Delles organizaciones faen públicu un manifiestu "en defensa del 25 de mayu"

  Asturias Laica celebra una ufrienda floral y una charra de Faustino Zapico n'Uviéu.

 El primer actu va tener llugar a les 13 hores énte la placa conmemorativa de los acontencimientos vivíos n'Asturies el 25 de mayu que ta asitiada na cai Cimavilla con Altamirano. Nesi momentu va facese llectura del manifiestu 'En defensa del 25 de mayu' que roblen tamién l'Ateneo Republicano de Asturias, l'Atenéu Obreru de Xixón, el Sindicatu Unitariu Autónomu de los Trabayadores de la Enseñanza d'Asturies (SUATEA), Izquierda Asturiana (IAS) y Izquierda Xunida (IX), y que pue lleer completu al final d'esta noticia.

 Mentes, pela tarde, ta prevista una conferencia baxo'l nome de 'El 25 de mayo en su contexto histórico', que va poner l'historiador Zapico. Va ser a les 18 hores na sala de Graos de la Facultá de Pedagoxía.

Manifiestu

Les organizaciones abaxo firmantes, que trabayamos pol bien y la concordia de toos y toes, facemos un llamáu pa que’l día 25 de mayu se reconoza y dignifique como amerita.
La mayoría del pueblu asturianu entá nun conoz lo qu’asocedió en data tan señalada.

Énte la invasión francesa de 1808, el 9 de mayu llegó’l corréu a Uviéu con órdenes pa sometese a la ocupación francesa y tamién cartes particulares qu’esplicaben lo que pasara’l 2 de mayu en Madrid. Informábase nelles sobre asturianos afusilaos poles tropes invasores. Emprimó entós n’Uviéu una revolución contra eses órdenes, que diría espardiéndose a toa Asturies.

El pueblu sulevóse contra les autoridaes de l’Audiencia y la Xunta Xeneral del Principáu que queríen acatar les órdenes que llegaben del mariscal francés Murat dende Madrid. Hasta entós tol poder exercíase en nome del rei absolutu, y les instituciones namái servíen al porgüeyu del cleru y la nobleza.

La Xunta Xeneral del Principáu, que s’aconceyaba nesos díes de mayu, na sesión del día 9 de tarde, énte la presión popular, na sala capitular de la catedral, aprobó desobedecer les órdenes de Madrid. Sicasí, cuando celebró otra sesión el día 13, asoraos poles consecuencies de lo qu’aprobaren y amedranaos pol rexente de l’Audiencia, cambiaron el so determín anterior, acataron les órdenes que llegaren de Madrid y claudicaron dafechu, inorando los pidimientos del pueblu.

Al ver que les autoridaes de la Xunta Xeneral del Principáu y de l’Audiencia se sometíen al invasor entregando la llibertá y la independencia, entamóse un llevantamientu.

El 25 de mayu de 1808 miles y miles de paisanos veníos de toa Asturies asaltaron la fábrica d’Armes d’Uviéu y con elles entraron na capital. Tomaron l’Audiencia, asitiada na cai Cimavilla d’Uviéu y, ellí mesmo, constituyeron un nuevu muérganu de gobierno que llamaron la XUNTA SUPREMA.

Lo primero que fixo la XUNTA SUPREMA (que nada tenía que ver cola Xunta Xeneral del Principáu que claudicara énte’l rexente’l 13) foi reconocer la soberanía popular. Ello ye, qu’“El poder, tol poder, reside y remanez del pueblu” y asina lo xuraron caún de los sos componentes. Declaró la guerra a Napoleón, unvió embaxadores a Gran Bretaña y formó un exércitu de 30.000 homes al que contribuyeron tolos conceyos.

Foi la primer vegada, non solo n’Asturies, sinón n’España, na qu’un muérganu de poder reconocía la soberanía popular. Y nun hai qu’escaecer qu’ésta ye’l fundamentu de la democracia. El 25 de mayu de 1808 reconocióse’l Pueblu como soberanu. ¿Pue daquién que se considere demócrata negase a conmemorar la data na que se reconoció la soberanía popular per primer vegada?

