XXXI Xornaes Internacionales d’Estudiu

L’ALLA va celebrar n'Uviéu les XXXI Xornaes Internacionales d’Estudiu los díes 6, 7 y 8 de payares.

Pablo R. Guardado
El salón d’actos de la Facultá de Filosofía y Lletres va ser sede'l 6,7 y 8 de payares, de les XXXI Xornaes Internacionales d’Estudiu qu’entama l’ALLA. Trátense de trés díes de ponencies, alderiques y comunicaciones sobre l’asturianu.

L’entamu de les xornaes ta previsto pal martes, día 6, a les 16 hores, pa depués siguir con una ponencia de Xosé Lluis García Arias sobre la ‘Conciencia llingüística y testos medievales nel Dominiu Ástur’. Esta primer xornada va continuar a les 17.15 hores coles comunicaciones ‘El léxicu mineru. Dalgunes cuestiones etimolóxiques’, de Lucía Cortina; ‘La estensión de los plurales -es, -en en Sanabria’, de Xuan Xosé Lajo; y ‘Venceyamientu de les variantes de la llingua y otres llingües: análisis multivariante pente medies d’algoritmos xerárquicos’, de Rubén Fernández Martínez, pa pesllar esti bloque con un alderique y una posa.

Carmen Muñiz Cachón, de la Universidá d’Uviéu, va presentar la ponencia ‘La entonación asturiana nel marcu de les llingües romániques’ (18.30 hores) y Xosé Afonso Álvarez Pérez, de la Universidade de Lisboa, ‘“Abril buenu era si el gallegu non viniera”. Distribución geoparemiológica de refrenes meteorológicos’ (19.30 hores). Pa zarrar esti primer día de les xornaes, l’Academia de la Llingua Asturiana (ALLA) va presentar la edición dixital del ‘Lletres Asturianes 107’ y la revista dixital ‘Ciencies. Cartafueyos de Ciencia y Teunoloxía 2”.

El miércoles l’actividá tamién va principiar a les 16 hores, nesta ocasión cola ponencia ‘Travesíes de la poesía asturiana’ de Leopolodo Sánchez Torre (Universidá d’Uviéu) y trés comunicaciones tres la so finalización, alredor de les 17 hores: ‘Poesía n’asturianu de Félix Aramburu’, de Xosé Ramón Iglesias Cueva; ‘Delles constantes temátiques na poesía del Surdimientu. Una güeyada a l’antoloxía Palabres’, de Cristina García; y ‘Delles aportaciones pa una historia de la publicidá n’asturianu’, d’Inaciu Galán. Tres un alderique y una posa, les comunicaciones van continuar a les 18.15 hores, nesta ocasión con ‘Aspeutos de les rellaciones ente tradición y creación lliteraria, de Roberto González-Quevedo; ‘Brotos cativos: una mirada circunstancial sobre dellos poetes últimos’, de Xosé Bolado; y ‘La (des)protección de la llingua en Lleón y Zamora’, de Nicolás Bartolomé Pérez.

Completen esti segundu día, a partir de les 19.15 hores, la ponencia ‘Una güeyada a la novela negra asturiana de güei’, a cargu de Emilio Frechilla (Universidá d’Uviéu) y la presentación de ‘Tirán el Blancu’, obra traducida al asturianu por Pablo Suárez García y coeditada pola ALLA y l’Acadèmia Valenciana de la Llengua. L’actu va contar cola presencia de los presidentes de les dos entidaes, Ana María Cano y Ramon Ferrer, de manera respeutiva.


Pieslle oficial

Cano va ufrir tamién una ponencia conxunta na apertura de la xonada cabera, de nome ‘Etimoloxía asturiana ya etimoloxía romance: aportaciones mutues nun contestu de camudamientu metodolóxicu pendiente’ (16 hores), con Éva Buchi, d’ATILF/CNRS y Université de Lorraine, y María Reina Bastardas, de la Universitat de Barcelona. Tres un alderique, alredor de les 17 horas, van tener llugar les comunicaciones ‘La traducción nel sistema lliterariu asturianu (II). La poesía del sieglu XVIII’, de Marta Mori d’Arriba; ‘Evolución de la parroquia de La Santa Cruz de Xove (Xixón)’, de Cristina García-Sampedro; ‘L’agua menudo: nomes y variación xeolectal’, d’Héctor García Gil; y ‘De lo prerromano a lo medieval: la formación del paisax d’Asturies’, de Margarita Fernández Mier.

A les 18.30 hores, Próspero Morán va continuar cola comunicación ‘Aportaciones del periodismu dixital al desendolcu históricu de la Llingua na Asturies contemporánea’, a la que va siguir ‘Industrializar o perecer. Los medios de comunicación como motores de revitalización cultural’, de Cristóbal Ruitiña, y ‘Toponimia de monasterios medievales escaecíos’, de Martín Sevilla Rodríguez. El pieslle oficial de les XXXI Xornaes Internacionales d’Estudiu va ser a les 20.30 hores, pero enantes, a les 19.30 hores, Elena E. Rodríguez Díaz, de la Universidad de Huelva, va dar la ponencia ‘Lengua y escritura en el Alto Seya según los documentos de la Edad Media y la Edad Moderna’.

Les persones que quieran matriculase a les xornaes de l’ALLA pueden facelo dende esti momentu na sede de la institución académicia, asitiada na uvieina cai L’Águila númberu 10, o nel teléfonu 985.21.18.37. Les persones qu’asistan a toles actividaes van recibir un certificáu acreitativu.

Fonte: Asturies.com