllaz esisten erros más graves si cabe y los cartelos indicativos nun recueyen la forma oficial de la capital del Conceyu de Siero, “La Pola Siero”, señalizándose erroneamente “Pola de Siero”.
Conceyu Abiertu califica de “chambonada” la señalización y considera que los Conceyos tienen que tomar cartes nel asuntu de cara a que l'enllaz recueya la señalización correcta. Recuerden que “quiciabes si los responsables municipales tuvieren sollertes al desenvolvimientu de les obres y tuvieren comenenciudos na bona señalización de les llocalidaes, agora nun taríamos énte esta aberración, qu'amás xeneró indignación ente los vecinos noreñenses y sierenses de Ferrera”.

Fonte: asturnews

N'Ast escontra "l'actitú cerrisca" del PSOE de Noreña col asturianu

Pa l'asociación el PSOE non solo torga l'usu del asturianu, sinón que tamién prohibe aldericar sobre ello.

Desplica N'Ast que "Como rempuesta al autoritarismu caciquil que prauticaron recientemente nel ayuntamientu de Noreña'l PSOE y el so alcalde, Cesar Movilla, haza l'usu de la llingua del País, dende Conceyu Abiertu presentóse una moción billingüe solicitando que'l plenu municipal pudiera tratar mociones escrites en llingua asturiana.Por embargu de manera sosprendente la incorporación a alderique nel plenu d’esta propuesta foi torgada en base a que nun tenía calter d'urxencia".

Continúen afitando que "Na moción de Conceyu Abiertu solicitábase que'l Ayuntamientu de Noreña realizara xestiones pa llograr convenios con instituciones como l'Academia de la Llingua Asturiana (ALLA) y la Oficina de Política Llingüística p'asesoramientu y traducciones o l'Institutu Adolfo Posada pa la formación voluntaria de trabayaores, funcionarios y conceyales".

Poro, dende N'ast quieren "denunciar qu'una vegada más el PSOE de Noreña vuelve amosanos el so braeru calter como organización fondamente antiasturiana y antidemocrática, torgando non solamente l'exerciciu d'un drechu humanu y civil, sinón tamién l'alderique públicu sobre la posibilidá del so usu institucional".

Fonte: Infoasturies

L'ALLA conderga la marxinación al asturianu del conceyu de Noreña

L’Academia de la Llingua Asturiana, enterada de la decisión del alcalde de Noreña, D. César Movilla, de refugar y retirar del orde del día del Plenu de güei una moción del grupu políticu “Conceyu Abiertu”, sobro la ponte ferroviaria de Rebalde (patrimoniu industrial asturianu de mediaos del sieglu XIX) por “tar redactada n’asturianu”, quier treslladar a la opinión pública asturiana la so más fonda esmolición énte la falta de respetu qu’amuesa’l rexidor noreñense hacia la llingua y la cultura asturiana ya, inda más, hacia’l propiu drechu de los ciudadanos del conceyu a usar la llingua d’Asturies.

N’efeutu, refugar la mentada moción cola xida de problemes “reglamentarios” da cuenta perfeutamente del allugamientu, oxetivamente anti-asturianu, del Sr. Alcalde y tresllada a la sociedá asturiana, una vegada más, la necesidá de d’atayar situaciones como les descrites pente medies del reconocimientu del asturianu como llingua oficial n’igualdá de condiciones que’l restu de llingües del Estáu.

L’Academia de la Llingua Asturiana ye sabedora que l’afitamientu de la oficialidá requier del consensu mayoritariu na Xunta Xeneral del Principáu y, darréu d’ello, de la reforma del Estatutu d’Autonomía d’Asturies. Poro, píde-y al Gobiernu del Principáu que llidere esi procesu de reconocimientu xurídicu del asturianu y qu’actúe (mentantu esa figura llegal nun seya plenamente efeutiva) afalando calces de dignificación y de planificación llingüística que, acordies col marcu alministrativu vixente, enconten l’usu del asturianu en toles instituciones del País.