Estos fechos tienen entidá abondo pa considerase en sigo mesmos como constituyentes d’una de les xestes más importantes de la nuestra historia al igual que l’entamu de l’Asturies contemporánea nelaspectu políticu y institucional. Asturies pasa per una crisis de graves consecuencies no económico, no demográfico y no político. Namái una autentica democracia que surda de la voluntá popular va ser pa facer frente a esta grave crisis. Reivindicar y dignificar el 25 de mayu como data de importancia cimera p’Asturies ye un pasu importante porque significa y conmemora al pueblu soberanu.

Somos conscientes de que ye un empeñu difícil y el camín llargu, pero tamos convencíos dafechu de lo xusto y honrao de la nuestra reivindicación.

¡PUXA ASTURIES!
¡PUXA’L PUEBLU ASTURIANU!
¡PUXA’L 25 DE MAYU!                                                                                Fonte: asturies.com

Zapico va guiar un paséu pelos llugares clave del 25 de mayu del 1808

Cartelu Paséu históricu per Uviéu Mayu 1808

 L'actividá ta entamada por La Llegra, espaciu uvieín que tamién participa estos díes nes Xornaes de Consumu Responsable.

 L'historiador Faustino Zapico va encargase d'esplicar esti acontecimientu históricu mientres un paséu per Uviéu pelos llugares más relevantes. El 25 de mayu del 1808 la Xunta Xeneral proclamóse soberana rebelándose contra les tropes franceses de Napoleón qu’invadieren el país, lo que llevó a la organización d’un exércitu asturianu propiu y al unvíu d’embaxadores a Inglaterra pa pidir sofitu na llucha contra l’exércitu francés invasor.

 La cita va ser a les 18 hores, con salida del Llar La Llegra (El Postigu Baxu, 40). Otra manera, esti espaciu soberanista ta participando nes Xornaes de Consumu Responsable 'Pa gastalo d'equí y del tiempu' que ta celebrándose estos díes na ciudá. Esta tarde, a les 19.30 hores, acueye'l taller 'Supermercaos non'.                                                 Fonte: asturies.com   

Adxuntu	Tamañu
Cartelu Xornaes de Consumu Responsable

Los primeros datos del III Estudiu Sociollinguísticu d’Asturies anunciaránse nes selmanes próximes

Na semeya, Francisco José Llera Ramos y José Manuel Pérez Fernández.

  El mes de xunu ye la fecha que se manexa pa la espublización de los primeros datos del III Estudiu Sociollingüísticu d’Asturies, encargáu pola ALLA a Francisco José Llera Ramos. El caderalgu de Ciencia Política foi ún de los compareciente de la sesta sesión de la Comisión Especial d’Estudiu sobre'l Réxime de Proteición y Promoción del Asturianu na Xunta Xeneral.

  Xunto col caderalgu de Ciencia Política, intervinieron nesta ocasión Xabiel González Menéndez, presidente de Xeira; José Manuel Pérez Fernández, lletráu del Tribunal Constitucional y profesor titular de Derechu Alministrativo de la Universidá d’Uviéu; l’espertu gastronómicu Lluis Nel Estrada; el biólogu Bertu Ordiales; el sacerdote José Manuel García de Jesús ‘Pin’, presidente del Coleutivu Manuel Fernández de Castro; Carlos Pulgar, voceru nacional de la Xunta pola Defensa de la Llingua Asturiana (XDLA); Fernando Álvarez-Balbuena, vicepresidente de l’asociación El Teixu-Rede pal Estudiu y Defensa de la Llingua Asturllionesa; y Penélope Miranda, vocera de l’Asociación de Trabayadores de la Normalización Llingüística. Nesta ocasión tuvieron representaos toles formaciones polítiques, anque’l del PP s’ausentó mientres una bona parte de la sesión.

  Llera apuntó na so intervención que pronto van conocese los primeros datos del III Estudiu Sociollingüísticu d’Asturies. Nesi sen, esta tarde va aconceyar con a Ana María Cano y Xosé Antón González Riaño, presidenta y vicepresidente de l’Academia de la Llingua Asturiana (ALLA), pa falar d’esti asuntu y definir la fecha na que se van dar los primeros avances de dichu estudiu, previsiblemente nel mes de xunu. L'últimu espublizóse nel 2002, siendo'l primeru del 1994.

