Xubilaos docentes pa cubrir necesidaes educatives

El sindicatu d`enseñantes asturianos SUATEA amuesa la so sorpresa énte esta iniciativa de la Conseyería d`Educación, de la qu`afirmen nun recibir información y enterase al traviés de los medios de comunicación

  Llucía F. Marqués

 Énte la dura situación de los docentes asturianos y les repitíes demandes unánimes de la Xunta de Personal pol amenorgamientu de xornada y pola necesidá de contratación de personal pa llevar a cabu xeres burocrátiques, la propuesta más recién ye la collaboración de baldre de docentes xubilaos. Nestos momentos los centros educativos tán demandando, al traviés d`allegamientos, más personal pal cursu prósimu, munchos de los que tán siendo refugaos.

 El númberu de profesoráu fora de plantiya y denomináu necesidaes autorizaes ta siendo amenorgáu y nun s`atienden los pidimientos de les direcciones. Tampoco son oxetu de negociación coles organizaciones sindicales, anque dende SUATEA sí se solicitó. Tou esto, aportunen, nun se soluciona cola collaboración del profesoráu xubiláu.

 Pesi al desconocimientu cuasi absolutu que se tien respeutu al conteníu de la resolución que va regular esta participación, la primer impresión ye que l`alternativa ye la nula inversión en personal, pretendiendo solucionar los problemes a costu cero gracies a la collaboración desinteresada de los extrabayadores. Esta idega llevaría a la paradóxica situación de miles de docentes  ensin trabayu o en condiciones precaries –como ye`l casu de los interinos- viendo como los sos posibles puestos son cubiertos por voluntarios trabayando de baldre.

 Dende SUATEA resaltaron el fechu de que la falta d`información sobro  la mentada resolución enzanca l`allugamientu énte esta nueva suxerencia, pero lo que si tienen nidio ye que “La única forma d`atender lo que la calidá educativa demanda ye una apuesta clara pola enseñanza pública, con presupuestu pa contratación de personal y valorando realmente`l trabayu y la función docente que tanto talentu y potencial tien según el mesmu Conseyeru declara. Dende SUATEA pidimos, comu promovemos dende va años na Xunta de Personal, que s`ameyoren les condiciones llaborales del profesoráu asturianu, que se mengüen los horarios lleutivos, que baxen les ratios y que s`esanicien les xeres burocrátiques que nun tean amestaes al llabor docente, pente otres cuestiones”.
Fonte. infoasturies.com

Iniciativa pol Asturianu denuncia la situación del asturianu na Educación Infantil

  Iniciativa pol Asturianu denuncia la situación del asturianu nel Currículu d’Educación Infantil y súmase asina a la quexa per parte de SUATEA esta selmana, tres la modificación del decretu 85/2008.

  Iniciativa pol Asturianu denuncia que tres de la modificación del Decretu 85/2008, de 3 de septiembre, pol que s’establez el currículu del segundu ciclu d’Educación Infantil (EI), el tratamientu que va recibir la nuesa llingua va ser más restrictivu de lo que la llei d’usu posibilita.

  La modificación del decretu no tocante al idioma afecta solo a les manifestaciones culturales asturianes, “tornando a arrequexar l’asturianu y perdiendo la oportunidá de da-y puxu y normalidá dientro del sistema educativu” como quier dexar afitao la organización de defensa del idioma. Cabe traer a l’alcordanza que’l sindicatu SUATEA propunxo modificar esa redacción faciendo una mención esplícita al nuestru idioma, pero nun fue aprobada nel CEPA.

  Respeuto a dalgunes midíes d’implantación, Iniciativa destaca que “el tiempu va ser solamente d’una hora selmanal; el profesoráu va ser el de primariu siempre y cuando tenga la formación necesaria y y cunten estos con disponiblidá horaria y la so aplicación va facese secuencialmente en tres años hasta xeneralizase a tol alumnáu de 3, 4 y 5 años, col condicionante de la disponiblidá presupuestaria per parte de la Conseyería”.
Fonte: asturnews.com

L'asturianu entra nel currículu de segundu ciclu d’Educación Infantil con un perfil baxu

  Una sesión d’una hora selmanal y una implantación sele, que se va allargar per trés años, son les carauterístiques principales de la incorporación del asturianu y el gallego-asturiano al currículu de segundu ciclu d’Infantil. “Podría desendolcase lo qu’afita la Llei d’Usu bastante más”, apunta Xosé Lluis Colodrón, de SUATEA .

  Casi 20 años depués de l’aprobación de la única norma nacional que regula l’idioma, la llingua Asturiana y el gallego-asturiano por fin lleguen a la Educación Infantil. Esti añu mediu centenar de centros veníen impartiendo conteníos nes dos llingües, anque pola propia voluntariedá de les escueles, dalgo que camuda agora gracies a l’aprobación por parte del Conseyu Escolar del Principáu d’Asturies (CEPA) del decretu de primera modificación del Decretu 85/2008, de 3 de septiembre, pol que s’establez el currículu del segundu ciclu d’Educación Infantil (EI).  

  Sicasí, esta incorporación del asturianu al currículu va ser de perfil baxo, como bien apunten dende’l Sindicatu Unitariu Autónomu de Trabayadores de la Enseñanza d’Asturies (SUATEA): “Depués de 20 años d’apartheid llingüísticu, el nuestru idioma ta maltratáu nel currículu d’Educación Infantil”. “Podría desendolcase lo qu’afita la Llei d’Usu bastante más”, afirma Xosé Lluis Colodrón a Asturies.com, qu’incide sobre manera nel tema del horariu y la implantación en trés años.

  L’asturianu va tener una sesión d’una hora selmanal venceyada al área de Llinguaxe, Comunicación y Representación, anque será global a toles estayes. “Nós propunximos al menos una carga horaria como l’inglés (hora y media)”, esplica Colodrón, pidimientu que nun foi atendíu.

  Estos sesenta minutos van tar impartíos pol maestru o maestra de Primaria que tenga capacitación y, nel casu de que los centros tengan Llingua Asturiana, por esti profesor nel casu de que tenga disponibilidá horaria, dalgo que denunció SUATEA al entender que ye contrariu a la Llei d’Usu y Promoción del Bable/Asturianu. N’opinión del sindicatu, debería ampliase l’horariu del profesoráu faciendo les contrataciones pertinentes.