Fonte: academiadelallingua.com

Moción de Conceyu Abiertu por Noreña favoratible al drechu a emplegar l'asturianu

Como parte del compromisu de tresparencia del movimientu popular Conceyu Abiertu, la so organización nel conceyu de Noreña apurrió a esti mediu d'información alternativa la moción torgada polos partíos PSOE ya IDEAS, qu'ufiertamos darréu a los nuesos llectores:
_____________________________________________________
PABLO PÉREZ FONSECA, conceyal de CONCEYU ABIERTU POR NOREÑA (C.A. NOREÑA) en nome y representación de CA NOREÑA y nel suyu propiu diz:

1. El derechu al emplegu de la llingua propia y a nun ser discrimináu por mor d’ello, vien proclamáu con calter xeneral, pente otres normes, na Declaración Universal de los drechos Humanos (arts. 2, 7 y 19); nel Pautu Internacional de Drechos Civiles y Políticos (arts. 2, 26 y 27), ratificáu por España en data 13 d’abril de 1977 (BOE de 30 d’abril); nel Conveniu Européu de Drechos Humanos (arts. 10 y 14), ratificáu por España en data 26 de setiembre de 1979 (BOE de 10 d’ochobre); na Carta de los Derechos Fundamentales de la Xunión Europea (arts. 11, 20, 21 y 22), asoleyada nel Diariu Oficial de les Comunidaes Europees de 18 d’avientu de 2000; nel Estragal y artículos 3 y 14 de la Constitución española; nel conxuntu del articuláu de la Carta Europea de les Llingües Rexonales o Minoritaries; y, no que cinca a la llingua asturiana, na Llei del Principáu d’Asturies 1/1998, de 23 de marzu, d’usu y promoción del bable/asturianu.
Acordies coles mentaes lleis trátase d’un drechu percimeru, irrefugable ya imprescriptible de los que la doctrina vien afitando que la so vulneración ye considerada como “daqué especialmente odioso y despreciable por afeutar a la dignidá de les persones”.

2. Nes rellaciones ente ciudadanos, el conflictu llingüísticu n’Asturies resuélvese davezu ensin reñes nin escandaleres porque cualquier persona alfabetizada en castellán, pero asitiada n’Asturies, ye quien pa calletrar el sentíu y conteníu d’un testu dichu o escritu n’asturianu. Con muncha más razón si pa ello cunta con tiempu pa reposalu y medios n’abondo pa consultar el significáu d’una pallabra (un cenciellu diccionariu) o, mesmamente, dir a una torna dixital (programa ESMENA, fechu pola Universidá d’Uviéu y colgáu na rede pa emplegu de baldre), erbíes que tien el conceyu de Noreña a disposición del Alcalde, los Conceyales y de los sos funcionarios.
Por embargu, cuando les rellaciones son de la ciudadanía col poder políticu provóquense dacuando encaramientos y litixos porque, llaceriosamente, entá s’atopen xeitos intransixentes y autoritarios pente dellos cargos y funcionarios públicos.
Xustamente eso, l’actitú intransixente y autoritaria del Alcalde de Noreña escontra la presentación d’una moción redautada en llingua asturiana, qu’entendió perfechamente, provocó una indignada rempuesta social que percorrió tolos medios de comunicación espardiendo perdayuri una mala imaxe del conceyu.
Pa cortar pela freba con esta triba situaciones solicitamos se trate nel prósimu plenu la moción que vien darréu y, nel so casu el plenu apaute:

“Primeru.- Alvertir al Alcalde de que la voluntá del Plenu ye la de cumplir la llei facilitando l’emplegu por ciudadanos, funcionarios y cargos públicos de la llingua asturiana na so rellación coles autoridaes o funcionarios del conceyu y que, nesi sen, fai un llamáu xeneral al entendimientu y la tolerancia.