  Na so intervención na comisión del asturianu, el caderalgu señaló que “perder una llingua ye la erosión de parte del conocimientu humanu” y, nesi sen, que “la proteición d'una llingua ye obligación ineludible d'un grupu humanu”. Lo único debatible sería “cómo protexela, y eso ye cuestión de voluntá política”. Lo que sí ve necesario, como yá s’apuntara n’anteriores comparecencies, ye “un consensu” pa poder avanzar.

  Optimista col futuru del idioma, Llera esplicó que "tamos meyor n'habilidaes llingüístiques, pero peor n'identificación llingüística (normalización social,espaciu públicu del idioma)”. D’igual forma, afirmó que “pa dar un saltu cualitativu hai que facer les coses de manera distinta”.

Gallego-asturiano

  L’encargáu d’abrir la sesión foi González Menéndez, que tuvo qu’ausentase tres la so intervención. Nella apuntó que "la situación é dramática", tanto pal gallego-asturiano como pal asturianu, y llamentó qu’enantes “os nenos y os bolos falaben. Agora os bolos charren y os nenos non falen gallego-asturiano”. Pa iguar esta situación, a parte de la oficialidá, señaló a la escolarización, l’emplegu del idioma nos medios de comunicación y n’empreses, sobre manera nes agroalimentaries.

  Pérez Fernández, pela so parte, calificó la situación del asturianu y el gallego-asturiano como "anómala" y afirmó que la oficialidá ye’l primer pasu pa salvar esta “anomalía”. Una vegada algamada la oficialidá, "el siguiente pasu sería modular l'algame d'esa declaración", pa lo que fadría falta "una Llei de Normalización", aseguró.

  Na so opinión, ésa sería la única manera de “garantizar los derechos llingüísticos, la pervivencia del idioma y una progresiva equiparación de los derechos llingüísticos”. Darréu puntualizó que "la oficialidá nun lo soluciona too", y que mientres llega hai que tomar midíes pa sacar al asturianu de la situación marxinal na que ta.

  Otra manera, entrugáu por Andrés Fernández Vilanova 'Ron', representante de Podemos, sobre la especialidá docente, aseguró que "ye una cuestión de voluntá política. Xurídicamente nun hai nada qu'impida la creación de la especialidá docente". Nesi momentu yá taba ausente’l representante del PP, dalgo que llamentó Pérez Fernández.

Marca de calidá: oficialidá

  Estrada comparó l’asturianu como un productu de calidá que, como tal, necesita una marca de calidá que-y dea garantíes. “Y esa marca de calidá ye la oficialidá”, afirmó.

  "Ensin oficialidá, l'asturianu nun tien futuru y acabará desapaeciendo, como fadría'l Cabrales ensin la Denominación d’Orixe”, especificó’l cocineru, qu’entiende que’l sector agroalimentariu y la gastronomía asturiana nun se pueden entender si nun ye n'asturianu". Al respeuto aseguró que “el turista ye'l que menos s'estraña d'atopar una carta n'asturianu. Ve qu'hai una cultura detrás".

  La ciencia centró’l discursu d’Ordiales, que s’entrugó "¿Por qué perder esta riqueza?", en referencia al asturianu, una llingua que considera que “pue apurrir a la ciencia”. "La non oficialidá ye una prohibición inconcebible", siguió’l biólogu na so intervención.

Derechos Humanos

  El cura Pin amosó’l so esmolecimientu porque entiende que l'asturianu va hacia "el desaniciu dafechu". "Ye un motivu de preocupación dende l'humanismu cristianu", añadió, refiriéndose siempre a los Derechos Humanos. "La primer de les midíes ha de ser la oficialidá", aseguró’l sacerdote, que la considera "non condición suficiente, pero sí condición necesaria".

  Pela so parte, Pulgar afirmó que "nun hai solución” a la situación del idioma “ensin oficialidá" y dirixóse a los diputaos reclamando que "nun ye momentu de pidir, sinón de decidir cómo será esa oficialidá". Al respeuto, recordó-yos el ‘Proyeutu 2018 pa la Oficialidá’ col que la XDLA pretende abrir un procesu de reforma del Estatutu. “Tien que ser agora. Nun se sostién esta situación más tiempu", finó

El desaniciu, política llingüística

 Álvarez-Balbuena foi’l más críticu de tolos presentes al apuntar que “la política llingüística realmente esiste y tien ésitos y tamién limitaciones. L’ésitu ye que tuvo unos resultaos magníficos y el fracasu, que naide vamos ver la muerte del asturianu, del asturlleonés”. Y ye que, afirmó, “ési ye l’oxetivu de la  política llingüística”.

