UNA DE LLINGUA

Ana Cano  y  González Riaño.   Semeya : El Comercio.

Por Vicente García Oliva, miembru de númberu de l'ALLA

  Diba yá tiempu que tenía un poco escaecía a la llingua asturiana. La que me sirve como vehículu pa espresar les mios opiniones. Inclusive nada punxe del relevu na presidencia de l’Academia de la Llingua, a la que m’honro en pertenecer (como suel dicise nestos casos) Aprovecho, entós, pa despachar dalgunes cosines que cinquen a esti tema.

  El relevu nos cargos dirixentes de l’Academia hai que velu como dalgo normal. Son yá munchos años d’un trabayu que desgasta abondo porque, anque la xente nun lo crea, la xera de la másima institución llingüística asturiana crea unes tensiones qu’acaben por pasate factura. Ana Cano, sobre too, y tamién Roberto González-Quevedo como Secretariu, lleven yá tiempu amosando’l deséu de dexar pasu a otros académicos nuevos que los releven nesos trabayos tan necesarios como cansos. El nuevu Presidente -Xosé Antón González Riaño- ye’l relevu natural na presidencia pues, como Vice-presidente, lleva tiempu compartiendo’l llabor de la Presidenta trabayando, coldu con coldu, con ella y conociendo de primer mano tolos problemes del funcionamientu de la institución. El restu de los “nuevos”, ta formáu por tres llingüístes tamién conocedores d’esos problemes de los que falamos: Marta Mori, Carme Muñiz ya Iglesias Cuevas. Seguro qu’esti nuevu grupu direutivu va a dar puxu a l’Academia y a abrir nuevos caminos de futuru.

  Paezme una metedura de pata mui gorda la prohibición a la siempre combativa Xunta pola Defensa de la Llingua, organización que lleva tiempu abondo faciendo un llabor eméritu, la cellebración d’una conferencia nel marcu del Arcu Atlánticu. La disculpa de que ye un tema políticu nun se tien en pie, primero porque política ye cuasi tolo que se fai o se dexa de facer (política económica, política cultural, política llingüíistica…) y, amás, hai que dexar d’entender la política como dalgo que va a la escontra de dalguién y devolve-y al bon gobiernu de la “polis” el noble significáu que siempres debió tener. Cuido que la Conceyalía del Ayuntamientu, que nun ye ayenu a la nuestra llingua, rectifique y “saque la pata” que tan mal metió.

  Lo del PP cola llingua del nuestru país ye de preocupar. Nun ye que nun seyan favoratibles al so emplegu, nin neutrales, nin siquier contrarios. Ye que tienen entamada una cruzada escontra ella. Ye, nidiamente, dalgo visceral, incomprensible nuna xente que se supón que nació equí y que, d’una manera o otra, debiere sentir tolo nuestro. Pue tase en contra, repito, pero resúltame vomitiva esa campaña pa cargase una llingua que lleva sieglos ente nosotros, que falaron los nuesos antepasaos y que, probitina ella, consiguió llegar malapenes hasta’l sieglu XXI. L’últimu recursu ante el Tribunal Superior de Xusticia d’Asturies pol Plan Pilotu sí que ye de xulgáu de guardia. Dalgún día la Historia-yos pedirá cuentes.                          Fonte: trabayudecampu.com

Ester Sánchez y García Oliva presenten a Etenko, una neña que fraya colos estereotipos sobre la muyer

‘Etenko y los patines maraviosos’ de Vicente García Oliva

 ‘Etenko y los patines maraviosos’ ye’l cuentu infantil últimu de Vicente García Oliva, con ilustraciones d’Ester Sánchez. Esta neña tan especial buscar frayar tolos estereotipos y suaña con patinar, volar y salise d’esa realidá que la empequeñez.

 Un prólogu informativu sobre’l papel de la muyer na sociedá, que la lliteratura repitió y repite tantes veces, sirve p’abrir esta obra: reducíes a seres pasivos, secundarios, ayenos a la épica y al protagonismu reserváu namái pa los homes. Etenko ye consciente de qu’hai que lluchar conta munches lleis y por eso suaña, patina y vuela.

