El grupu políticu d'Izquierda Xunida nel Senáu va presentar una enmienda a los presupuestos xenerales pa qu'incluyan una partida económica destinada a la financiación de l'Academia de la Llingua Asturiana (ALLA), como asocede coles academies de les llingües catalana, gallega y vasca. Asina lo confirmó esti miércoles en rueda prensa'l senador d'IX, Jesús Iglesias, tres reunise con representantes de l'asociación Iniciativa pol Asturianu, que-y espresaron les sos inquietúes nesti sentíu.
Iglesias anunció la intención de la so formación de presentar una enmienda con esti planteamientu, destinada al debate de los Presupuestos Xenerales del Estáu pal añu 2013. Los mesmos, según matizó Inaciu Galán, presidente d'Iniciativa pol Asturianu, y tamién presente na rueda prensa, inclúin tres partíes pa les academies catalana (Institut d'Estudis Catalans - 341.340 euros), gallega (Real Academia Galega - 341.340 euros), y vasca (Euskaltzaindia - 179.000 euros).
La intención d'Iglesias ye llograr polo menos una partida, ensin precisar la so cuantía, nos presupuestos xenerales. Vítor Suárez, miembru d'Iniciativa y tamién presente nel actu, señaló que lo importante, más que la cantidá aportada, sería «abrir un camín» a la financiación del Estáu a l'Academia de la Llingua, como asocede con otres academies, que per otru llau tamién cuenten con financiación autonómico. Nel casu d'Asturies, «la financiación autonómico ye la metá de lo que l'Estáu da-yos a la vasca y a la gallega», señaló Galán. Según recuerda, esti añu'l Gobiernu d'Asturies comprometióse a aportar 168.000 euros a la institución asturiana.
Iglesias tamién va preguntar nel Senáu polos «incumplimientos» en materia de toponimia tradicional oficial, observaos nes señalizaciones que correspuenden a l'Alministración central. La intención del senador ye plantear la pregunta n'asturianu, aspectu que va tener que negociar cola presidencia de la cámara, al nun ser ésta llingua oficial.
Otra de les propuestes qu'IX recoyó d'Iniciativa pol Asturianu ye referente a la partida que los presupuestos nesti casu autonómicos destinen a la financiación de la Real Academia Española, y que sube nes cuentes del 2013 a 27.000 euros. Suárez recordó que la RAE ye l'academia de «un idioma que nun precisa protección porque nun cuerre nengún peligru de desapaición», polo qu'al so entender sería xusto qu'esta cuantía se destinare a l'Academia de la Llingua.
Fonte: Les Noticies
Paez que gracies al bon trabayu d'Iniciativa pol Asturiano tán surdiendo idees nel senu d'unu de los partíos políticos colos que s'aconceyó fai bien pocu, pos paez qu'IX remanez del llargu letargu más allá de les sos promeses electorales. Ta perbién pero agora hai que siguir nesta llínia pol la urxente supervivencia de la nuesa llingua. Norabona a Iniciativa pol Asturiano y a IX, y yá que sirva de revulsivu y exemplu pa los demás partíos(asturianos, que nun lo escaezcan) p'aunir postures ya intereses en favor de la llingua asturiana y la so oficialidá. La unión, siquier d'una mayoría, fai la fuerza.
ResponderEliminarJesús Iglesias, senador d'IX, va solicitar que se permita l'usu del nuestru idioma na Cámara Alta «pa llevar la reivindicación llingüística acullá del Güerca». Iglesias recordó que'l Senáu ye la Cámara de representación de les autonomíes y que nella se facilita l'usu de les otres llingües del Estáu con un sistema de traducción simultaneo. Por eso, va preguntar na Cámara Baxa polos «incumplimientos» en materia de toponimia tradicional oficial, observaos nes señalizaciones que correspuenden a l'Alministración central, y la intención del senador ye plantear la pregunta n'asturianu, aspectu que va tener que negociar cola presidencia de la cámara, al nun ser ésta llingua oficial.
ResponderEliminarUn avance importante :)
ResponderEliminarA la fin paez que daqué muévese y camínase.
ResponderEliminar¿Y ónde anden el restu de los partidos? ¿de xinta autonómica tragonicia?
ResponderEliminarAgora que nun apaez el gadoriu po nengún sitiu'l psoe tampoco mueve ficha ¿qué ye lo que pasa?
ResponderEliminarTenemos la cigua, hermanos.
ResponderEliminar