  “Lo ideal ye que les clases les punxera’l tutor, pero nel grau d’Infantil nun hai mención d’asturianu. Ye una falta d’organización y considerámoslo un aspeutu fundamental”, apunta Colodrón, que tamién fai referencia a la falta de materiales. Son los propios maestros los que los ellaboren por cuenta propia, dedicando-y el so tiempu. 

Trés años pa la implantación total

  L’otru aspeutu nel que se podría ameyorar el currículu tomando como base la Llei d’Usu –“que tien la cortapisa de la voluntariedá”, puntualiza’l representante de SUATEA sobre la norma– ye nel ritmu de la so implantación, que va dir afitándose en tola rede d’Infantil progresivamente en trés años. Asina, el cursu viniente va desendolcase nes escueles qu’hasta agora teníen asturianu, pa nel 2018-2019 dar el saltu a los neños y neñes de 5 años de toles escueles y, nel 2019-2020, a la totalidá de cursos.

  “La implantación podría facese más rápida. Entendemos que, pol tema presupuestariu, nun s’incorpore a tolos centros nesti cursu que vien, pero perfeutamente podría incoporase a la totalidá de la Educación Infantil nel siguiente”, critica Colodrón.

  Otra manera, dende’l sindicatu denuncien la redaición “marxinal” nel curriculu nel conteníu relativu al idioma, qu’afeuta sólo a les manifestaciones culturales asturianes, señalando “y, en su caso, al patrimonio lingüístico”. SUATEA propunxo “modificar esa redaición faciendo una mención esplícita al nuestru idioma”, dalgo que nun foi aprobáu nel CEPA.

  “La reglamentación del tratamientu que recibirán les nuestres llingües propies va ser más restrictiva de lo que la Llei d’Usu posibilita y, poro, enforma alloñada del tratamientu igualitariu y equilibráu que tienen les llingües propies n’otros territorios”, resume SUATEA. Fonte: asturies.com

SUATEA suspende a Alonso y pon-y un "insuficiente" na estaya d'asturianu

Genaro Alonso, Conseyeru d'Educación del Principáu d'Asturies

  Cumplíu l'añu nel cargu de conseyeru d'Educación, SUATEA fixo una valoración del llabor desempeñáu por Genaro Alonso nel mesmu. El resultáu de la so evaluación ye de "suspensu", siendo la nota final en llingua asturiana de "insuficiente".

  "Estrenábamos el branu pasáu un nuevu responsable qu’intervieno na Xunta Xeneral asoleyando un programa de gobiernu enllenu de promeses y bones intenciones que, en pasando’l tiempu, convirtióse en brindis al sol cuando non en fechos contrarios dafechu a lo anunciao", apunten dende'l Sindicatu Unitariu y Autónomu de Trabayadores de la Enseñanza d'Asturies (SUATEA). Nun comuniasturianu, cáu, califiquen de "guapes" y "teatrales" les crítiques d'Alonso a la LOMCE, "al venir acompañaes d’una aplicación obediente de la Llei que nos estrema de les demás comunidaes autónomes comprometíes cola non aplicación".

  Asina, el sindicatu educativu evalúa, estaya por estaya, el llabor del conseyeru, siendo la so calificación en llingua asturiana de "insuficiente". "A pesar de les declaraciones en positivo y los compromisos verbales y escritos, la situación del enseñu del asturianu nun avanzó migaya. L’estáu de l’asignatura ye igual de precariu dafechu que cursos pasaos, col agravante del incumplimientou de lo recoyío nel Plan de Dignificación, que va un añu aprobó la Xunta Xeneral, y que’l mesmu conseyeru asumió como oxetivu creando mires que se frustraron darréu. Nun hai nengún deber fechu", afirma SUATEA.

  El sindicatu educativu nun aprecia aiciones nel conseyeru que-y permitan algamar l'aprobáu, con suspensu tamién en diálogu y rellación colos representantes del profesoráu, nel tratu al profesoráu interín, nes obres y el mantenimientu de los centros, nes condiciones llaborales de los maestros, nos recortes nes unidaes d'Infantil y nes oposiciones.
Fonte: asturies.com

SUATEA pide a la Conseyería que nun “venda fumu” cola especialidá d'asturianu

El sindicatu mayoritariu na enseñanza docente non universitaria n’Asturies, SUATEA, salía esti miércoles al pasu de les declaraciones que’l Conseyeru d’Educación, Genaro Alonso, ficiera nos medios alredor de la Especialidá Docente de Llingua Asturiana, porque pal sindicatu nun hai más que dos soluciones: “Que’l Ministeriu cumpla l’alcuerdu del Conseyu Escolar del Estáu o que’l Parllamentu asturianu conceda la oficialidá”.

SUATEA quier esclariar que “les noticies espublizaes nes que la Conseyería anuncia la creación d’una comisión, a comuña col Ministeriu, pa ellaborar un decretu autonómicu, nun puen entendese como avances pa la creación de la Especialidá, nel momentu nel que namás hai dos soluciones: Que’l Ministeriu cumpla l’alcuerdu del Conseyu Escolar del Estáu nos términos enantes espuestos o bien que’l Parllamentu asturianu conceda l’estatus xurídicu y constitucional que convierta n’oficial el nuesu idioma. Nun caben terceres víes“.

Tóca-y, eso sí, al Conseyeru esixir al Ministeriu d’Educación la modificación de los decretos d’especialidaes; pidir al Gobiernu d’Asturies l’apoyu a la oficialidá del nuesu idioma y dar desplicaciónes clares a la comunidá educativa y profesoráu asturianos del procesu y conteníu de les negociaciones col Ministeriu: “Lo demás ye allongar, vender fumu y distrayemos del compromisu d’algamar LA ESPECIALIDÁ DOCENTE DE LLINGUA ASTURIANA contrayíu pol so Gobiernu dende l’anterior llexislatura”.

Nesti sen, SUATEA quier recordar a la comunidá educativa delles cuestiones que desplica nun comunicáu de prensa qu’asoleyare esti día:

“-Que la creación de la especialidá docente en Primaria y Secundaria ta sofitada dende Asturies pola demanda de la Xunta Xeneral del Principáu d’Asturies, polos sindicatos mayoritarios de la educación pública, poles asociaciones de padres y madres con más implantación, pola Academia de la Llingua Asturiana, pola Xunta de Personal Docente non universitariu, pol Conseyu Escolar del Principáu y a nivel estatal pol Conseyu Escolar del Estáu, que ye la institución que fai’l llabor consultivu, d’asesoramientu y propuestes al Gobiernu español rellacionaes col sistema educativu.