 D’esta forma, la neña busca salir d’esa realidá que la empequeñez y construir un mundu alternativu que, para que pueda esistir, primero hai que lo imaxinar. Les ilustraciones de Sánchez, acompañaes de breves testos de García Oliva, déxennos ver estes ilusiones d’Etenko nuna cuidada edición de Pintar-Pintar.                                       Fonte: asturies.com

“EX LIBRIS”: Un mal nome/ Un mal nome

Por Vicente García Oliva
. Títulu: “Un mal nombre”/ "Un mal nome"

. Autora: Elena Ferrante

. Torna: Celia Filipetto

. Editorial: Lumen

. Añu: 2016

UNA PASABLE SEGUNDA PARTE.- Como yá falé de quién yera la famosa “Elena Ferrante”, aclarando que ye un alcuñu de dalguién que nun se conoz, paso direutamente a la segunda novela d’esa famosa tetraloxía que ta agora tan de moda. Tanto, que los críticos, los que lleen a  los críticos y, penriba de too, editores y llibreros llancen les campanes al vuelu (supongo que tarán bien agarraes) y nun aforren piropos pa definir a esti nuevu fenómenu lliterariu, nunca vistu dende  tiempos inmemoriales. Se conoz que yá va pasando’l fenómenu “Patria” y hai que siguir vendiendo. Y nun ye que tea mal, nin muncho menos, lo qu’escribe la Ferrante (quien quiera que seya). A la escontra. Si dalgún tien la paciencia y el tiempu de relleer la mio crítica a “La amiga estupenda” (mal títulu) verá que la pongo bien y qu’espero esperanzáu (toa espera implica esperanza) esta segunda parte qu’agora comento. Pero bueno, la cosa nun ye pa tanto.

Porque, n’efeutu, la  primera metada de “Un mal nombre” ye abondo repetitiva. Nes primeres doscientes o doscientes cincuenta páxines, la historia sigui pasu ente pasu les andances de les dos amigues, Lila y Lenú, y los sos avatares colos mozos y col barrriu. Pero ye que, eses andances y esos avatares, son calcaos a los que yá nos cuntó la señora Ferrante na primer novela. Nun pasa nada nuevo embaxo’l sol. Mesmes persones, mesmos sentimientos, mesmos resentimientos… La aición malpenes avanza nin nel esterior, nin nel interior de les protagonistes y los sos amigos. Y hai qu’esperar a qu’ Elena, Lenú, decida dir a estudiar y vivir a Pisa, pa que la novela, entós sí, garre un puxu del que carecía hasta entós. De magar esi momentu, ya igual gracies a la separación física de les dos amigues, principien a surdir los cambeos: Lenú céntrase nos sos estudios y meyora la so seguridá personal. Conoz mozos y pásen-y coses. Lila, la fía del zapateru, sigui nel barriu y principia una inaparable decadencia, un dolorosu camín hacia l’esaniciu del que paez nun poder salir. Sólo al final, col regresu de Elena Greco, Lenú, al vieyu barriu, vuelven a alcontrase los caminos de les dos amigues nun final, a medies emotivu, a medies deceicionante, como tola rellación que dambes van calteniendo nesta historia. Queden otres dos noveles pa zarrar la tetraloxía, y cuido siguir lleendo esta historia anque la mio opinión sincera ye qu’hai un baxonazu de la primera a esta segunda. Y too eso que dicen los críticos de los cambeos del barriu de Nápoles onde viven, cola apaición del  neofascismu y nun sé qué más mandangues, debieron lleelo ente llinies. Sólo nuna ocasión hai dalgo asemeyao a ello, y l’autora pasa penriba como les baillarines de ballet: de puntines. Mui pocos temes socio-políticos inclúyense na novela. Cuando llea la tercer parte, yá vos diré.
                                                                                              Fonte: trabayudecampu.com
. Vicente García Oliva ye mienmubru de númberu de l'ALLA

Ex libris: “Muerte en la cátedra”

Por Vicente García Oliva

. Títulu:      “Muerte en la cátedra”

. Autora:    Amanda Cross

. Torna:     Ester Gómez Parro

. Editorial: Alfaguara

. Añu:       1990

UNA CÁTEDRA DEVALUADA.-  Tien bastante fama esta escritora que firma Amanda Cross, alcuñu de Carolyn Gold que, de “gold” tien bien poco. Nunca nun lleére nada d’ella hasta esti día y la “Muerte en la cátedra” nun pasó la preba del nueve: o seya, esi terciu de la novela que siempres doi enantes de dexar de lleela. Nun llegué más alló de les cincuenta páxines d’una historia aburrida, enllena de cites absurdes, y  de personaxes inconsistentes, principiando pol de la propia protagonista, llamada Kate Fansler y que, polo visto, da pie a una riestra de noveles protagonizaes por ella.

 ¡Probes llectores! Na propaganda editorial fálase d’una muyer lliberal, feminista, con gran sentíu del humor y que, amás, suel tomar, a aquello del atapecer, un martini secu. La verdá, el que quedó secu fui yo depués de lleer páxines y páxines, hasta llegar a la cincuenta, con una mecia absurda ente unes muyeres que dicen ser feministes y otres que se conformen con trabayar xunto a los paisanos. Falto d’interés, confuso, redundante…  en fin, la señora Amanda Cross falleció va yá un tiempu o seya que tampoco ye cosa d’ensañase demasiao.