Segundu.- A talu efeutu encamienta al Alcalde qu'entame col llabor de facilitar a tolos emplegaos municipales los preseos amañosos p’atender comunicaciones verbales o per escritu feches en cualesquier de les dos llingües falaes nel conceyu y pa ello:

a) Que con sofitu no establecío nel artículu 8 de la Llei del Principáu d’Asturies 1/1998, solicite del Sr. Conseyeru de Cultura del Principáu d’Asturies los medios necesarios pa la torna de tolos testos mentaos nel Real Decretu 1111/1979, de 10 de mayu, ente les llingües asturiana y castellán, seya pente medies d’un Serviciu de Normalización Llingüística, propiu o en mancomún con otros conceyos, o per conveniu específicu que garantice l’asistencia de la Unidá de Torna del Serviciu de Política Llingüística al conceyu de Noreña.

b) Col mesmu sofitu llegal, qu’empobine pidimientu al Sr. Conseyeru de Facienda y Seutor Públicu pa qu’al traviés del Institutu Asturianu d’Alministración Pública Adolfo Posada puedan formase les autoridaes y emplegaos del conceyu de Noreña a los que-yos pete afondar na conocencia de la llingua asturiana, col compromisu pela parte de nós de que sedrá valorada nes oposiciones y concursos d’entrada o promoción na plantía municipal.
c) Que contaute cola Sra. Presidenta del Academia de la Llingua Asturiana pa conocer los sofitos que la máxima institución llingüística del país-y pudiere apurrir na torna d’escritos y formación de los emplegaos públicos.

Terceru.- Fasta que frutien los apautamientos de suso, con abellugu no establecío nel artículu terceru, separtáu 2, del Real Decretu 1111/1979, de 10 de marzu, pidimos-y a los conceyales don José Aurelio Castaño Castaño, don Inaciu Ilesias Fernández y don Pablo Perez Fonseca, que s’encarguen transitoriamente d’asistir al funcionariáu nos vertíos que seyan necesarios d'una a otra llingua, castellana y asturiana, garantizando asina, ensin nengún aguardie, l’exerciciu del drechu de ciudadanos y conceyales al emplegu de la llingua asturiana énte esti Conceyu y garantizando qu’al menos bandos y edictos s’asoleyen n’asturianu y que les actes y resoluciones del Plenu recueyan el testu n’asturianu cuando asina se presente dichu testu énte’l mesmu.

En Noreña a 29 setiembre de 2011

Fonte: Infoasturies

La llingua asturiana sigue prohibida en Noreña

PSOE ya IDEAS torguen una moción sobre l’usu del asturianu.

La moción, presentada por Conceyu Abiertu-Noreña pidía que’l plenu conceyil tratare mociones escrites n’asturianu. Tres dos votaciones, nes que se valoraba si incorporala o non al alderique del plenu, foi torgada pol alcalde. Nuna primer votación, dióse un empate a cinco conceyales (1 Conceyu Abiertu, 3 d’IPÑ y 1 de FDLI a favor, 4 del PSOE y 1 d’IDEAS en contra, mientres que PP y FORO con 2 y 1 respeutivamente astuviéronse).
Na segunda votación, repitióse’l mesmu resultáu y, poro, foi l’alcalde Cesar Movilla (PSOE) quien col so votu d’alcalde y presidente del plenu resolvió l’empate votando en contra de l’almisión a plenu.

Na moción de Conceyu Abiertu solicitábase que’l conceyu de Noreña realizara xestiones pa llograr convenios con instituciones como l’Academia de la Llingua Asturiana (ALLA) y la Oficina de Política Llingüística pal asesoramientu y les traducciones o col Institutu Adolfo Posada pa la formación voluntaria de trabayadores, funcionarios y conceyales. Y amás, proponíase aprovechar el trabayu voluntariu de varios conceyales p’aidar al funcionariáu en xeres de torna.