-Ye, efectivamente, falso dafechu dicir que’l Ministeriu nun tien les competencies esclusives pa crear les especialidaes docentes (Adicional séptima LOE, apartáu 2: “Corresponde al Gobierno, previa consulta a las Comunidades Autónomas, la creación o supresión de las especialidades docentes de los cuerpos a los que se refiere esta disposición”). Esta competencia exercióla’l gobiernu al traviés de los decretos d’especialidaes d’Infantil y Primaria, y Educación Secundaria. Nestos decretos, y no referío al enseñu de les llingües, la llexislación recueye que serán especialidaes docentes na Educación Primaria y Secundaria les correspondientes a les llingües propies cooficiales de les respectives comunidaes autónomes (art. 2.2 del Real Decretu de primaria y art. 2.3 del Real Decretu de secundaria).

-El Conseyu Escolar del Estáu a propuesta de STES (a la que pertenez SUATEA) fixo va tiempu una propuesta pa desbloquear lo que ye non solo una demanda unánime sinón una discriminación flagrante ya intolerable con un colectivu d’enseñantes que lleva años nuna situación irregular y ensin los derechos que tien el restu de la comunidá educativa asturiana. Esta propuesta consiste en que los reales decretos d’especialidaes amiesten un apartáu que diga: “Naquelles Comunidaes Autónomes nes qu’haya llingües non oficiales que tengan proteición llegal y formen parte del currículu, podrá dase tamién, a petición de la Comunidá Autónoma y según necesidades educatives, la especialidá propia de la llingua respectiva”.

-Nun ye posible nel ordenamientu xurídicu estatal nin autonómicu crear una especialidá que nun tea fixada pol Ministeriu“. Fonte: Asturnews

SUATEA denuncia que’l Llibru Blancu de MECD namái quier desacreditar al profesoráu

Llibru Blancu del Profesoráu de José Antonio Marina

  SUATEA vieno acabante asoleyar un comunicáu de denuncia nel qu’afita que cola presentación del llibru blancu per parte del Ministeriu en plena campaña electoral, “avanzóse un grau más nel intentu de descreitu del profesoráu del nuesu país”. Sigún SUATEA, el PP cunta col inestimable sofitu d’otres fuerces polítiques p’aumentar el coru de quien achaquen al profesoráu la responsabilidá de los males de la nuesa educación: “asina lo tamos viendo na presentación de los programes electorales y nel usu partidista del acabamientu del profesoráu en banciar ente candidatos.

  Pero’l llibru blancu del profesor Marina, tantu na so versión amplia como na amenorgada, “nun respuende a les mires creaes pol PP nel sentíu de sentar les bases pa un alderique sobre la educación nel nuesu país. Llindase a faer gala d’un notable desconocimientu de la realidá educativa actual y a resalvar los verdaderos problemes que los años de retayos y depauperación traxeron a la enseñanza pública” Darréu reproduzse’l comunicáu de SUATEA dafechu:
1- El llibru blancu escarez d’un analís seriu y rigorosu alrodiu de l’actual situación de la educación pública. Pásase de dides sobre la medría de xeres, del númberu d’alumnáu al qu’atender, o del despidu de 40.000 docentes nos últimos años. Nun hai mención a les condiciones nes que se desenvuelven les actividaes docentes nin sobre les dificultaes que traviesen les families y l’alumnáu. Tampoco s’enceta la situación escepcional, respectu al restu d’Europa, d’un sistema educativu onde la enseñanza privada subvencionada al traviés de los conciertos educativos detrae cantidaes inxentes de fondos que tendríen de ser destinaos a la enseñanza pública. El llibru blancu prescinde de tou marcu socioeconómicu nun país nel qu’esisten millones de neños y neñes per debaxo del estragal de la probeza.
2. Les propuestes de Marina amuesen un desconocimientu fondu de la realidá na que los docentes desenvuelven el so llabor. Nun hai mención dalguna a que los principales problemes a los que güei s’enfrenten tienen que ver cola falta de sofitos pa realizar les sos funciones, la falta de tiempu material pa desenvolver el so trabayu debíu a la medría del horariu lectivu en secundaria, FP y enseñances de réxime especial, la falta de profesoráu tutor y especialista en primaria y la medría del númberu d’alumnos per aula. Sí se fai referencia a la comparanza con otros países pa concluyir que, en realidá, eses peores condiciones llaborales nun inciden na vida de los docentes nel nuesu país. Tampoco al so xuiciu tuvo importancia dalguna l’amenorgamientu drásticu del porcentaxe del PIB destináu a educación, asuntu que nin siquier ye mentáu de raspión nel so llibru. Pasar d’un 5’1% a un 4’3% en 2013 nun paez ser dignu de mención nel analís de partida.
3. Les recetes apurríes por Marina nel so llibru blancu basar nel so interés por demostrar una serie de tesis de forma preconcebida y non n’estudios rigorosos de la realidá educativa. La solución qu’ufierta a los problemes educativos nun consiste n’ameyorar el gastu educativu nel sector públicu. Pa él, la falta d’evaluación del profesoráu ye la base de tolos males. Y ello ensin argumentación dalguna. Namái apurre, pa sofitar la so argumentación, comparancies con dellos países onde s’aplicaron. Inclusive llega a reivindicar lo asocedío en Chicago y Nueva York nel cuelmu de la desfachatez: recordemos que’l sistema siguíu nestes ciudaes, que sacó a la cai a miles de docentes y de families pa protestar polo indigno del mesmu, consiste no siguiente: en sometiendo a evaluación a una determinada escuela y equipu educativu, si les resultancies son desfavorables, la escuela ve amenorgaos los sos fondos y el profesoráu los sos salarios. Si vuelve asoceder lo mesmo tres una segunda evaluación, la receta ye la mesma. Esto ye, en cuenta de detectar problemes y ayudar a superalos, vuelve castigase a esa comunidá educativa. Si tres la tercer evaluación les resultancies siguen siendo malos, la escuela ye cerrada o vendida y los sos docentes despidíos. Ésta ye no fondero la filosofía del señor Marina.
4. P’aplicar eses fórmules hai que vencer resistencies: esaniciar como interlocutores válidos a los sindicatos docentes – dalgunos como la Confederación de STEs yá dexamos claro’l refugu a les sos intenciones-; reforzar la figura de los directores pa que estos puedan conformar los claustros a la so guisa y aprovir les vacantes según la so voluntá; poder despidir a profesores que s’aguanten a les innovaciones”, una y bones el calter funcionarial d’estos ten de ser puestu en cuestión como asocede n’otros países..
5. Frente a les demandes de la inmensa mayoría del profesoráu que ta yá esperimentando lo que supon la LOMCE, Marina pretende reforzar los aspeutos más negativos de la mesma: la creación d’una carrera docente cola culminación de convertise n’asesor del conseyeru d’educación, la introducción d’un xerente nos centros y l’evaluación como elementu punitivu na vida docente son dalgunos d’ellos. La introducción d’un sistema competitivu ente’l profesoráu resalva que lo que’l profesoráu reivindica ye’l sofitu al trabayu n’equipu, l’amenorgamientu de la carga horaria, la estabilización de les plantiyes docentes, la formación del profesoráu dientro del horariu lectivu…
6. De perfacese la propuesta de Marina, la burocracia crecería de forma esponencial: les figures dedicaes a enllantar el sistema d’evaluación,  supervisores de los supervisores y les consecuencies sobre la inmensa mayoría de los docentes, seríen desastroses pal conxuntu del sistema educativu. Precisamente unu de los mayores problemes denunciaos polos docentes ye la medría de les xeres burocrátiques deriváu del nuevu sistema impuestu cola LOMCE.
7. DEP: el tan cacarexáu MIR convertiríase na ampliación nun añu y nun cambéu de status del profesoráu. Anguaño’l profesoráu en práctiques cobra un salariu similar al de los sos colegues definitivos. D’aplicase la propuesta, el salariu d’un DEP podría ser equivalente al de los sos colegues MIR, en redol a unos mil euros. Un bon aforru pal sistema. Tres la primer selección, nun hai garantíes de que’l periodu de práctiques dea accesu a la condición de funcionariu sinón que’l sistema actual, el d’oposiciones nun se pon en tela de xuiciu. Una doble seleición que nun esiste nos países de la nuesa redolada.
8. El gran escaecíu ye’l profesoráu interín. Más de la cuarta parte de los docentes son interinos. La única mención que’l llibru blancu fai ye al so gran númberu pero nin una palabra sobre cómo estabilizalos nel emplegu. Esta crecedera esponencial del profesoráu precariu producióse polos retayos y l’interés en siguir con un ERE xigantescu qu’esanició miles de puestos docentes estables al traviés de les xubilaciones ensin que se repunxeren nin una mínima parte de los mesmes. Paez qu’a esti profesoráu condérgase-y al olvidu y l’espulsión del sistema públicu d’educación.