 La cátedra del títulu taba abondo devaluada.                Fonte: trabayadudecampu.com

. Vicente García Oliva ye miembru de númberu de l'ALLA

DOS ESCRITORES NORTEAMERICANOS

Semeya John Cheever: Rba

Vicente García Oliva
   Lleo agora, siguíos, a dos grandes escritores norteamericanos que siempre me prestaron. Una ye una novela de John Cheever que se titula “Bullet Park” y otra ye la rellectura del famosu cuentu llargu -o novela curtia- de Carson McCullers “Balada del café triste”. Fícelo asina porque al terminar el primer llibru entendí qu’había munchos parecíos entre dambos estilos y ente los ambientes que los dos escritores (escritor y escritora) emplegaben nes sos obres. Y creo que pue dicise que ye asina.

   La novela de Cheever ye, en realidá, como un de los cuentiarios a los que nos tien acostumaos. “Bullet Park”, anque tien un filu conductor y unos personaxes que siguen el desarrollu de la novela, nun son sinon la tapadera pa cuntar munchas más histories provinientes d’otros personaxes que los arrodien. Válen-y al autor pa rellatanos unos minicuentos, dacuando costumistes y cuasi siempre asombrosos, que nada tienen que ver col filu argumental de la historia. Podíemos tar lleendo, por exemplu, “Fall River”, que fue’l llibru de cuentos que lleí enantes d’ésti, del mesmu autor. Diz la propaganda de la editorial que “narra la historia de una familia amenazada por la violencia en la tranquilidad de los barrios residenciales”. Bueno, igual ye que nun lleímos la mesma novela. Esa amenaza de la que falen produzse nel últimu capítulu y ye una chifladura que causa más risa que mieu. Como cuasi tolo qu’asocede, ye dalgo estravagante y poco creyible, a nun ser porque Cheever cuéntatelo con tal seriedá que dices: “Va, igual pudo pasar”. Pero lo que sí son creyibles son les descripciones de los paisaxes, de los sentimientos de les persones, de les soledaes qu’arrastria la xente, de la incomunicación neses pequeñes urbanizaciones de clases medies/altes onde nun sabes si ye meyor conocer al vecín o  non conocelu.

Semeya Carson McCullers: biblioklept.org

  El rellatu de la McCullers -espléndidu na so rellectura- llévanos tamién a esos pueblos de l’America profunda onde nunca nun pasa nada, y cualquier cosa que se sal de la rutina, del vezu, ye amirao como un acontecimientu del que tol mundu opina y, d’un o otru mou, vive. Tamién equí los personaxes son un poco paródicos y estravagantes, tanto la señora Amelia como’l despecháu Marvin Macy  y nun digamos del pequeñu gorrumbu Lymon, que se convierte nel verdaderu protagonista de la historia. Pero lo que más me maraviya son les descripciones espaciales y temporales que fai l’autora Georgiana: esi pueblu triste, marxináu, camín de nengún sitiu, onde la xente desplázase a ver les cuerdes de presos que pasen a unos kilómetros d’elli a trabayar na carretera, porque ye l’unicu entretenimientu que tienen. Esos anocheceres del veranu calurosu y sofocante, o esos riscares onde’l fríu iviernu llanta les sos manes atereciendo los miembros de los que salen de casa. Riques descripciones de paisaxes y paisanaxes que s’amiesten colos de John Cheever pa ufiertanos un frescu d’una parte importante del so País. Dos grandes escritores norteamericanos que nun hai que dexar de lleer.                                                                                    Fonte:trabayudecampu.com

Vicente García Oliva ye miembru de númberu de l'Academia de la Llingua Asturiana

“HAYQUE”

"Hayque"

Por Vicente García Oliva,  miembru de númberu de l'ALLA

   Analía tien perdíu’l so verdaderu nome, agora namás respuende al de “Hayque”, porque tolos llabores desagradables que se faen en casa tóquen-y a ella: “Hay que buscar agua”, “Hay que barrer”, “Hay que ir a comprar viveres al colmado”… La neña garra’l calderu, la escoba o la bolsa de la compra y cumple colo que se-y manda, porque so madre y so güela tienen otres munches coses que facer, los hermanos van a escuela y tienen deberes y so padre… bueno, ye so padre.