  Tres analizar dicha “política d’erradicación”, nel turnu d’entrugues apuntó como solución “problematizar la suerte del asturianu", esto ye, facer ver que la so sobrevivencia ye un problema grave. Ente los asuntos más llaceriosos, destacó la perda de la tremisión xeneracional.

  La última n’intervenir foi Miranda, que centró les sos pallabres na situación de los Servicios de Normalización Llingüística. Cifró en 15 los activos anguaños en 26 conceyos, pa depués calificar la política llingüística de “probe” y criticar que se centre sobre manera nel ámbitu cultural y lliterariu.

  "Nun se corrixen los errores que-yos treslladamos", añadió, pa falar después de la insostenibilidá llaboral, les inxerencies y la mala xestión de los equipos de gobiernu municipal como principales problemes de los SNL. Tamién echó culpa al Executivu, al que criticó, ente otros motivos, por nun llevar un control de los mesmos.

  "L'estatus xurídicu qu'equipará a les llingües ye la oficialidá, pero fai falta tamién una Llei de Normalización que la desenvuelva", finó Miranda, que demandó "axuntar esfuercios y non francer una riqueza patrimonial de tolos asturianos".

Entrugues de trés diputaos

  Ron, Concha Masa (Izquierda Xunida) y Nicanor García (Ciudadanos) foron los únicos diputaos qu’exercieron la posibilidá d’entrugar a los comparecientes. Na so intervención, García señaló tar d’alcuerdu coles pallabres de Llera de que "la llingua ye un vehículu de comunicación y patrimoniu del pueblu que la fala, non d'un territoriu”.

  Na cuenta de Twitter d’Asturies.com comentamos en direuto tola sesión. Calcando nesti enllaz pue consultar cómo se desendolcó la mesma minutu a minutu y conocer les declaraciones principales de los comparecientes y representantes políticos.
                                                                                                                    Fonte: asturies.com

L'ALLA abre la matrícula pa la prueba de conocencia de mayu

 L'esame va celebrase'l sábadu 27 a les 9.30 hores na sede de la institución n'Uviéu.

 “L'Academia de la Llingua Asturiana, sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu”, ta acabante d’abrir la matrícula del primer de los dos esámenes que celebra tolos años –el primeru ye en xineru–, que sirve pa que tolos ciudadanos interesaos puedan algamar el documentu qu’afita la so conocencia d’asturianu nel nivel 1 o básicu. Pa ello han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu.

 La prueba cuenta con dos partes, escrita y oral. La primera va principiar con un dictáu, pa continuar con una torna, una serie d’exercicios gramaticales y una redaición. Darréu, l’aspirante a algamar el títulu de conocencia pasará a otra sala u caltendrá una conversación breve con dalguna persona del xuráu que valorará’l so dominiu oral del idioma.

 Les persones interesaes en facer la prueba de conocencia tienen de plazu dende güei y hasta'l xueves 25 pa formalizar la matrícula na sede de la institución (L’Águila 10, Uviéu), con un preciu de 12 euros, nel horariu siguiente: de 9 a 15 hores y de 16 a 19 hores, de llunes a xueves; y de 9 a 14 hores, el vienres. L’esame va celebrase’l sábadu 27, a les 9.30 hores, nel propiu llar de l'ALLA.                                                                             Fonte: asturies.com

Resume de les intervenciones na quinta sesión de la comisión d'asturianu na Xunta Xeneral

por Pablo R. Guardado

Participaron nesta ocasión Carles Martí, David Coto, Esther Prieto, Ángela Sánchez Vallina, Inaciu Galán y David Guardado.

Esta mañana celebróse na Sala Constitución de la Xunta Xeneral una xornada nueva de la Comisión Especial d’Estudiu sobre'l Réxime de Proteición y Promoción del Asturianu. Martí, ex senador del Partit dels Socialistes de Catalunya (PSC) y codireutor de Seminario Multidisciplinar sobre el Plurilingüismo en España; David Coto, de Sidra L’Allume; Esther Prieto, d’Ediciones Trabe; Ángela Sánchez Vallina, de la editorial Pintar-Pintar; Inaciu Galán, presidente d’Iniciativa pol Asturianu; y David Guardado, de ‘Reciella. Families pol Asturianu’, foron los convidaos nesta ocasión, y éstes les so declaraciones principales.