  Estes son dalgunes de les reflexones tres una primer llectura del llamáu llibru blancu. Tratase de propuestes realizaes ensin tener cuenta al profesoráu, nin a les circunstancies nes que desempeña’l so llabor. Pretender encetar un alderique educativu pa supuestamente ameyorar la enseñanza ensin cuntar colos sos principales protagonistes. Ye, poro, una iniciativa que naz muerta. Tres les eleiciones, tienen de revertise los retayos, recuperar la inversión na educación pública, plantegase meyora de les condiciones nes que los docentes trabayen, garantizar una enseñanza pública calidable pa toos y toes. La propuesta de Marina, llamentablemente, va en sentíu contrariu a lo que la inmensa mayoría esperamos”.        Fonte: asturnews.com

SUATEA esixe un cambiu de rumbu urxente en política llingüística

SUATEA esixe a la Conseyería d’Educacón y cultura la dignificación llingüística y nin desanicie l’asturianu de la Educación infantil nin consienta ratios de 30 alumnos en Primaria.

Como fai alcordanza SUATEA nun comunicáu asoleyáu esti martes, el pasáu mes d’ochobre, el Parlamentu asturianu aprobó una Proposición non de Llei pola dignificación de la llingua asturianacol apoyu del PSOE, Podemos, IX y Foro y “nella, ínstase al Conseyu de Gobiernu a diseñar un plan de dignificación y normalización llingüística enantes del próximu periodu de sesiones”.

Y amás el conseyeru d’Educación y Cultura, Genaro Alonso, nes sos comparecencies públiques y nos conceyos realizaos a primeros de cursu con tolos sindicatos presentes na Xunta de Personal Docente, “comprometióse a meyorar el desarrollu de la Llei d’Usu y Promoción del asturianu y el so reforzamientu nel ámbitu educativu”. De la mesma manera, el Director Xeneral de Planificación lingüística, “mostróse comprometíu con estos principios y con dar solución a les reclamaciones que se-y treslladaron sobre tola riestra d’irregularidaes detectaes a los primero del cursu”.

Pero sigún denuncia SUATEA “estes intenciones y declaraciones concrétense na realidá nuna política continuista cola de gobiernos anteriores del PSOE y que consiste nel desaniciu de la enseñanza del Asturianu y del Gallego-Asturiano na Educación Infantil, la falta de siguimientu per parte de la inspección educativa d’irregularidaes na ufierta de l’asignatura en Secundaria, la non cobertura de baxes de Gallego-Asturiano dende hai más d’un mes nes escueles de Tapia y la illegalidá de la xuntanza de grupos con ratios d’alumnáu de más de 25 alumnos en Primaria”.

Son casos como los de les Escueles Llerón-Clarín y Aniceto Sela de Mieres, onde l’alumnáu d’Educación Infantil (E.I.) venía recibiendo clases d’Asturianu dende hai cuantayá (nel Llerón-Clarín yá fue centru pilotu na implantación de l’asignatura d’asturianu nel añu 1984) y esti cursu tovía nun les reciben.

SUATEA y la Comunidá Educativa d’estos centros lleven reclamando dende primeros de cursu que s’amplie’l contratu del profesor d’Asturianu a xornada completa pa poder siguir impartiendo esta asignatura n’E.I: “Sangrante ya illegal (la llexislación vixente establez una ratio máxima de 25 alumnos pa grupos de Primaria), ye tamién el casu del Colexu La Vallina de Lluanco onde un profesor d’Asturianu, contratáu a media xornada, imparte clases nun grupu de primeru y otru de terceru de Primaria con 30 alumnos y alumnes, consecuencia de la xuntanza de dos del mesmu nivel. Lo mesmo pasa con otru grupu de sestu con 28 alumnos. La Dirección del centru, igual qu’esti sindicatu, pidieron cuantayá l’ampliación a xornada completa del profesor pa poder desdoblar estos grupos y atender, cola calidá a la que tien derechu, a esti alumnáu”.