  Pero Analía tamién tien suaños. Suaña coles estrelles que ve espeyaes nel recipiente del agua, y suaña con dir ella tamién a escuela porque sabe que ye llista, que se-y dan bien los números y que’l día de mañana querría ser una persona con un oficiu, y non llevar la vida de trabayu y resignación de les muyeres de la casa. Y por eso un día “Hayque” plántase…

  Preciosu llibrín de la escritora dominicana Virginia Read Escobal, responsable de la “Asociación Cultural Lleva un libro en la maleta”, que trabaya colos más desfavorecíos del so país, llevando llibros y material escolar pa escueles, biblioteques y clubs de llectura, ellí onde los neños y neñes nun tienen más qu’unes alpargates y un vestidín pa facer frente a la vida. El llibru ta editáu por “Loqueleo”, versión dominicana de la editorial Santillana, y los cenciellos dibuxos qu’acompañen al testu son de Ruddy Núñez. Una ayalguina.                                                           Fonte: trabayudecampu.com

EX LIBRIS: "La mancha humana" de Philip Roth

Por Vicente García Oliva, miembro de númberu de l'ALLA

Títulu: “La mancha humana”

Autor: Philip Roth

Traducción: Jordi Fibla

Editorial Círculo de Lectores

Añu: 2002

MENTIRES Y SECRETOS.- El decanu de la Universidá de Athena, nel norte de los EE.XX. ye un paisanu cuasi exemplar. Gracies a elli, una universidá de provincies que vexetaba intelectualmente ensin futuru dalgún, vese camudada nun centru d’interés a onde van dir profesores xóvenes a trabayar con enfotu. Home respetáu, un día va a pronunciar en clas una desafortunada frase que-y va a trayer abondes consecuencies. Acusáu inxustamente de racismu, Coleman Silk dimite de tolos sos cargos y cai en desgracia nuna sociedá mezquina y envidiosa que dende entós lu marxina. Esti ye l’aniciu de la fonda novela de Philip Roth, reputáu escritor ganador de los premios más importantes de Norteamérica. Roth afonda na personalidá de Coleman y na de la xente que lu arrodia, asoleyando, dando a la lluz una  riestra de secretos y mentires que conformen la idiosincrasia del pueblu, pero tamién, en xeneral, la de tolos seres humanos. Asina, “la mancha humana”, ye la que los homes y muyeres producimos en cualquier cosa que toquemos. Tamos toos contaminaos por envidies, y pequeñes (o grandes) miseries que contaxen a les persones coles que tratamos y a les actividaes qu’exercemos.

El profesor Silk, los sos fíos, los escuros oríxenes que lu traxeron hasta Athena, la tempestuosa vida de la so amante Faunia, la rellación col so exmaríu un antiguu combatiente de Vietnam alloquecíu, como toa aquella xeneración que fue y tornó alloriada y ensin llugar social, nin sentimental, los compañeros de la Universidá… Too ello cuntao por un vieyu escritor que vive nes afueres del pueblu y ye testigu de los socesos que lleven a un dramáticu final.

Roth emplega l’escalpelu pa tayar la superficie d’una pequeña ciudá burguesa embaxo la que s’escuenden demasiaes mentires, demasiaes miseries que manchen, que contaminen a una comunidá humana que podría ser otra cualquiera, porque lo que pasa nun ye, nin más nin menos, que la propia esencia del ser humanu. Y d’eso entiende muncho l’autor de Newark (Nueva Jersey). El vieyu maestru sigui en forma.         Fonte: trabayudecampu.com

THOMAS, EL DE LA GUERRA CIVIL

Hugh Thomas, semeya José Huesca 

Vicente García Oliva, 11 mayu 2017

   Morrió l’historiador Hugh Thomas, nomáu Barón pola so “graciosa maxestá” nel añu 1981 y que tuvo un percorríu abondo pendular nes sos afiliaciones polítiques (llaboristes, conservadores, lliberal demócratas…) Fue un escritor d’esos que llamen hispanistes, por dedicar una gran atención a los temes de la historia d’España. Nos años de la clandestinidá fue un paisanu mui respetáu porque publicó un llibru que munchos teníemos como de cabecera: “La guerra civil española”. Y ye que, nuna época en que los escritores del réximen teníen campu llibre pa cuntar les sos mentires partidistes (Joaquín Arrarás, Ricardo de la Cierva…) “el Thomas” -como lu llamábemos entós- fue una bocalada d’aire fresco que daba una información mui cercana a cómo se desendolcaron los dramáticos fechos de la nuestra guerra civil. 

  Yo recuerdo aquella edición de Ruedo Ibérico qu’entovía debe andar per casa, coles tapes de cartón masuñaes de remanalu y prestalu a unos y otros. Lo demás qu’escribió nunca nun  llegó, al mio modestu talantar, al altor científicu y a la popularidá que tuvo aquel primer llibru suyu. Lo qu’escribió sobre l’Imperiu Español dende Colón a Felipe II, paecióme un “refritu” d’otros autores y coses yá superconocíes con mui poques aportaciones personales, dicho seya con tolos mios respetos.