• Martí: "Ye un honor y un placer participar nesta comisión" / "Ye un deber de la humanidá preservar les sos propies creaciones” / "Les llingües son tamién la espresión de la nuesa llibertá y tienen que ser elementu de derechu" / "Hai qu’apostar pol conocimientu, deprendizaxe y mayor usu posible les siete llingües españoles" /  “Ye fundamental la esistencia d'un pautu y un consensu llingüísticu” / “La oficialidá ye un instrumentu valiosu, pero ye necesario esi consensu”
• Coto: “Causa estrañeza qu’etiquetemos n’asturianu, y a nós causanos estrañeza esa estrañeza” / “Hai que frayar esa barrera pa dignificar l'usu del asturianu” / “Paez que l'asturianu chirría cuando lu sacamos de la esfera privada"
• Prieto: “Nun voi falar de la oficialidá porque, como yá saben y se lo dixeron munches veces enantes, ye una cuestión de derechos humanos" / “Tenemos que defender les nueses tradiciones” / “P’aumentar la venta de llibros ye fundamental que l’asturianu tea normalizáu na escuela y la visibilización de la producción editorial, sobre manera nos medios públicos”
• Sánches Vallina: “"Editar n'asturianu más qu'un negociu ye una cabezonería de les editoriales" / "Los editores necesitamos una master en xestión de subvenciones" / “Ye necesaria una Llei del Llibru n’Asturianu” / "Nun podemos presentar los nuesos llibros a los Premios Nacionales de Edición al nun ser l'asturianu oficial" / “La Feria del Discu y Llibru n'Asturianu d'Avilés foi probe”
• Galán: "L'asturianu ye una llingua en retrocesu pola falta de midíes que la normalicen" / “Habría qu’entrugar  a los diputaos si tienen intención de salvar el futuru del asturianu y proyeuta esta llingua o dexala morrer” / "La oficialidá ye fundamental pa iguar el tratu desigual que vive l'idioma"
• Guardado: "La clave pa la recuperación llingüística ye la tresmisión xeneracional del idioma" / “Pido a los diputaos que conviertan la sobrevivencia del asturianu en parte del consensu políticu” / "Hai que facer entender a la sociedá que l’asturianu ye importante p'Asturies" / "Que los políticos se decataren de que la perda de tresmisión oral ye un problema sería un reblagu importantísimu"

Na cuenta de Twitter d’Asturies.com comentamos en direuto tola sesión. Calcando nesti enllaz pue consultar cómo se desendolcó la mesma minutu a minutu y conocer tolos comentarios de los comparecientes y representantes políticos.

Fonte: Asturies.com

“Nun queremos acabar la llexislatura ensin aprovechar la oportunidá d’echar a andar una reforma estatutaria”, señala Candel

Manifestación pola oficialidá 2016

 La Xunta pola Defensa de la Llingua Asturiana (XDLA) entama esti vienres, con motivu del Día de les Lletres Asturianes, una manifestación pa reclamar la oficialidá del idioma. Como novedá, va presentar el ‘Proyeutu 2018 pa la Oficialidá’, que busca echar a andar una reforma del Estatutu al tener los sofitos suficientes.

 “P’aniciar una reforma estatutaria hai dos víes: que lo soliciten los conceyos o una cuarta parte del Parllamentu, esto ye 12 diputaos”, esplica Xosé Candel, de la XDLA, qu’asegura que cuenten “con un compromisu pa superar esa cifra de 12 diputaos cola que poder echar a andar dicha reforma”. Ensin querer citar quiénes apoyaríen usar la vía del artículu 56.1, recuerda que “hai trés partíos na Xunta Xeneral que sofiten la oficialidá de distinta manera”, esto ye Podemos (9), Izquierda Xunida (5) y Foro (3), calcando en que la suma de diputaos favoratibles “ye mayor de 12”.

