Los diputaos de Xuníos Podemos, Compromís y ERC sofiten la oficialidá

Diputaos de XP, Compromís y ER sofitando lal oficialidá nel Congresu

Diputaos de Xuníos Podemos, Compromís y ERC sofitaron esti xueves nel Congresu la oficialidá del asturianu, llevando camisetes reivindicatives de la XDLA y d’Iniciativa pol Asturianu. El grupu parllamentariu de Xuníos Podemos presentó una enmienda a los Presupuestos pa la inclusión d'una partida pa l’Academia de la Llingua Asturiana.

D’esta forma, la coalición eleutoral pretende que la institución académica reciba perres de l’Alministración central, al igual que les academies catalanes, gallegues y vasques, pa la realización del so llabor, yá de por sí llendáu poles escases partíes que vien recibiendu del Gobiernu asturianu. Diputaos de Xuníos Podemos y Compromís quixeron tamién sofitar la oficialidá del asturianu cola muestra de camisetes reivindicatives na puerta del Congresu y cartelos de la manifestación de la Xunta pola Defensa de la Llingua Asturiana (XDLA) de mañana n'Uviéu (19.30 hores, Estación del Norte), semeya na que nun pudieron finalmente participar representantes d’ERC pese a esponer el so deséu n’apaecer.

Inclusive, Irene Montero, vocera de Xuníos Podemos, llevó una camiseta d’Iniciativa pol Asturianu na so intervención énte la prensa tres la sesión del Congresu polos Presupuestos Xenerales del Estáu. Pablo Iglesias tamién amosó en redes sociales el so apoyu a la oficialidá del asturianu.                                                                              Fonte: asturies.com