  Esti día llega l’anuncia de la so muerte, y per unos momentos recuerdólu y recuérdome naquellos difíciles años de la vida española y, polo que supunxo, nun puedo dexar de dedica-y una alcordanza pa esi home qu’introduxo una pequeña lluz ente tanta escuridá como había. Por ello, deséo-y que la tierra-y seya leve al ilustre historiador inglés Hugh Thomas.                                          Fonte. trabayudecampu.com

“LOS GAVILANES”

Imaxe d'arquivu: el barítono Manuel Ausensi (1919-2005)

Por Vicente García Oliva

   Tocóme plancha. Y colo del Sporting en Villarreal nun tenía yo gana de muncha folixa. Asina que punxe nel CD una de les zarzueles que más me presta, o meyor dicho, la que más: “Los  gavilanes”, con música del maestru Guerrero y un prestosu llibretu de José Ramos Martín. Pal que nun la conoza, que serán pocos, trátase d’una historia qu’a los asturianos píllanos mui de cerca: la emigración. Juan, el prota, vuelve de facer les amériques ricu y poderosu, como él mesmu canta, al so pueblu de nacencia. Una villa marinera que bien podría ser Llastres, Tazones, Cuideiru o cualquier otra de les nuestres. Ellí alcuéntrase colos vieyos amigos y los sos descendientes y entre ellos Adriana, el so amor de mocedá a la que dexó pa dir en cata de fortuna. L’alcuentru de los dos antiguos namoraos ye mui señaldosu: “Dulces recuerdos/ de nuestra infancia/ hoy al mirarte/ vuelven a mí…” dirá Adriana. Juan vien dispuestu a emplegar parte de les sos perres n’ameyorar al pueblu y los sos habitantes, talo que ficieron munchos indianos n’Asturies: escueles, traídes d’agua, xardinos… y esti pueblu canta gociosu al fíu que marchó y torna millonariu. ¡Pero hai, amiguinos! Juan conoz a Rosaura, la fía que tuvo Adriana y que agora nun tien padre, y anque ye cuasi una guah.a, namórase perdidamente d’ella. Al puntu que si nun ye a casase con ella, de les perres nun hai nada dicho. ¡Menuda presión pa la moza y pa so madre! El pueblu, peseteru, lo que quier ye que Juan dexe ellí les perres, o seya que la cosa ta qu’arde. Bueno, nun cuentu’l final por si dalgún entovía nun la vio y anímase

   La versión que yo tengo ye estraordinaria. La grabación orixinal ye de 1952, anque la copia remasterizada ye de 1995, poro, los editores, con bona vista comercial ponen nel repartu, en primer llugar, a Teresa Berganza una de les meyores sopranos del mundu. Un poco engañu, pues la Berganza interpreta a Rosaura que tien un papel mui pequeñu. Los verdaderos trunfadores de la obra son, en primer llugar el gran barítonu Manuel Ausensi, plenu de voz y bon gustu, que fai un Juan inmeyorable. Y xunto a él, Toñy Rosado, una soprano poco conocida pal gran públicu, que tamién fai una Adriana xenial. El tenor Carlos Munguía, qu’interpreta a Gustavo, el mozu de Rosaura zarra’l repartu con bona voluntá y ensin desmerecer, anque con esa guapísima voz de Manuel Ausensi dante ganes de que seya ésti el que se case cola mocina. La orquesta diríxela otru grande: Ataulfo Argenta y los Coros Cantores de Madrid, el maestru Perera. Total, que petecíame tener otra colada entera pa siguir planchando, pues dábame pena tener que la interrumpir. En fin, el tercer actu, pa otru día.         Fonte: trabayudecampu.com

EX LIBRIS: La última aventura imperial (enseñar antroxando)

Títulu: “Jartum”

Autor: Michael Asher

Torna: Carlos Ruiz Uribarri

Editorial: Inédita Editores

Añu: 2008


Por Vicente García Oliva

 LA ÚLTIMA AVENTURA IMPERIAL.- Esti ye’l sotítulu qu’anuncia’l llibru y en verdá que ye asina. “Jartum” ye un ensayu que se llee como la más entretenida de les noveles y ye que l’autor, perfeutu conocedor del tema y que remana una gran cantidá de documentación, cumple con esa másima d’enseñar antroxando, divirtiendo.