Asina, en viendo “la inacción flagrante de la Conseyería d’Educación y Cultura, del Serviciu de Planificación Llingüística y del Gobiernu del PSOE énte estos fechos acontecíos al entamu del supuestu camín de la Normalización Llingüística nel ámbitu educativu, nun mos queda otra que pidir un cambiu de rumbu de 180 graos si se quier cumplir col mandáu de la Xunta Xeneral del Principáu y colos derechos llingüísticos del alumnáu”.                                                                     Fonte: asturnews.com

La Conseyería apautará cambeos nes oposiciones pa Secundaria

El Conseyeru d'Educación Xenaru Alonso

  N'ochobre conoceránse les places convocaes en Secundaria y les novedaes que se van incluir na convocatoria d’esti añu de docentes como la publicación previa de los criterios de calificación.

  No que cinca a la Llingua Asturiana, la Conseyería comprometióse a subsanar tolos errores que se tan produciendo nel entamu del cursu y a llantar un plan de refuerzu d’esta materia.

  Too esto súpose tres de la reunión que la Xunta de Personal Docente caltuvo col Conseyeru d’Educación y na que taben presentes los Directores Xenerales correspondientes tratándose nella una riestra de temes relevantes nesti principiu de cursu. El conseyeru d’Educación,Genaro Alonso,  adquirió dellos compromisos, como’l d’estudiar l’amenorgamientu de la xornada pa los docentes mayores de 55 años y les centrales solicitaron que fora ensin amenorgamientu de retribución. Tamién apuntó que n’ochobre-yos treslladará’l borrador de les especialidaes de les places que piensa convocar nos cuerpos de Secundaria, Profesores Técnicos de *FP y Enseñances Artístiques.

  El Conseyeru amosóse abiertu tamién a axustar un nuevu calendariu escolar, según los destinos de los interinos, y a incluyir cambeos nes oposiciones, como la publicación previa de los criterios de calificación, qu’haya una sortéu únicu de los temes de les oposiciones y la distribución proporcional de places de discapacidá ente les distintes especialidaes.

  SUATEA plantegó la necesidá d’afitar un calendariu de negociaciones cola Conseyería que ruempa la dinámica del anterior equipu de falta de diálogu y d’imposiciones. Esi non atender pa la representación de los docentes traxo como consecuencia problemes graves col calendariu y col sistema d’axudicación del profesoráu interín y nel desarrollu de les oposiciones.

  No tocante a la situación de la Llingua asturiana, SUATEA denunció que nun se ta cumpliendo la Llei d’Usu y qu’hai alumnáu al que se-y ta negando la posibilidá de cursar l’asignatura, amás de volver a reivindicar la creación de la Especialidá Correspondiente. El Director Xeneral comprometióse a subsanar tolos errores y a llantar un plan de refuerzu d’esta materia.                                                       Fonte: asturnews.com

Venti centros educativos nun tienen maestru d’asturianu

   Otru añu más repítese la historia. Venti centros educativos principien el cursu ensin maestru de Llingua Asturiana, según los datos que manexa SUATEA.

  El sindicatu educativu cifra en 102 les places totales ensin cubrir, de les que venti correspuenden a la materia de Llingua Asturiana. Ello significa qu’estos centros educativos nun van contar con maestros de l’asignatura hasta’l 15 de setiembre, cuando se va facer la segunda convocatoria.

  En Primaria les clases van principiar el día 10, mentes qu’en Secundaria’l comienzu ta previstu pal propiu día 15. Pal Sindicatu Unitariu de Trabayadores de la Enseñanza d’Asturies (SUATEA) esta situación débese a razones d’aforru por parte de la Conseyería d’Educación y Cultura.

Disculpes del conseyeru pol error informárticu             El conseyeru Genaro Alonso llamentó ayeri l’error informáticu qu’impidió’l repartu de places de los interinos hasta les 3 hores de la mesma xornada na que debíen incorporase al so puestu de trabayu y anunció que se diben poner toles midíes pa que nun se volviera a dar esta situación. “Les consecuencies son que los maestros y profesores que se teníen que incorporar güei –por ayeri– a los sos destinos retrasen la incorporación hasta’l día 2 de setiembre. Pidimos disculpes pola tardanza y el retrasu d’alcuerdu col calendariu previstu y facémonos cargu de la incertidume xenerada ente’l personal que tendría qu’incorporase güei –por ayeri–  a los sos destinos”, señaló.                                                                                Fonte. asturies.com

SUATEA esixe al Principáu qu’atienda toles reivindicaciones del profesoráu

  Dende SUATEA entamen a ver con esmolición les actuaciones de la Conseyería d’Educación “que van suponer decenes de despidos o d’amenorgamientos de xornada pa los educadores que trabayen nes distintes escueles d’O·3″, sigún aseguren nun comunicáu nel que piden a la Conseyería atención pal profesoráu asturianu.

  Y ye que, pal sindicatu, “ye la Conseyería la qu’afita les plantiyes y ye al Conseyeru a quien correspuende qu’el so mandatu nun empiece con un retayu na atención a los nuesos neños y neñes. La pareya educativa a tiempu completu que defendemos dende SUATEA y el restu d’organizaciones comprometíes col calter públicu d’esti tramu educativu ye imprescindible pa garantizar una correcta atención a les neñes y neños qu’alleguen a estes Escueles”.

  La propuesta del Cheque Bebé tamién se critica fondamente dende SUATEA, porque allóñase de lo que defenden y porque “los fondos públicos tienen de destinase a garantizar la gratuidá d’esti tramu educativu y la so integración nel sistema públicu asturianu. Tien de garantizase esti serviciu en condiciones dignes, acabando cola desigualdá qu’esiste dependiendo del conceyu onde s’atope la escuela. Tien d’acabase cola precariedá tamién nesti sector dotando a cada aula de bebés del personal necesariu y a toles escueles d’una dirección unipersonal. Ye un compromisu del nuevu gobiernu y por mor d’ello una obligación pal nuevu Conseyeru”.