 Candel reconoz qu’esti procesu nun asegura algamar los 27 diputaos necesarios pa reformar l’Estatutu, pa lo que sería necesariu l’apoyu de la FSA-PSOE, pero destaca que “nun queremos acabar la llexislatura ensin aprovechar la oportunidá d’echar a andar una reforma estatutaria y abrir alderique. Ye la primer vez que la Xunta Xeneral tien na mano aniciar un procesu de reforma ensin nengún de los partíos hasta agora mayoritarios”. P’algamar l’oxetivu final, la oficialidá del idioma, dende  la XDLA apunten como mui necesario “contar con una importante movilización social”, esperenando un apoyu civil asemeyáu o superior a les de les anteriores veces que se punxo sobre la mesa la reforma del Estatutu.

 De momento, la fueya de ruta va siguir, tres l’anuncia prevista na manifestación, con reuniones cola FSA-PSOE y Ciudadanos pa treslladar el proyeutu. La intención de la XDLA ye que l’apertura del procesu comience enantes de mayu de añu qu’entra, “siempre que se pueda entamar un debate seriu y con garantíes”, asegura Candel.

Salida a les 19.30 hores

 La manifestación ‘L’asturianu llingua oficial. El futuru nes nueses manes’ va partir a les 19.30 hores d’esta tarde de la Estación del Norte (Renfe) d’Uviéu, pa finar frente al Teatru Campoamor, onde a les 20.30 hores va dar comienzu l’actu de l’Academia de la Llingua Asturiana pol Día de les Lletres Asturianes. Organizaciones polítiques, sindicatos y asociaciones sofiten esta marcha pa reclamar los derechos llingüísticos de los asturianos y asturianes.                                                                                                  Fonte: asturies.com

Iniciativa pol Asturianu va participar un añu más na Manifestación pola Oficialidá col llema "Oficialidá pal asturianu ye futuru"

Esti vienres 5 de mayu los asturianos y asturianes vamos volver a salir a la cai pa reivindicar la reconocencia del estatus llegal d'oficialidá pal idioma nel Día de les Lletres Asturianes. Dende Iniciativa pol Asturianu sofitamos un añu más esta manifestación, participando de la marcha y animando a tolos nuesos socios, simpatizantes y en xeneral, a la sociedá asturiana, a llevantar la voz pola so llingua, que carez tanta necesidá d'acción per partes de les alministraciones, asina como polos falantes, que siguen ensin ver los sos drechos civiles básicos reconocíos.

Iniciativa pol Asturianu ye una organización que ñació pa implicar a tola sociedá asturiana nel procesu de recuperación y normalización del asturianu, y polo tanto camienta imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial. Ye por ellos qu'esti añu vamos ufrir dellos materiales pa usar na rede, nos perfiles o como difusión, asina como pa imprimir y usar en cualesquier ámbitu, col llema "Oficialidá pal asturianu ye futuru".

Con esti llema van vendese camisetes per encargu a lo llargo d'estos díes, entregándose na propia manifestación.

La Manifestación pola Oficialidá va salir el vienres 5 de mayu a les 19:30 hores de la Estación del Norte d'Uviéu. Animamos a toles persones enfotaes nel futuru del idioma a participar con nós na manifestación organizada pola Xunta pola Defensa de la Llingua Asturiana.

Iniciativa pol Asturianu recuerda dempués de la manifestación va celebrase nel Teatru Campoamor la Xunta Estraordinaria de l’Academia de la Llingua Asturiana y que la entrada ye llibre y de baldre. Animamos a la xente a participar d'esti actu de sofitu a la institución, qu'esti añu va entregar nel actu la primer edición del Premiu Nacional de Lliteratura Asturiana.

Fonte: Iniciativa pol Asturianu

El grupu d’Uviéu de La Escolina de Reciella echa a andar en La Gesta

• por Pablo R. Guardado

La Escolina de Reciella yá echó a andar n’Uviéu con ochos alumnos y alumnes qu’acuden toles tardes de los llunes al Colexu Públicu La Gesta p’averase a la llingua asturiana. D’esta forma aumenten a seis los grupos activos, al sumase al de Candás y a los cuatro de Xixón.

Mientres una hora a la selmana estos neños y neñes acceden al traviés del xuegu y l’aprendizaxe manipulativu y por descubrimientu al asturianu nun entornu de socialización cola reciella de la so edá, siempre col acompañamientu de profesoráu especializao y en grupinos pequeños. Esta xera compleméntase con actividaes qu’entama ‘Reciella. Families pol Asturianu’ una vegada al mes en fin de selmana, como foi nesti abril la visita a la Güerta Escuela La Llera.