 Cuerre l’añu 1883 cuando el Teniente Xeneral William Hicks, al mandu d’unos 12.000 homes, la gran mayoría turco-exipcios, ye derrotáu en El-Obeid poles fuerces derviches, formaes por diversos pueblos y etnies al mandu del Madhi, una especie de nuevu profeta que llogró axuntales a toes pa espulsar a los estranxeros del Sudán. Asina principia la historia de “Jartum”, que va a espurrise a lo llargo de 15 años: los que van dende la derrota del famosu Xeneral Gordón, na capital que lleva esi nome, hasta la so recuperación nel 1898 cola derrota total de los sublevaos. El primer ensayu d’una república islámica fina asi, depués de miles de muertos por dambos bandos. Sudán nun será independiente hasta 1956.

 El llibru de Asher recueye tolos aspeutos d’esi periodu con detalle y precisión: nomes, feches, personalidaes, batalles… pero, y esi ye un de los mayores aciertos del escritor inglés, en dambos llaos. Avezaos a escuchar namás la versión de los colonizadores, agradezse conocer tamién la de los colonizaos. Los que lluchen pola so lliberación. Asher trátalos a toos por igual anque, lloxicamente, la mayor parte la documentación escrita ye de los primeros. L’autor vivió munchos años en Sudán y el conocimientu sobre’l tarrén de los llugares de los socesos da-y un plus pa rellatar con detalle’l desarrollu de los combates. Estos son cuntaos con minuciosidá, dando datos de cada batallón, quién lu mandaba, que clas d’individuos lu componíen ya inclusive anéudotes de los corresponsales de los periódicos ingleses que taben nel campu batalla. Pero xunto a esto, tamién les intrigues polítiques y la influyencia del Gobiernu Inglés y de la propia Reina Victoria n’asuntos esteriores, mayoremente pa meter la pata.

 Un ensayu, pues, perinteresante que se llee con facilidá anque quiciás l’autor pormenoriza demasiado dalgunos pasaxes ensin que ficiera falta. Con too, un llibru mui recomendable tanto pa los amantes de la Historia, como pa los de les aventures político-militares.                                                                 Fonte: trabayudecampu.com

Trabe reedita 'Diariu d'Enol' de García Oliva

Cubierta "Diariu d'Enol" de Vicente García Oliva, Ed. Trabe

   La primer edición, espublizada pola Academia de la Llingua Asturiana (ALLA) nel 1988, taba escosada dende hai dellos años.

  'Diariu d'Enol' foi'l primer númberu de la coleición Lliteratura Xuvenil de l'ALLA, compuesta por doce títulu, l'últimu 'La maldición de Llucescuria' d'Abel Martínez González, asoleyáu nel 2012. Nun ye l'únicu de Vicente García Oliva dientro de la mesma, yá que'l númberu 9 ye '¡A la bin, bon, ban...!', tamién ye del xixonés.

  29 años depués, Ediciones Trabe recupera esta historia, escrita en formatu de diariu, "d’un rapacín qu’espierta a la vida colos porgüeyos, problemes y ilusiones propios de la edá, de la clase social a la que pertenez y de la dómina na que vive. Nél, el protagonista va esgranando la rellación que mantién cola moza que más-y presta del institutu, rara y madura, cásique adulta, pero que nunca nun-y fai munchu casu", de nome Concha.

  Precisamente la editorial uviedina asoleyó nel 2015 'Cuadernu robáu (Diariu de Concha)', escrita 27 años más tarde que 'Diariu d'Enol', onde la rapaza cuenta, tamién en formatu diariu, "les esperances y los problemes" de so. "Formen la cara y la cruz de la historia de dos amigos que son más qu'amigos", esplica García Oliva.                              Fonte: asturies.com

García Oliva y Xuan Xosé Sánchez Vicente ganen nos Premios de la Crítica d’Asturies

• . Abiertu'l plazu pa presentar candidatures pa los Premios de la Crítica d'Asturies

Vicente García Oliva

 El 16 d’avientu van entregase n’Uviéu los XVI Premios de la Crítica d’Asturies, de los que yá se conocen los ganadores. Vicente García Oliva llevó’l gallardón de la estaya de narrativa n’asturianu con ‘La vida de siempre’, mentes que Xuan Xosé Sánchez Vicente fixo lo propio na de poesía con ‘De les hores y les memories’.

 La Asociación d’Escritores d’Asturies convoca estos premios cola intención de gallardonar a los meyores llibros del añu pasáu, nesti casu del 2015. Asina, convóquense cuatro estayes, narrativa n'asturianu y castellanu, y poesía n'asturianu y castellanu, a los que cualquier persona física o xurídica pueden presentar candidatures.

