Galeusca pide que la lliteratura en catalán, gallegu y vascu tenga más presencia, pero marxina al asturianu

Galeusca pide que la lliteratura en catalán, gallegu y vascu tenga más presencia nos medios y nes escueles, pero marxina al asturianu

DAMIÁN BARREIRO . UVIÉU -
La Federación Galeusca, entidá qu'axunta a les asociaciones d'escritores en gallegu, vascu y catalán, aconceyó en Donostia esti fin de selmana pa cellebrar el so alcuentru anual, onde se debatió sobre Oralidá. Lo que s'escribe pa dicir, una reflexón sobre les característiques de los testos creaos pa ser lleíos y interpretaos. Amás, nel Congresu aprobaron una serie de conclusiones, onde establecen la necesidá de que la lliteratura en vascu, gallegu y catalán tenga más presencia nel sistema educativa y nos medios de comunicación.


Asina, nel primer puntu afirmen que la lliteratura nestes llingües tienen que tener una presencia más intensa en tolos niveles del sistema educativu, «al tener en cuenta que les últimes reformes educatives pretenden la recentralización y nun falen de la existencia de les lliteratures minorizaes del Estáu». Coles mesmes, denuncien que los medios de comunicación nel ámbitu estatal, «como reflexu de la política activa de les estructures gubernamentales», nieguen y invisibilicen toles manifestaciones lliteraries que se producen «nes nuestres naciones».

Por eso, reclamen a les instituciones un esfuerciu añadíu y critiquen los conteníos «banales y evasivos» xeneraos poles industries y los medios de comunicación de mases. P'acabar, afirmen que como parte de la sociedá qu'alimenta les sos lliteratures, los escritores nun tán al marxe de los procesos históricos que viven les sos respectives «naciones» col oxetivu de cosiguir les cuotes máximes de soberanía: «Vamos siguir trabayando p'algamar la plena normalización de les nuestres realidaes nacionales y, por ello, de les nuestres cultures y sistemes lliterarios.

Ensin presencia asturiana

L'alcuentru nun contó con nenguna representación de la llingua asturiana, tampoco de l'aragonesa. La falta d'una asociación d'escritores en llingua asturiana, que si qu'existió nos 80 y 90, impide la entrada de la lliteratura nel nuestru idioma en Galeusca. Sicasí, nos noventa, l'asociación Escritores y Traductores en Llingua Asturiana (ETLLA) fixo contactos cola entidá, promoviendo l'aconceyamientu en Xixón de la directiva y onde se pidió l'ingresu de los escritores asturianos, midida pa la que llogró l'apoyu de l'Associació d'Escriptors en Llengua Catalana, pero la negativa de l'Asociación d'Escritores en Lingua Galega y la falta d'apoyu de los vascos fixo que l'apoyu catalán quedara curtiu.

Fonte: Les Noticies