La falta d’oficialidá dexa otra vuelta a l'ALLA ensin presupuestu del Estáu

DAMIÁN BARREIRO . UVIÉU -
Los Presupuestos Xenerales del Estáu (PXE) vuelven marxinar otru añu más a l’Academia de la Llingua Asturiana, que pola falta d’oficialidá de la nuestra llingua queda fuera de les partíes que’l Gobiernu central dedica a les instituciones culturales del Estáu español. Asina, la que según reza nel so decretu de creación tien como fin «dotar a la nuestra rexón del instrumentu que permita encarar con garantía les llabores afayadices pa’l mantenimientu del bable», nun va recibir nin un euru de Madrid.

Con too, los PXE van dar un recorte importante a los presupuestos de toles academies españoles. Asina, les instituciones culturales d’ámbitu estatal van sufrir un recorte pal 2013 del 39%. La Real Academia Española va pasar de 3,12 millones a ingresar del Gobiernu central 1,9 millones, mentes que la Real Academia de la Historia pasa de 916.000 euros a 558.000. Sicasí, esta última institución va recibir una partida específica de 99.000 pal mantenimientu y actualización del polémicu Diccionario Biográfico Español, qu’afirma que Franco foi «un xeneral valerosu y católicu que participó nun golpe d’Estáu contra un Gobiernu caóticu».

Tamién van ver reducida la so aportación nun 39% un total de trece instituciones asitiaes en Madrid, como l’Academia de Ciencias Morales y Política, la de Medicina o la de Belles Artes. Sicasí, les más afectaes son les destinaes a cuidar les llingües minoritaries del Estáu español: les academies gallega, catalana y vasca queden con un 50% menos del presupuestu, cantidá qu’hasta hai dos años yera d’un total d'un millón d’euros pa cauna d'elles.

L’aportación del Gobiernu central, que nestos casos se complementa coles aportaciones de diputaciones, Conceyos y Gobiernos autonómicos -nel casu de la vasca y la catalana reciben aportaciones de dos alministraciones autonómiques-, queda pal l’Institut d’Estudis Catalans en 341.000 -en comparanza colos 682.000 del 2012-, mentes que la Real Academia Galega pasa de 680.000 a 340.000. Otra manera, al igual que l’ALLA, tampoco nun recibe nenguna partida l’Academia Valencia de la Llengua. Sicasí, el presupuestu que-y apurrió la Generalitat valenciana nos dos últimos años tuvo cerca de los cuatro millones d’euros.

La presidenta de l'ALLA, Ana Cano, afirmó en xineru d'anguaño, nuna rueda de prensa col diputáu d'IX nel Congresu Gaspar Llamazares, que la institución que preside nun tendría nengún problema n'intentar que l'Academia recibiera una aportación del Gobiernu central pa desenvolver el so llabor, «pero hai mui poques posibilidaes porque lo que pasa coles otres llingües del Estáu nun ye comparable a lo que pasa cola llingua asturiana, que nun ye oficial», afirmó daquella.

La situación llegal del asturianu fai que l’ALLA quede como una de les instituciones culturales más marxinaes de tol Estáu no que se refier al presupuestu públicu. Precisamente, en febreru d’anguaño, el presupuestu de la institución saltó a la primera plana de l’actualidá depués de que’l Gobiernu asturianu -daquella nes manes de Foru Asturies- decidiera recurtiar un 40% la so aportación, lo que suponía pasar de recibir 230.000 euros nel 2011 a 134.320 nel 2012. Una partida que namás daba pa pagar a los cuatro trabayadores de l’Academia y a la llimpiadora -118.000 euros-, mentes que los 16.000 restantes diben destinaos pa la organización del Día de les Lletres. Con too, nun conceyu n'agostu col presidente nuevu, el socialista Javier Fernández, l’Executivu redució esi recorte al 30%.

De toles maneres, les 24 colecciones lliteraries y los concursos llingüístico-filolóxicos que s’entamen cada añu quedaron tocaos. Pel momentu, salvóse la celebración del Día de les Lletres y de la Univerdidá Asturiana de Branu, mentes que tovía nun se sabe que va pasar coles Xornaes Internacionales d’Estudiu, que s’entamen tolos años na Facultá de Filosofía y Lletres nel mes de payares.

Fonte: Les Noticies