13/5/17

THOMAS, EL DE LA GUERRA CIVIL

Hugh Thomas, semeya José Huesca 
Vicente García Oliva, 11 mayu 2017

   Morrió l’historiador Hugh Thomas, nomáu Barón pola so “graciosa maxestá” nel añu 1981 y que tuvo un percorríu abondo pendular nes sos afiliaciones polítiques (llaboristes, conservadores, lliberal demócratas…) Fue un escritor d’esos que llamen hispanistes, por dedicar una gran atención a los temes de la historia d’España. Nos años de la clandestinidá fue un paisanu mui respetáu porque publicó un llibru que munchos teníemos como de cabecera: “La guerra civil española”. Y ye que, nuna época en que los escritores del réximen teníen campu llibre pa cuntar les sos mentires partidistes (Joaquín Arrarás, Ricardo de la Cierva…) “el Thomas” -como lu llamábemos entós- fue una bocalada d’aire fresco que daba una información mui cercana a cómo se desendolcaron los dramáticos fechos de la nuestra guerra civil. 
  Yo recuerdo aquella edición de Ruedo Ibérico qu’entovía debe andar per casa, coles tapes de cartón masuñaes de remanalu y prestalu a unos y otros. Lo demás qu’escribió nunca nun  llegó, al mio modestu talantar, al altor científicu y a la popularidá que tuvo aquel primer llibru suyu. Lo qu’escribió sobre l’Imperiu Español dende Colón a Felipe II, paecióme un “refritu” d’otros autores y coses yá superconocíes con mui poques aportaciones personales, dicho seya con tolos mios respetos.
  Esti día llega l’anuncia de la so muerte, y per unos momentos recuerdólu y recuérdome naquellos difíciles años de la vida española y, polo que supunxo, nun puedo dexar de dedica-y una alcordanza pa esi home qu’introduxo una pequeña lluz ente tanta escuridá como había. Por ello, deséo-y que la tierra-y seya leve al ilustre historiador inglés Hugh Thomas.                                          Fonte. trabayudecampu.com

8 comentarios:

  1. Bien ciertu, Hugh Thomas pa muncha xuventú fue una bocalada d’aire fresco que daba una información mui cercana a cómo se desendolcaron los dramáticos fechos de la nuestra guerra civil, DEP.

    ResponderEliminar
  2. A munchos abriónos los güeyos de tantes mentires amañaes polos historiadores de dambos dos bandos. Gracies Thomas.

    ResponderEliminar
  3. Un homenaxe póstumu al historiador imparcial y neutral, seriu, de méritu, pa con los fechos acaecidos.

    ResponderEliminar
  4. Loor a la memoria del investigador independiente y neutral.

    ResponderEliminar
  5. Grande Thomas,In memoriam.

    ResponderEliminar
  6. DEP el perbón, el meyor, el neutral, hestoriador de la guerra civil española.

    ResponderEliminar
  7. Siempres tendrá un llugar de privilexu na memoria d'España, míster Thomas.

    ResponderEliminar
  8. Sí que Hugh Thomas tien un sitiu nel cuadru d'honor na hestoria d'España y merez un homenaxe póstumu con tolos honores.

    ResponderEliminar

Los comentarios tán pendientes de moderación. Espublizaránse lo primero dable.