Los medios n’asturianu lleven la metada les sovenciones

DAMIÁN BARREIRO . UVIÉU -
El BOPA d’esti 22 d’ochobre publica la resolución pola que se conceden y denieguen subvenciones pa los medios de comunicación pol usu del asturianu y del gallego-asturianu. Son un total de 127.759,63 euros, lo que supón cuasi un terciu de la cuantía cola que contaron nel 2011, que foi de 373.500 euros. Sicasí, nesta ocasión parez que los proyectos con mayor puntuación son los que vienen de medios qu’utilicen n’esclusiva l’asturianu, que se reparten un 47,68% del total de la cuantía. Nel 2010 y 2011, la partida pa estos medios namás supunxo alredor d’un 21% del total.

Ello ye que según les bases de la convocatoria de subvenciones, l’oxetu d’esta midida ye la concesión d’ayudes económiques en réxime de concurrencia competitiva pa empreses periodístiques, radiofóniques, televisives o d’internet, poles inversiones realizaes na producción d’espacios onde s’utilice l’asturianu, o’l gallego-asturianu nel so ámbitu, a lo llargo l’añu 2012, bien de manera habitual n’informaciones xenerales, bien n’espacios periódicos y fixos, bien en programes estraordinarios d’interés especial, «pero siempre que tal usu contribuya a la normalización y dignificación del usu social de la llingua y sían espacios configuraos como propios del mediu de comunicación y asumíos por él».

Amás, dende anguaño, incluyóse una cláusala pola que s’establez que va valorarase’l distintu grau d’usu del asturianu o gallego-asturianu que faiga’l mediu de comunicación nel que s’inserta’l proyectu. Otra manera, establezse que van quedar escluíos aquellos proyectos que nun cumplan colos Decretos d’oficialización toponímica aprobaos pol Conseyu de Gobiernu.

Esto supón qu’empreses como Editorial Prensa Iberica (EPI), editora del diariu La Nueva España y qu’hasta’l momentu yera la más beneficiada nesta convocatoria, pase de los más de 60.000 euros que recibió nel 2011 a los 10.700 que recibe anguaño. Mentes que les distintes sociedaes d’El Comercio pasen de 49.461 nel 2011 a 12.336,22 nel 2012. Asina, rescampla la partida de «Alitar Asturies», la sección decana de la prensa n’asturianu y que pasa de los más de 18.000 euros del añu pasáu a los 4.934 d’anguaño. Otra manera, l’únicu programa n’asturianu de la televisión privada del país, L’andariegu de Canal 10, pasa de recibir 3.000 a 1.644 euros. Per otru llau, el servidor d’asturianu d’Europa Press tien la metá de la subvención que nel 2011 y queda con poco más de 15.000 euros.

La prensa n’asturianu tamién recibe menos subvención. Sicasí, al comparar el porcentaxe cola prensa en castellanu l’amenorgamientu ye muncho menor. Asina, Araz.net, editora del diariu dixital Asturies.com, pasa de 16.000 a cuasi 11.000 euros, mentes qu’Asturnews queda con cuasi 8.000 euros, en comparanza colos 10.000 del 2011. Publicaciones Ámbitu, editora de LES NOTICIES, recibe 17.000 pol diariu dixital y 13.500 polos númberos editaos anguaño del selmanariu en papel, desaparecíu en febreru. L’añu anterior recibiera 51.481 euros en total pol dixital y el selmanariu en papel. Una cifra que chocaba colos 60.565 de EPI, los 49.461 d’El Comercio o los 39.368 de la yá desaparecíu La Voz de Asturies. Per otru llau, Radio Sele, la única emisora 24 hores n’asturianu, pasa de 6.000 euros l’añu pasáu a 3.666 anguaño. Per otru llau, el portal dixital Infoasturies recibe pela primer vez una subvención, otorgándo-y el Gobiernu una partida de más de 7.800 euros.

Otra manera, la conseyería aprobó hai selmanes una modificación nos criterios de valoración. Esti cambiu supunxo que los proyectos de «ambitu comarcal o de siguimientu social restrinxíu» pasen de valorase con 10 puntos a facelo con 5. Esto supunxo que la emisora billingüe Onda Peñes, la más escuchada na so contorna, pase de recibir 7.000 a 822 euros.

Fonte: Les Noticies