  Pero la Conseyería tien munches otres xeres pindies que nel sindicatu aprovechen pa que nun s’escaezan:  “Recordemos que’l próximu día 21 ta prevista la publicación de les llistes de profesoráu interín que va tener que solicitar plaza’l día 25 nos distintos centros educativos y qu’esiste un centenar de docentes que nun apaecíen nes llistes provisionales publicaes a principios d’agostu”. Ye por mor d’ello qu’esixen a la Conseyería la inclusión de toos estos docentes nes llistes, “víctimes del postreru incidente d’un procesu selectivu llaráu d’erros y de reclamaciones”.

  Per otra parte, dende SUATEA puntualicen que n’Asturies más de la cuarta parte del profesoráu de la enseñanza pública ye interín; “siendo dellos años la tasa de reposición inferior al 30 %, llegando dellos años hasta un ridículu 10%. Por ello esisten especialidaes de profesoráu onde lleva ensin haber oposiciones más de 15 años, lo que fai qu’haya docentes con esos años d’interinidá a los sos llombos. Otres como les de llingua asturiana nun tuvieron nunca esa opción. Agora’l gobiernu central, con un anunciu claramente electoralista, fala d’una tasa de reposición del 100%”.Fonte: asturnews

Suatea reclama al Gobiernu

   Nun comunicáu asoleyáu hai dellos díes, SUATEA recama-y al nuevu gobiernu asturianu que faiga los deberes pendientes si quier aprebar esta nueva llexislatura. El sindicatu educativu SUATEA recuérda-y a Javier Fernández que ye necesariu un cambiu nes formes y nel conteníu de les polítiques educatives que desenvolvió'l so gobiernu na última llexislatura, si quier mantener un sistema educativu públicu de calidá y al serviciu de les necesidaes de la sociedá asturiana.

   Pal sindicatu "esta última llexislatura a manes del gobiernu de la FSA-PSOE tuvo marcada pol escándalu del casu Marea qu'afectaba a l'anterior alministración. Nun se supo, o nun se quiso, aparar nel camín esbrozáu al desastre, a la desorganización, al cortoplacismu y a la improvisación que lleva reinando na Conseyería durante más llexislatures de les deseables pa la bona salú del sistema educativu asturianu".

   El gobiernu de Javier Fernández tien per delantre 4 años," si acaba la llexislatura, p'aparar, dar marcha atrás y reconducir les más de les polítiques que se desenvolvieron na Conseyería d'Educación de la mano d'Ana González".                                                                                Fonte: Asturnews

II Marcha'l Chupu: sábadu 18 d'abril a les 12 na Renfe n'Uviéu

AEIPA: Calidá  y  Calidez / Escueles Públiques 0-3

Asturies

Escontra la política educativa que da'l llombu a la comunidá educativa

Dar un calter educativu a esti ciclu d'Infantil supón tamién reconocer el drechu al a la formación, medría personal d'una  forma sistematizada y orientada pedagóxicamente. Nun s'entiende entós que nun seya la mesma Conseyería d'Educación la qu'asuma eses competencies y nin siquier integrar estes escueles nel sistema, igual que se fixo enantes col ciclu de 3 a 6 años. 

L'alministración asturiana nun quier saber nada de les demandes del personal docente y educador, de les families y de los sindicatos que, como SUATEA, punxéronse escontra una política de retayos y que nun mira pa la realidá, la conxuntura y la idiosincrasia propies d'Asturies.  Un exemplu sangrante ye l'ausencia absoluta de referencia a la llingua asturiana, despreciando asina'l valir y la importancia de la tresmisión llingüística nes primeres edaes.

Fonte: SUATEA

CSI, SUATEA, CCOO y UGT refuguen el nuevu currículu d'ESO y Bachilleratu y reivindiquen la oficialidá del asturianu

Consideren que'l nuevu currículu conderga'l futuru del asturianu nes etapes cimeres del sistema educativu. Les cuatro fuercies sindicales roblen el viniente comunicáu conxuntu:

L'actual Conseyera d'Educación fixo públicu'l compromisu de creación de la especialidá de Llingua Asturiana a lo llargo de la presente llexislatura. A escasu tiempu de qu'ésta termine, les organizaciones sindicales SUATEA, Fete-UGT, Fe-CCOO y CSI, vemos frustrada esa espectativa y pa con ella la posibilidá de normalizar la situación de los docentes qu'imparten esta asignatura.

Na última resolución de la Xunta de Personal Docente non Universitariu, aprobada por unanimidá, esixíase la tramitación pela vía d'urxencia de la creación d'esta especialidá, cuestión especialmente importante nun contestu d'inminente aprobación d'un nuevu decretu estatal d'Especialidaes y de la inmediata aplicación del nuevu currículu LOMCE na enseñanza Secundaria y Bachilleratu.

Lloñe d'esto, la situación na que nos atopamos ye d'incertidume absoluta sobre la posibilidá d'avanzar na regularización de l'asignatura. Tres la respuesta del Ministeriu y la falta d'iniciatives concretes per parte de la Conseyería asturiana, el profesoráu va siguir avocáu a la so situación d'inestabilidá lo que repercute negativamente na calidá de la enseñanza.

Con too esto, la situación entá pudo dir a peor. L'alministración pon sobre la mesa una propuesta de currículu que supón una agresión directa a la presencia de la Llingua asturiana y del Gallego-asturianu na educación Secundaria y el Bachilleratu. Ye una propuesta qu'incumple la Llei d'Usu y marxina l'asignatura como nunca se fixera hasta agora.

Per un llau va competir con gran númberu de materies, per otru va esixise, pa ser cursada en cursos cimeros habela estudiáu con anterioridá, y como colofón, ve amenorgáu'l so horariu de 4 hores selmanales a 1 nel Bachilleratu.

Ye indefendible la posibilidá d'impartir con un mínimu calidá esta enseñanza y menos entá cumplir col currículu que para ella foi asignáu n'esti mesmu decretu. Una hora selmanal ye una burlla tantu pa los profesionales que tendrán d'impartila como pal alumnáu qu'opte al so aprendizaxe.

Na práctica, esti apueste de l'alministración educativa supón condergar, al curtiu plazu, el futuru del asturianu nes etapes cimeres, y tener nel futuru una incidencia negativa na escolarización nel restu d'etapes educatives. En tou casu manifiesta la nula intención de contribuyir al fomentu de la recuperación, desenvolvimientu y promoción del usu de la nuesa llingua, elementos que, xuntu col establecimientu de los medios qu'amparen el derechu de los cuidadanos a conocelo y usalo, constitúin l'oxetivu que marca la Llei d'Usu y promoción.