Dende Conceyu Abiertu-Noreña, denuncien l’actitú del alcalde de Noreña y del so partíu (PSOE) al considerar que "anecia en poner torgues al usu de la llingua asturiana nel nuesu conceyu. De primeres, porque prohibe’l so usu, al nun almitir escritos n’asturianu pa ser trataos en plenu municipal, y de segundes, porque nin siquiera almite que pueda aldericase una propuesta, anque seya billingüe, na que se solicita que sí se puedan tratar mociones escrites n’asturianu".

Añaden que "los drechos de los noreñenses asturfalantes siguen suspendíos non solo pola actitú antiasturiana del alcalde y los ediles del PSOE ya IDEAS que gobiernen en Noreña y votaron en contra, sinón tamién pola indecisión del conceyal de Foro Asturias, Inaciu Iglesias, quien, si bien fala n’asturianu nos plenos, astúvose na votación pa que nun se pudiere tratar la moción, y pola indecisión del PP que prefirió tamién l’astención".
Sicasí, Conceyu Abiertu-Noreña tien enfotu en que podrán "esclariar les dubies que tanto FAC como PP y restu formaciones puedan tener al respeutu y aguardamos poder debatir y aprebar a la mayor brevedá esta moción que namás trata de garantizar un drechu elemental".

Conceyu Abiertu-Noreña anuncia que va siguir aportunando "al traviés de tolos calces llegales hasta consiguir que se cumplan los drechos de los asturfalantes en Noreña".

Fonte: Aruelu.com

L'ALLA conderga la marxinación del asturianu en Noreña

L’Academia de la Llingua Asturiana llamenta y conderga la marxinación al asturianu del conceyu de Noreña.

L’Academia de la Llingua Asturiana, enterada de la decisión del alcalde de Noreña, D. César Movilla, de refugar y retirar del orde del día del Plenu de güei una moción del grupu políticu “Conceyu Abiertu”, sobro la ponte ferroviaria de Rebalde (patrimoniu industrial asturianu de mediaos del sieglu XIX) por “tar redactada n’asturianu”, quier treslladar a la opinión pública asturiana la so más fonda esmolición énte la falta de respetu qu’amuesa’l rexidor noreñense hacia la llingua y la cultura asturiana ya, inda más, hacia’l propiu drechu de los ciudadanos del conceyu a usar la llingua d’Asturies.

N’efeutu, refugar la mentada moción cola xida de problemes “reglamentarios” da cuenta perfeutamente del allugamientu, oxetivamente anti-asturianu, del Sr. Alcalde y tresllada a la sociedá asturiana, una vegada más, la necesidá de d’atayar situaciones como les descrites pente medies del reconocimientu del asturianu como llingua oficial n’igualdá de condiciones que’l restu de llingües del Estáu.

L’Academia de la Llingua Asturiana ye sabedora que l’afitamientu de la oficialidá requier del consensu mayoritariu na Xunta Xeneral del Principáu y, darréu d’ello, de la reforma del Estatutu d’Autonomía d’Asturies. Poro, píde-y al Gobiernu del Principáu que llidere esi procesu de reconocimientu xurídicu del asturianu y qu’actúe (mentantu esa figura llegal nun seya plenamente efeutiva) afalando calces de dignificación y de planificación llingüística que, acordies col marcu alministrativu vixente, enconten l’usu del asturianu en toles instituciones del País.