Xuan Xosé Sánchez Vicente

 Ente toles que se recibieron enantes del 30 de xunetu, dellos xuraos encargáronse de seleicionar les obres merecedores del Premiu de la Crítica. Asina, ‘La vida de siempre’ (Ediciones Trabe), una novela de xéneru escrita por García Oliva que s'adientra peles siempre negres cais de la inmigración, la prostitución y la trata de blanques, llevó’l de narrativa n’asturianu.

 Pela so parte, el de poesía n’asturianu foi pa ‘De les hores y les memories’ (Ediciones Trabe), primer trabayu de poesía de Sánchez Vicente en más d’una década nel que l’autor algama un gran altor llíricu y na que'l so yo poéticu s'amuesa rescamplante.

El XI Premiu de les Lletres, pa Beltrán

 Les obres ganadores en castellanu foron ‘Once voces humanes’, de Mirta Chamorro, en narrativa; y ‘Gregor Samsa frente a la ventana’, de Francisco Álvarez Velasco, en poesía. Mentes, el XI Premiu de les Lletres foron pa Fernando Beltrán.

 L’otru gallardón que completen estos reconocimientos, el Premiu a la Meyor Columna Periodística recayó en José Luis Argüelles, periodista de ‘La Nueva España de Gijón’.
Fonte: asturies.com

Ex libris, Medio sol amarillo

DALGO MÁS QU’UNA GUERRA

Chimamanda Ngozi

 Vicente García Oliva, 1 avientu 2016
   Chimamanda Ngozi ye una escritoria ñacía en Abba, Enugu, n’actual Nixeria anque bien ceo se treslladó a los Estaos Xuníos con una beca, pa estudiar ciencies polítiques y comunicación. Ésta ye la so segunda novela y la primera que yo lleí de l’autora y prometo que nun será la última. Porque Medio sol amarillo ye una guapísima ya interesantísima novela que te garra dende l’aniciu tirando de ti hasta un final que va a coincidir col final de la guerra. Una guerra -la entamada ente Nixeria y Biafra- con cientos de miles de muertos y qu’atropó l’atención del mundu enteru allá pelos años finales de los sesenta. Yo recuerdo siendo chaval aquelles semeyes de los neños biafreños coles barriguines inflaes de la fame y la malnutrición que fueron referente pal tema de les grandes hambrunes d’África: “Paez un biafreñu”, dicíase cuando un neñu taba mui flacu.

  El mediu sol mariellu fai referencia a la bandera de Biafra, que tien esi símbolu, y la historia, anque la cunta un narrador en tercer persona, va siguiendo los pasos d’un mozu (Ugwu) qu’entra al serviciu d’un profesor de la Universidá Nsukka (Odenigbo) y de la so guapa esposa (Olanna). La novela desplica les razones de la guerra y el porqué los Igbos quieren independizase del restu de Nixeria y crear el nuevu estáu de Biafra. Y tamién sigui, en dalguna parte, el desendolcu de los combates, pero podría dicise qu’esi ye’l marcu onde asoceden los acontecimientos. Lo que daveres se cunta ye más social y más familiar: cómo ye la vida normal d’aquella xente, los sos temores y creyencies. La so cultura animista. Pero ello dende’l puntu de vista d’una familia intelectual, de clas media-alta, que viaxa al estranxeru y vive averada a la Universidá, y qu’organiza velades poétiques y tertulies polítiques nuna casa confortable. Pasu ente pasu vamos viendo cómo les circunstancies principien a cambiar, y a ónde los conduz esi intentu desesperáu de crear un estáu nuevu (el sol qu’amanez) onde los Igbos seyan respetaos y non perseguíos, y onde les llácares del colonialismu y l’ambición de les grandes potencies nun los algamen.

  La prosa de Chimamanda ye guapísima, tienra y efeutiva, dacuando demoledora. Y el trazu de los personaxes perfeutu. Ún, fina la llectura conociéndolos a toos y sabiendo lo que piensen y cómo van reaicionar en cada casu. Y cómo non enamorase de Kainene, la hermana ximielga d’Olanna y personaxe decisivu na novela. En fin, a  los qu’avezais a lleer esti blogue, vos recomiendo la llectura de Medio sol amarillo cola seguranza de que vais a esfrutar grandemente. Pese a lo terrible que foi aquella guerra.

. Autora:    Chimamanda Ngozi
. Títulu:     Medio sol amarillo     
. Editorial: Literatura Random House
. Torna:     Laura Rins Calahorra
. Añu:        2006                                                               Fonte: trabayudecampu.com

Inaugúrase una esposición d'homenaxe a Vicente García Oliva

Va tar abierta al públicu hasta'l día 30 nel Centru de Cultura Antiguu Institutu.