Consideramos que declarar oficial a la Llingua asturiana ye, nestos momentos, la midía que podría solucionar el so estatus nel ámbitu educativu y la única apuesta rial que impedirá la degradación total hasta la so desapaición.

Fonte: Infoasturies

SUATEA presenta alegaciones a los currículos d'ESO y bachilleratu

Piden la paralización de l'aplicación de la LOMCE n'Asturies.

 Dende SUATEA vienen de presentar altriques énte'l nuevu currículu remitíu pola Conseyería a les organizaciones sindicales. En primer llugar, critiquen qu'esti nuevu plan quiera implantase de cara al cursu que vien, con un plazu de tiempu pa la organización nos centros educativos qu'al so paecer fae d'ello dalgo inviable.

Amás, señalen que mientres la Conseyera realiza declaraciones públiques escontra la LOMCE, aplica la mesma nel enseñu asturianu de mena estricta, y con un procedimientu que, dao lo apurao del mesmu, apurre unos plazos d'altriques y modificaciones bien curtios. A too ello amiesten que la ufierta plantegada va dificultar enforma la organización nos centros de secundaria, polo que lo consideren un nuevu mal facer de la Conseyería.

En cuantes a estayes concretes, critiquen duramente que la relixón vaya ser materia evaluable, fechu que consideren favoratible pal adoctrinamientu relixosu y un currículu contradictoriu, que va facer a los escolinos deprender una enseñanza acientífica que, tal como manifiesten, debería desapaecer de la educación pública.

En cuantes a la Llingua Asturiana y el Gallego-asturiano, SUATEA considera que la so situación nun se correspuende col cumplimientu de la Llei d'Usu y Promoción, faciendo escoyer a los escolinos na ESO ente una segunda llingua estranxera, o cualesquiera de les dos llingües propies del país.

Fonte: Infoasturies

SUATEA denuncia que "la Conseyería d’Educación vuelve a degradar la presencia de la llingua asturiana nel sistema educativu"

Señalen que'l borraor del nuevu currículu d’educación secundaria p’Asturies "reduz la carga horaria y dexa l’asignatura nuna situación tovía más precaria". 

Los borraores de decretu pelos que se regula n’Asturies el currículu d’educación secundaria (ESO y Bachilleratu) tán suponiendo una nueva agresión a la presencia de la llingua asturiana y del gallego-asturiano nel sistema educativu asturianu. Al marxe de les valoraciones xenerales y les referentes a otres materies que merecen toos dos testos, que suponen l’aplicación n’Asturies d’una llei nefasta como la LOMCE, no que toca a la llingua asturiana rescampla que:

1)    La materia apaez somorguiada nuna montonera d’asignatures optatives, lo que torga la so escoyeta per parte del alumnáu.

2)    Oblígase al alumnáu que garre l’asignatura nos cursos superiores a tenela estudiao los anteriores. Teniendo en cuenta que la materia d’asturianu sufre constantemente, y hasta bien avanzáu’l cursu, que-y saquen alumnos pa otres materies, o que directamente nun se los dexe matriculase por tener que facer hores de refuerzu n’otres materies, topámonos con que podría dase la situación de qu’un alumnu o alumna pase los cuatro años de la ESO ensin poder cursar l’asignatura queriendo facelo toos ellos.

3)    En bachilleratu l’asignatura baxa de 4 hores selmanales a 1, y compite cola materia de Relixón. Nun fai falta desplicar la barbaridá pedagóxica que supón una asignatura, y amás en bachilleratu, de la que namás s’imparte una hora a la selmana.

4)    La permanencia de les ratio mínimes en bachilleratu supón otra torga más pa la pervivencia de la materia.

Nesi sentíu, SUATEA quier amosar el so esmolecimientu pola situación que s’abriría, d’aprobase esti decretu, tanto pal alumnáu como pal profesoráu que la imparte, que sigue ensin ver aprobada la especialidá docente, tan necesaria pa la so estabilidá y que supondría una meyora evidente de les sos condiciones y de les de la propia materia.

Por too ello, SUATEA convoca asamblea específica pal profesoráu de llingua asturiana pal miércoles 25 de marzu a les 17:30 nel IES Aramo, d’Uviéu. Y dao qu’esta situación de degradación de la materia ye compartida con otres, convócase tamién otra xeneral de profesoráu pal mesmu día y llugar a les 18:30.

Con una lexislatura a piques de rematar, la conseyera n’exerciciu, Ana González, paez querer despedise del sistema educativu asturianu dexando’l mesmu mal tastu que dexaron los sos antecesores no que toca a la llingua del país.

Fonte: Infoasturies 

La permanente del Conseyu Escolar del Estáu inclúi la especialidá d'asturianu nel decretu d'especialidaes

Esti martes 3 de febreru del 2015 celebróse la reunión de la permanente del Conseyu Escolar del Estáu pa facer el dictame al Real Decretu d’Especialidaes de la Educación Secundaria.

Esti dictame va incluyir, depués de la votación d’una enmienda que sacó un apoyu mayoritariu, la posibilidá de criar la especialidá de Llingua Asturiana a petición de la comunidá autónoma.

El testu de la enmienda ye esti:

“4. En aquellas comunidades autónomas en las que existan lenguas no oficiales que gocen de protección oficial y formen parte del currículo, los cuerpos de catedráticos de enseñanza secundaria y de profesores de enseñanza secundaria podrán tener asimismo, a petición de la Comunidad Autónoma y según necesidades educativas, la especialidad propia de la lengua respectiva. Las administraciones correspondientes determinarán la atribución docente a dichas especialidades por analogía con lo dispuesto en este real decreto para la especialidad de lengua castellana y literatura.”

 Pa SUATEA -miembru del Conseyu- "con esta decisión el Conseyu Escolar del Estáu da otru pasu alantre na criación de la especialidá de Llingua Asturiana. Ye una decisión coherente con resoluciones aprobaes apocayá y qu’esponen, ensin resquiebra nenguna, la opinión y criteriu de la comunidá educativa sobre esti tema. Ye una postura que’l gobiernu nun puede tapecer y que lu debería llevar a tresformar esta petición nuna realidá si nun quiere degradar el papel que correspuende a un órganu estatal como ye’l Conseyu Escolar".

