La RTPA entama una programación especial pola 38 Selmana de les Lletres Asturianes

La Radio  Televisión del Principáu d’Asturies entama esti martes 2 de mayu a emitir una programación especial con motivu de la 38 Selmana de les Lletres Asturianes, que col títulu del llema de la selmana, en ‘Lletres, femenín plural’, va incluyir noticies nos informativos, espacios de lliteratura y l’estrenu de películes doblaes al asturianu.

Los informativos de la Radio Televisión del Principáu d’Asturies van incluyir toa esta primer selmana de mayu noticies n’asturianu y van separtase espacios pa la lliteratura en llingua asturianaescrita por muyeres que participen en Lletres, femenín plural, enantes de TPA Noticies 1ª edición, enantes del western y enantes del prime time.

La programación especial entama esti martes 2 de mayu na TPA cola emisión en direutu de la llectura de testos n’asturianu na Xunta Xeneral del Principáu d’Asturies y el miércoles va estrenase La cocina de les lletres, de Xuan Bello. Les escritores protagonistes del primer capítulu, tituláu Les muyeres y los díes, van ser: Consuelo Vega, Laura Marcos, Marta Mori y Berta Piñán.

Sigún fai anuncia na so web la TPA, el xueves 4 de mayu, nel programa Pieces, Xuan Bello, Premiu Nacional de Lliteratura, presenta El llibru nuevu, una coleición de poemes inéditos que llega depués de venti años ensin publicar poesía en volume. Y amás, el grupu Hoboken presenta’l so discu homónimu, y visiten la esposición Diálogo social, de Lorena Lozano y Juanjo Palacios.

Pala fin de selmana, resérvense 3 películes comerciales que van programase doblaes en versión asturiana: Ocean’s eleven, Greystoke y Orixe.
El vienres, 5 de mayu, pela nueche, RTPA va emitir Ocean’s Eleven n’asturianu. Depués los espectadores van tener otra oportunidá d’esfrutar de la lliteratura n’asturianu escrita por muyeres en Lletres, femenín plural.  El sábadu, 6 de mayu, a les 15.30 h, Greystoke n’asturianu y nel late night, Orixe.

Per otra parte, tamién va emitise’l microespaciu Dicires a lo llargo la selmana como elementu de continuidá y pal domingu, 7 de mayu, ta previsto fútbol en direutu narráu n’asturianu. TPA va emitir, a les 12, el partíu Lealtad-Somozas.

La llingua asturiana tamién va tener protagonismu na programación de la radio autonómica asturiana, RPA y asina, baxo la direición de Goxe Producciones, que nos últimos años yá s’encargó de la programación especial de RPA pa la Selmana de les Lletres, a lo llargo d’estes xornaes d’homenaxe a la nuestra llingua y cultura, van emitise 35 pieces radiofóniques.

Toes elles van profundizar sigún la cadena asturiana “nel papel de la muyer nel pasáu, presente y futuru de la lliteratura asturiana. Los espacios van poder sentise a lo llargo de la programación de RPA depués de cada boletín informativu y caún va tar dedicáu a un argumentu concretu, con temátiques como la vida y obra de les autores más importantes de les nuestres lletres, los llibros asturianos más importantes escritos por muyeres, les obres más destacaes de los últimos años”. Otra manera, “una parte de les pieces va consistir nuna esbilla de poemes incluíos nel llibru Escritores asturianes. Antoloxía de testos n’asturianu y gallego-asturianu, que la Conseyería d’Educación y Cultura va repartir de baldre esti vienres 5 de mayu, Día del Libru Asturianu”. Pa finar, el vienres, 5 de mayu, a les 20 hores, emitirase’l partíu Oviedo–Alcorcón en directu, narráu n’asturianu.  y depués, a partir de les 22:15 hores, RPA va emitir l’actu institucional de l’Academia de la Llingua desde el teatro Campoamor.

Per otru llau, ente’l martes 2 y el llunes 8 de mayu va emitise una axenda diaria onde va dase cuenta de toles novedaes de la Selmana. Esti espaciu, que va presentar Xune Elipe, va emitise a les 14.50, ente Asturias hoy 2ª edición y Tiempo añadido.

Fonte: Asturnews