23/1/12

30 aniversariu de l'Academia de la Llingua Asturiana


DAMIÁN BARREIRO . UVIÉU -

Esti domingu 22 de xineru cúmplense 30 años de que l’Academia de la Llingua Asturiana (ALLA) se presentara nel Salón d’Actos del Muséu de Belles Artes. La institución creárase en 1980 pol Conseyu Rexonal d’Asturies pa favorecer l’estudiu, la conocencia y la dignificación de la llingua histórica del país. Amás, la primer Xunta Xeneral de l’ALLA y la so presentación pública a la sociedá producióse once díes depués de que’l BOE publicara l’Estatutu d’Autonomía, onde se reconoció la proteición de la llingua asturiana col nome de bable, promoviendo’l so usu y enseñu. Con esta llei, el nuesu país convertiase nuna comunidá autónoma dientro l’Estáu español.

Asina echaba a andar un proyectu pol que yá naguara Xovellanos y que tenía’l precedente na Academia Asturiana d’Artes y Lletres fundada en Xixón en 1919. Cumplíase tamién una de les mayores reivindicaciones de Conceyu Bable, asociación fundada en 1974 que marcó’l nacimientu del asturianismu modernu y que depués de la fundación de l’Academia perdería tola so influencia. Precisamente, el primer presidente de Conceyu Bable, Xosé Lluis García Arias, diba convertirse nel mandatariu de la institución y mantúvose nel cargu a lo llargo de venti años.

La presentación pública de l’Academia nun yera la primer xunta de la institución. El 16 de mayu de 1981 yá aconceyaren los miembros de númberu nomaos pol ente pre-autonómicu. Nesa sesión, escoyéronse los cargos de la dirección de l’Academia y alcordaron nomar miembros d’honor a los titulares de les entidaes normativizadores de les otres llingües españoles, amás d’a cinco intelectuales vinculaos cola cultura asturiana –ente ellos, Emilio Alarcos–. Tamién propunxeron a once persones como académicos correspondientes. La mayoría yeren xente de Conceyu Bable –como Carlos Rubiera, actual conceyal de Cultura de Xixón–, anque había representantes de la xeneración de posguerra que se sumaren a la visión nueva del idioma –como Mánfer de la Llera o Llorienzu Novo Mier– y xente vinculao a la vieya escuela que nun apostó pol procesu normalizador –como Antonio García Oliveros y José León Delestal–, nomamientos qu’a la fin nun llegaron a concretase.

Fonte: Les Noticies

8 comentarios:

  1. Na semeya vese tamién a don Emilio Alarcos Llorach y a Josefina Martínez que nun hai que lo escaecer, de primeres sofitaron l'Academia, anque lluegu alloriaren dafechu.

    ResponderEliminar
  2. esi ye'l rigor científicu de dalgunos25 de enero de 2012, 9:48

    sí, nun se que-yos pasó.Custiones personales pasaron a ser custiones llingüístiques y filolóxiques.

    ResponderEliminar
  3. Taría bien saber el porqué del cambéu radical que se produció per parte d'esta autoridá llingüística -Emilio alarcos Llorach- que munchos tamos deseyando llegar a esplicanos.

    ResponderEliminar
  4. ún de los de l'Academia calcó-y la muyer. D'ehí esa perceguera que-yos tenia.

    ResponderEliminar
  5. Vaya por dios, cuando métese pel mediu l'asuntu que nun tien enmienda, mala cosa...

    ResponderEliminar
  6. Nunca hay que confundir ni acabar mezclando las churras con las merinas para que no pasen estas cosas.

    ResponderEliminar
  7. Ensin fonemes nun hai paraisu31 de enero de 2012, 23:03

    Sí, y hai dalgún que confundió a otra con una merina y moyó'l churru.

    ResponderEliminar

Los comentarios tán pendientes de moderación. Espublizaránse lo primero dable.