La prensa en llingua asturiana queda estos díes ensin una de les sos principales publicaciones en papel, col anunciu del periódicu 'Les Noticies' de que pieslla'l so formatu físicu, pa siguir en contautu colos llectores namás que na so edición dixital. El númberu 769, que saldrá espublizáu la prósima selmana, será l'últimu que llegue a la so cita selmanal nos kioskos.El proyeutu editorial entamó n'agostu de 1996, cuando Publicaciones Ámbitu presentaba'l proyeutu de 'Les Noticies' na Feria Muestres d'Asturies. Unos díes depués, el 6 de setiembre, asoleyábase'l primer númberu.
Inaciu Iglesias, editor y primer direutor del periódicu, recuerda la ilusión del entamu, onde «tuviemos qu'aprender trabayando, teorizar practicando y crear onde nun había», a la vez que «inventemos un productu singular -un selmanariu xeneralista n'asturianu- que, en realidá, yera más propiu del sieglu XIX que d'anguaño». L'editor anuncia que l'apuesta del formatu dixital será fuerte pa encarar el futuru: «Son tiempos duros pero, faciendo alcordanza, nun tengo otro qu'una sensación sincera d'arguyu y agradecimientu a tolos que fixeron posible esta aventura irrepetible».
Son munches les amueses de sofitu y tristura pol fin del formatu en papel de Les Noticies y organizaciones como Iniciativa pol Asturianu y la Xunta Pola Defensa de la Llingua Asturiana fixeron públicos comunicaos nos que se reconoz el llabor d'esti mediu nel procesu de normalización de la llingua.
Fonte: El Comercio
Ye una pena el so pieslle pero ye asina, impónense les nueves teunoloxíes per imperativu económicu.
ResponderEliminary pola normalización social y la escolarización que tien el nuesu idioma que nun da nin pa un selmanariu.
ResponderEliminarUna pena soi llector d'esti periódicu dende va munchos años, intentara mercar este ultimu numbero pa tenelo d'alcordanza, que se sumara a los especiales del día d'Asturies, día de les lletres y dalgún otru especial como los anuarios de la musica que guarde, una pena que nun pudiera desenvolver una progresión como la de lne coles sos colecciones sobres Asturies creo que nun soi'l unico que tenía esa ilusión qu'esi periódicu llegara faer eses publicaciones da fechu en asturianu y dende una visión asturianista.
ResponderEliminar