Fonte: www.academiadelallingua.com

La Xunta pola Defensa de la Llingua Asturiana súmase a les crítiques al rexidor de Noreña

El gochu Noreña

La organización de defensa idiomática denuncia «un nuevu ataque a la llingua asturiana procedente de les files del Partíu Socialista» y destaca’l fechu de qu'esta prohibición afecte a un representante electu, lo que n’opinión de la Xunta «fai rescamplar tovía más la situación d'indefensión y discriminación na que s'atopen los asturianos y asturianes que quieren facer usu del asturianu».Per otra parte, la XDLA recuerda que l’asturianu ye la única llingua prohibida nel Estáu español, lo que convierte a los asturianos y a les asturianes nos únicos ciudadanos a los que se-yos niega la posibilidá d’escoyer la l’idioma nel que vivir.Dende la Xunta pregúntense si esti ye'l conceptu de respetu a la pluralidá que tien el partíu socialista y, de la mesma, si esta ye la promoción del asturianu que tanto venden a la opinión pública.La Xunta pola Defensa de la Llingua Asturiana esixe una rectificación inmediata del Conceyu de Noreña y encamienta a los partíos políticos asturianos a que «pongan les cartes sobre la mesa énte la prósima campaña electoral», porque «si lo que se quier ye prohibir la llingua asturiana, ye un fraude presentase énte la cuidadanía como defensores de la so promoción y difusión».

Fonte: les noticies

Más info: Infoasturies 1, Infoasturies 2, Infoasturies 3, Infoasturies 4

L'Aconceyamientu de Xuristes pol Asturianu pide la dimisión del Alcalde Noreña por nun permitir escritos n'asturianu

Xurde Blanco Puente, na so condición de Secretariu del Aconceyamientu de Xuristes pol Asturianu vieno acabante unviar una instancia a los conceyales del Ayuntamientu de Noreña onde-yos pidi que faigan dimitir al Alcalde pola so pergrave decisión de refugar la moción d’un conceyal por dir escrita n’asturianu.
Na instancia firmada por Xurde Blanco dizse que "pente medies del presente escritu la Xunta Direutiva del Aconceyamientu de Xuristes pol Asturianu quier tresmitir a tolos conceyales del Ayuntamientu de Noreña la so indignación énte’l despreciu que l’entá alcalde amosó pa cola llingua asturiana nel fechu de refugar la moción d’un conceyal por dir escrita n’asturianu. Da vergoña ayena refiertar a un cargu públicu, a estes altures del sieglu XXI, que la Constitución entama afitando que “La Nación española, naguando por asitiar la xusticia, la llibertá y la seguridá y promover el bien de los que nella s’inxerten, n’usu de la so soberanía, proclama la so voluntá de: ... Protexer a tolos españoles y pueblos d’España nel exerciciu de los derechos humanos, les sos cultures y tradiciones, llingües ya instituciones”; que l’artículu 9.2 de la mesma Constitución obliga a los poderes públicos “a facer los posibles pa que la llibertá y la igualdá del individuu y de los grupos nos que s’inxer seyan reales y efeutives”; que cola ratificación de la Carta Europea de les Llingües Rexonales o Minoritaries (BOPA de 15 de setiembre de 2001), l’Estáu español obligóse a la “facilitación y/o el fomentu del emplegu oral y escritu de les llingües rexonales o minoritaries na vida pública”; o que los artículos 3 y 4 de la Llei 1/1998, d’usu y promoción del bable/asturianu declaren, afiten y emparen el derechu de tolos ciudadanos al llibre usu de la llingua del país".
Sigún l'Aconceyamientu esta "Indignación y vergoña que mos torguen dafechu l’empobinamos al desagradecíu ciudadán –y llamentablemente alcalde de un conceyu asturianu- que paga la hospitalidá qu’esti país-y dio con un xestu perdespreciatible escontra la primera seña d’identidá del pueblu asturianu: la so llingua".
Darréu de too ello, l'Aconceyamientu encamienta a los conceyales de Noreña " qu’adopten les resoluciones afayadices pa desaposiar darréu del cargu d’alcalde a un suxetu que, a lo que tresciende a la opinión pública, namás s’esmuela pel sueldu y dietes que nagua por cobrar y que, a poco que-y rasquen, amuesa con xeitu autoritariu’l so enclín ideolóxicu preconstitucional.
Fonte: asturnews
Más info: lne, escritu d'Aconceyamientu de Xuristes pol Asturianu