Poro, consideren que "ye una gran noticia pal conxuntu de la sociedá asturiana y especialmente pal profesoráu de llingua asturiana que ve ca vez más cerca la equiparación profesional col restu del colectivu docente. Dende SUATEA congratulámonos d’ello dao que ye una reivindicación histórica del nuesu sindicatu".

Fonte: Infoasturies

SUATEA, FETE-UGT y CCOO presenten una iniciativa conxunta en defensa de la especialidá d'asturianu

La iniciativa conxunta presentóse nel Conseyu Escolar del Estáu.

El Ministeriu d’Educación punxo enriba la mesa un proyectu de Real Decreto onde se regulen les especialidaes del profesoráu de la enseñanza Secundaria. Ye un documento de calter técnicu nel que s’afaya normativa anterior a la LOMCE a les nueves materias que se meten nos nuevos currículos.

Al paecer d'estes organizaciones "pa la comunidá educativa asturiana ye un momentu de gran trascendencia en tanto que xugámonos la creación de la especialidá d’asturianu y gallego-asturiano. Ésta ye una reivindicación histórica que supón dignificar l’enseñu d’estes asignatures y igualar les condiciones llaborales del profesoráu que les imparte a les del restu de docentes".

Asina, apunten que "énte una primer negativa per parte del Gobiernu na acabante de celebrase Conferencia Sectorial de Educación, munches de les organizaciones que tenemos presencia na Permanente del Conseyu Escolar del Estáu decidimos presentar conxuntamente delles enmiendes pa la próxima sesión que va ser el 3 de febreru onde va debatise la propuesta del Ministeriu".

Poro, dende CCOO d’Enseñanza, FETE-UGT y SUATEA consideren "qu’ésta ye una oportunidá única pa pañar apoyos qu’algamen que’l Gobiernu atienda esta demanda. Consideramos que la nuestra responsabilidá ye poner tolos medios que podamos pa sacar alantre esi oxetivu. Ye por ello que tamién solicitamos, con carácter urxente, una reunión cola Señora Conseyera Ana González. Ye imprescindible que paralelamente a les xestiones que fagamos miembros de la comunidá educativa, el gobiernu asturiano y especialmente la Conseyería d’Educación actúen cola contundencia y dilixencia necesaries que rique esta cuestión".

Fonte: Infoasturies

Siguen les reaiciones de refugu pola negativa pa la creación de la especialidá docente d'asturianu

Dende la propia ALLA hasta l'ámbitu sindical, siguen les amueses de refugu a la decisión ministerial, con fuertes crítiques tamién al gobiernu asturianu.

Dende l'Academia de la Llingua Asturiana treslladen nun comunicáu que "ye inconcebible dafechu que’l profesoráu de Llingua Asturiana de toles estayes educatives tenga una formación universitaria oficial y homologable a la del restu de profesionales docentes y nun tenga, ensin embargu, reconocida la especialidá pa poder participar en concursos d’oposición o tresllaos n’igualdá de condiciones que les de los otros coleutivos docentes".

Nesi sen, ceyen "llamentable que la defensa de la petición asturiana nun se fixere al nivel de la importancia que correspuende a esta demanda histórica del sistema educativu n’Asturies. L’Academia alvirtió a la Sra. Conseyera, reiteradamente y en tiempu, nel sen de qu’un tema tan delicáu como esti esixía una xestión personal y decidida de la propia titular de la Conseyería".

Poro, consideren "inconcebible que’l Gobiernu del Principáu d’Asturies se conforme con un «non» –con que «Wert dixo non»–. Esta primer negativa nun tien por qué ser definitiva, sinón qu’hai que siguir negociando y argumentando pa que’l Ministeriu entre en razón y rectifique. L’Academia, llueu de lo anterior, entiende que de nengún mou se pue dar por zarrada esta cuestión, sinón que’l Gobiernu d’Asturies, al máximu nivel, ye dicir la Sra. Conseyera d’Educación o, inclusive, el Sr. Presidente del Principáu, D. Javier Fernández, tien que retomar la iniciativa y solicitar, con calter d’urxencia, un alcuentru específicu y billateral col Ministeriu pa solucionar definitivamente esta cuestión. Esto ye una responsabilidá del Gobiernu d’Asturies y nun pue haber equí dexación de funciones".

Les crítiques lleguen tamién pel ámbitu sindical, dende organizaciones como la CSI o SUATEA. Éstos últimos señalen que "la redacción d'esti nuevu decretu nun s'axusta al textu de la LOMCE, onde'l ministeriu aceptó añadir la Disposición Adicional 38.6 (*) pa permitir que les comunidaes autónomes con llingües ensin calter d'oficial pudiesen mantener la so ufierta educativa. Esti ye'l casu d'Asturies, onde la presencia de la llingua asturiana tien presencia curricular en tolos niveles educativos y está regulada por la Lley de Usu y contemplada nel Estatutu d’Autonomía".

Apunten que "la situación anguaño ye complicada, y ye necesaria l'actuación urxente de tolos axentes implicaos, Academia,  Conseyería,  sindicatos educativos, asociaciones d’estudiantes y de madres y padres…. La última posibilidá de modificar y adaptar esti decretu a la demanda de la sociedá asturiana pasa pol Conseyu Escolar del Estául convocáu pal 3 de febreru que vien".

Amesten tamién l'alcordanza "que'l Plenu del Conseyu Escolar del Estáu yá se pronunció nel mes de setiembre favorable a la creación d'esta especialidá a instancies de STEs, confederación de la que forma parte SUATEA. Esti muérganu, que representa a tola comunidá educativa del Estáu, recomendó-y al Ministeriu la creación de la Especialidá de LLingua Asturiana. Pero agora el Ministeriu mira pa otru llau y desatiende la desixencia del mayor muérganu consultivu del Estáu en materia educativa".

Amás, afiten qu' "esta demanda histórica de la sociedá asturiana nel so conxuntu vien avalada por inumerables peticiones tanto sindicales, sociales como institucionales. La Xunta Xeneral d'Asturies pronuncióse favorable a la so creación na primavera pasada, asina como la Xunta de Personal Docente d'Asturies que se tien manifestao nel mesmu sentíu en delles ocasiones. Asina mesmo, la propia Conseyera d'educación Ana González tien manifestao en reiteraes ocasiones que yera un de los compromisos que quería cumplir enantes d'acabar la presente llexislatura col enfotu de dignificar y normalizar la presencia de la llingua asturiana nel sistema educativu".

Fonte: Infoasturies