Marxinación del topónimu tradicional en «Xixón de sidra»

Iniciativa pol Asturianu vien de denunciar que’ l certame Xixón de sidra dexa nel so logotipu nun «tamañu ínfimu» la forma Xixón, a favor de Gijón, «cuando non la fai desapaecer, como ocurre nos toneles instalaos en tola ciudá». La falta d’usu del asturianu nel mundu de la sidra, «tan apegáu al nuestru idioma», ye dalgo «inesplicable» pa la organización.

«Yá solicitamos a les conceyalíes responsables, la de Turismu y la de Cultura qu’organicen esti eventu, al traviés de delles quexes en rexistru, y, amás, a la empresa contratada, Fenicia Marketing Gourmet, que tengan en cuenta l’usu del asturianu nesta y en futures ediciones, poniéndonos a la so disposición pal asesoramientu nesta cuestión», indica l’asociación.

Amás, afirmen que solicitaron a la Sociedá Mista de Turismu del Conceyu de Xixón qu’efectúe un usu continuu del asturianu nes sos actividaes. «L’usu del asturianu, xunto al castellanu si se quier, nos cartelos de toles actividaes del Conceyu o na publicidá, nun supón gastu nengún pa les arques municipales», diz Iniciativa, qu’esplica que’l mesmu Serviciu de Normalización Lingüística de Xixón pue adaptar tola cartelería al asturianu.

La organización llingüística recuerda qu’usar l’asturianu xenera un arrequecimientu social y cultural pa una ciudá onde ye la llingua d’una parte importante de la población y seña d’identidá de tolos xixoneses y asturianos. Amás, afirmen que ye un «estra» de cara al turismu «que lo ve como un elementu más de la nuestra cultura y como un atractivu turísticu».

Fonte: Les Noticies