Cola apertura del grupu d’Uviéu, La Escolina de Reciella cuenta agora con un total de seis, yá que se suma al aula del candasín Poeta Antón de Marirreguera, a los dos del xixonés Colexu Públicu Xovellanos (2-3 y 4-5 años) y a la otra novedá d’esti cursu, los dos del tamién xixonés García Lorca (2-3 y 4-5 años). Nel casu del de La Gesta, ta compuestu por ocho alumnos y alumnes de 3 a 5 años.

Na imaxe, ún de los del grupos del Xovellanos de La Escolina de Reciella.

Fonte: Asturies.com

Los autores dramáticos n'asturianu alderiquen sobre l'estáu del sector

• . El sector del llibru n'asturianu participa nuna xornada nel Campoamor
• . "Hai que llograr que la lliteratura n’asturianu tea de moda”

Cartelu del I Alcuentru d'autores dramáticos n'asturianu

 Cultura entama esti alcuentru al rodiu de la creación teatral tres el celebráu a primeros de mes col llibru como protagonista.

 Fernando Padilla, direutor xeneral de Planificación Llingüística y Normalización, va presidir el I Alcuentru d'Autores Dramáticos n'Asturianu, que va comenzar a les 17 hores hores d'esta tarde nel Salón de Té del uvieín Teatru Campoamor. Ésti va consistir en dos meses redondes, siendo la primera 'Escribir teatru n’asturianu anguaño', cola participación de Sergio Buelga, José Ramón Oliva, Dolfo Camilo Díaz y Cristina Muñiz.

 Darréu, va ser el turnu d'Antón Caamaño, Roberto Corte, Xosé Ramón Martín Ardines, Marga Llano y Laura Iglesia, que van aldericar sobre 'El camín a les tables n’asturianu'. Con esta iniciativa, la Conseyería d'Educación y Cultura pretende axuntar a creadores en llingua asturiana pa que traten sobre la situación del so sector, siguiendo la mesma idea que se punxo en práutica'l pasáu día 1 con editores, llibreros, distribuidores y bibliotecarios sobre'l mundu del llibru n'asturianu.                                                                     Fonte: asturies.com

La Lliga Celta d’Asturies convoca una concentración en defensa l’arte asturianu

Dende la Lliga destaquen l’estáu de desdexamientu nel que s’alcuentra l’emportante padremoñu hestóricu-cultural d´Asturies y aleguen que  “Ye munchu más que monumentos, ye parte de la identidá d´un pueblu, l´asturianu

Llamen a participar nesta concentración a partíos políticos, istituciones, organizaciones, coleutivos y a la ciudadanía; en xeneral, “a toos aquellos que consideren que curiar de lo propio merez la pena”.

Nel actu, que tendrá llugar el prósimu sábadu 25 de marzu delantre de l´ilesia de Santuyanu na cai Selgas 1 d´Uviéu a les 11:00h, lleeráse l’analís que la Lliga Celta d’Asturies fai de la situación del prerrománicu asturianu anguañu, asina como un decálogu de midíes de baxu coste y poca complexidá operativa que podíen entamar a facese darréu y que tendríen l’oxetivu de caltener y conservar un l´Arte Asturianu, un padremoñu únicu y diferenciáu d’incalculable valir.

De magar esti actu reivindicativu pola correuta xestión del nuesu padremoñu, a les 12h ufrirán nel vecín Hotel d´Asociaciones Santuyanu una conferencia entitulao “Monumentos altomedievales d´Uviéu: nuevos enfoques y perspeutives Impartía por Francisco José Borge Cordovilla, autor de Mirabilia Ovetensia, investigador del Arte Asturianu y miembru docente na fastera cismontana d´Asturia, ye dicir, en Llión.

Fonte: Infoasturies

La oficialidá protagoniza esti mes les comparencies sobre’l Réxime de Proteición y Promoción del Asturianu

La Sala Constitución de la Xunta Xeneral acoyó por tercer miércoles les comparencies informatives de la Comisión Especial d’Estudiu sobre’l Réxime de Proteición y Promoción del Asturianu. Nesta ocasión participaron los profesores  Isabel Hevia, José Alba, David Melendi, Pedro Suárez Rodríguez y Enrique del Teso.Esta tercer xornada de les comparecencies desenvolviose pa averase otra vuelta al papel del asturianu na Educación y la so presencia na universidá y nos campos nos que yeren especialistes los convidaos, como asocediere yá na segunda sesión del 8 de marzu, onde tuvieron los tamién profesores universitarios José Antonio Gómez, decanu de la Facultá de Filosofía y Lletres, David Rivas, profesor de la Autonoma de Barcelona y Próspero Morán, profesor de didáctica de la llingua y periodista espertu en comunicación dixital.

