Ñaz “Reciella”, l'asociación de families pol asturianu

El pasáu 19 de setiembre asentóse como asociación “Reciella: families pol asturianu”, grupu de families que llevaben aconceyando y organizando actividaes de diferente tipu a lo llargo d’esti añu 2012. L’asociación naz ensin ánimu d’arriquecimientu y tien como oxetivos fundamentales la tresmisión interxeneracional del asturianu nel ámbitu social y familiar y la enseñanza, promoción y difusión de la llingua asturiana nes primeres edaes; d’alcuerdu colo qu’apaez conseñao nos sos estatutos.

Asina les families que vienen averándose a l’asociación faenlo con neños y neñes que tán nes edaes comprendíes ente los 0 y los seis años, no que na enseñanza reglada apaez venceyao a la Educación Infantil. A xuiciu de los miembros de l’asociación esto ye asina por dos motivos fundamentales: per un llau la importancia que tienen estes edaes na tresmisión y deprendimientu de los idiomes, y en segundu pol vacíu llegal que presenta la non presencia de la Llingua Asturiana nel currículu d’Educación Infantil.Pal cumplimientu de los oxetivos marcaos Reciella plantega diferentes acciones, ente les que taríen la organización d’actividaes nes que la llingua vehicular seya l’asturianu, la realización y edición de materiales empobinaos al públicu infantil, o mesmamente la collaboración y convenios con otru tipu d’asociaciones, alministraciones o instituciones.

D’esta miente, y a lo llargo del branu, l’asociación vino organizando un programa d’actividaes n’asturianu ente les que tuvieron cuentacuentos o talleres d’instrumentos y cocina. La bona acoyida de les mesmes per parte de les families y los rapacinos foi lo qu’animó a los organizadores a dar un pasu alantre pa constituyir el grupu definitivamente como asociación.

Más información: Blogue de l'asociación Reciella

Fonte: Asturnews