Los profesores que participaren esti miércoles 15 centraron les intervenciones teniendo tamién la oficialidá de fondu, como ua ficieren la selmana pasada David Rivas y Próspero Morán, que punxeron enrriba la mesa’l valir económicu de la cooficialidá y so impactu positivu nel desenvolvimientu económicu d’un páis como’l de nueso na sociedá de la información.

Esti tercer día, José Alba, profesor de Economía Aplicada de la Universidá d’Uviéu, recoyó la importancia del conceptu ‘lo nueso’, del que sintiera falar al Nobel de Lliteratura Seamus Heaney,mentantu’l profesor de Llingüística Xeneral, Enrique Del Teso, amosó la dificultá que nestos tiempos tien una llingua minoritaria, amenazada pol desenvolvimientu tecnolóxicu. Isabel Hevia, presidenta de l’Asociación Asturiana de Pedagoxía defendió’l billingüismu por resultar beneficioso pal desarrollu d’escolinos y escolines, y pidió dignificar l’emplegu del asturianu. David Melendi, profesor del Área d’Inxeniería Telemática nel Departamentu d’Informática d’Uviéu, defendió pela so parte la creación de neoloxismos nel so campu, equiparando la capacidá del asturianu pa ello a toles demás llingües.

Fonte: Asturnews

Comienza un cursu avanzáu de llingua asturiana n'Uviéu

Cartelu del cursu

 Entámalu la XDLA y ta destináu a adultos.

 Esti cursu d'afondamientu llingüísticu va escomenzar esta tarde a les 19 hores, nel llocal de la Xunta pola Defensa de la Llingua Asturiana (XDLA), el Conceyu Abiertu, asitiáu na cai La Gascona númberu 12, baxu A. En total, va tener 40 hores de llargor, repartíos en sesiones de dos hores, los martes y xueves.

 Héctor García Gil van encargase de poner les clases, que tienen como oxetivu que los asistentes puedan algamar un bon usu del idioma tanto a nivel escritu como oral, amás d'afondar nes rellaciones ente llingua y sociedá. El preciu de la matrícula completa ye de 30 euros y los asistentes nun necesiten tener titulación nenguna o profesión concreta, anque aconséyase una conocencia básica de la espresión escrita y oral del idioma.

 Pa más información sobre'l cursu pue contautase cola XDLA al traviés de los teléfonos985.22.95.53 y 679.650.998, o del corréu electrónicu info@exunta.org. La Conseyería d’Educación y Universidaes reconoz al coleutivu cívicu como entidá organizadora d’actividaes de formación permanente del profesoráu.                               Fonte: asturies.com

El sector del llibru n'asturianu participa nuna xornada nel Campoamor

   Celébrase la I Xornada d'Edición n'Asturianu, que va acoyer dos meses redondes.

  El Salón de Té del uvieín Teatru Campoamor va acoyer esta tarde, de magar les 17 hores, esta iniciativa de la Conseyería d'Educación y Cultura, na que van participar representantes de los distintos sectores venceyaos al mundu del llibru: editores, llibreros, distribuidores, bibliotecarios, etc. El direutor xeneral de Planificación Llingüística y Normalización, Fernando Padilla, va abrir les sesiones de trabayu con una intervención na que va dar datos sobre la edición n'asturianu nos últimos años.

  De siguío van comenzar dos meses redondes, moderaes pola escritora y periodista Ana Vanessa Gutiérrez, 'Los caminos de la edición. ¿Qué pasa col llibru n’asturianu?' y 'L’arte d’editar n’asturianu en 2017. Perspectives', que van contar con representantes de delles editoriales asturianes, l'Asociación de Llibreríes del Principáu d'Asturies, la Rede de Biblioteques Públiques d'Asturies, les empreses de distribución y los medios de comunicación.                                                                                             Fonte: Asturies.com