Esta esposición de nome 'Vicente García Oliva, un paisanu con munchu cuentu "ye un percorríu pela vida y obra del escritor xixonés. L'amuesa ta fecha por escolinos de los colexos Asturias, Evaristo Valle, Jacinto Benavente, Manuel García Blanco, Ríu Piles, Santa Olaya y el San Lorenzo.

García Oliva, académicu de númberu de l'Academia de la Llingua Asturiana, ye un escritor de gran trayeutoria y destacáu autor de lliteratura fantástica destinada a xente mozo. Foi ganador del VIII Premiu María Xosefa Canellada, correspondiente al añu 2015, de lliteratura infantil y xuvenil con ‘Fontenebrosa III: el final’, siendo la segunda vegada que consigue ún de los Premios Lliterarios, tres consiguir el Máximo Fuertes Acevedo nel 2010.

Nel so palmarés tamién destaca un Premiu Timón p’autores n’asturianu y gallego-asturiano, el correspondiente al 2011, qu’entrega l’Asociación Cultural L’Arribada como reconocimientu a toda una carrera lliteraria.

La bruxa Pumarina y el dragón Maragatu

Les persones que visiten la esposición van conocer y esfrutar con personaxes y obres lliteraries que yá son historia na lliteratura infantil. La bruxa Pumarina y el dragón Maragatu van dar la bienvenida al particular reinu los silentes, nuna amuesa que vien mui a cuentu.

 Fonte: YeXixón.com

Celia en la Revolución (II)

“Celia en la Revolución” ye un manuscritu qu’Elena Fortún principió a escribir durante los mesmos socesos que narra, en plena Guerra Civil española, y que finó yá nel esiliu americanu en 1943. Escritu a llapiceru, atopóse años depués y un poco por casualidá y, según dicen los editores, taba ensin correxir pola autora y costó munchu trabayu pasalu a llimpio y da-y una coherencia pa la so publicación, cosa qu’asocedió en 1987.

L’autora madrileña emplega al so personaxe favoritu -la neña Celia- pa cuntar unos acontecimientos que-y dexaron una fonda güelga a ella, al igual qu’a tolos españoles que tuvieron la desgracia de vivilos. Equí Celia yá nun ye una neña más o menos ocurrente, sinón que ye una adolescente de 16 años a la cuál los fechos pelos que va a dir pasando van faciéndola maurecer hasta un final abiertu, nun sé mui bien si el definitivu o unu provisional a la espera d’unes correiciones que nunca llegaron a facese.

Y lo que cuenta Elena Fortún, por boca del so personaxe, ye cómo trescurría la vida cotidiana na estaya republicana dende l’aniciu la contienda hasta los caberos díes de la mésma. Nun hai equí frentes de guerra, anque toa España fuera un frente de guerra, nin nomes de políticos d’un o otru bandu. Ye namás, y na menos, la memoria d’una traxedia al traviés de los que la sufrieron na retaguardia. Celia, como’l restu los españoles, trema colos bombardeos, pasa una fame atroz (dellos díes marcha pa la cama con un vasu caliente d’agua endulzada), ve desfacese la ciudá, ve morrer a xente a la que quier y va quedándose sola, separtada de los sos hermanos más pequeños y de so padre, feríu, al que nun pue atender. Asina va pasando, según los avatares del conflictu, de Madrid a Valencia, a Albacete, a Barcelona, y otra vuelta a empezar.

Depués de lleer la novela, lo qu’a min me tresmite l’autora ye que los buenos y los malos nun taben agrupaos por bandos. Nun había un bandu onde taben los buenos y otru los malos, sinón qu’ente la xente corriente, la de a pie, la que sofría les violencies cotidianes, habíalos buenos y malos. Xente que se xugaba’l pelleyu por aidar a otros, y xente que nun tenía altor moral nengún: que denunciaba, que tomaba la xusticia pola mano, qu’especulaba cola fame de los vecinos… Otra cosa llamativa ye’l distintu mou en que se vivía la guerra d’unos llugares a otros de la retaguardia. Asina, mientres Madrid yera una ciudá cuasi destruyida, onde’l mieu, la fame y los “paseos” s’espardíen auquiera, en Valencia les tiendes taben abiertes y tomábase café nes terraces, y en Barcelona podía dise al cine, a un restaurante o a un cabaré, pese a los bombardeos que nun faltaben. Sólo al final, cuando la derrota yá yera inaparable, se contaxó’l desastre a tolos llaos.

Novela emocionante, dura, que se llee con una llárima nos güeyos, anque la bondá inxenua de la protagonista la ducifica un poco. Quiciás ehí s’asitie la única crítica que pueda facese. Celia ye demasiao inxenua inclusive al final cuando ya la cosa ta decantada. La mocina nunca nun llega a entender lo que ta pasando, nin sabe posicionase nun de los bandos, anque so padre ye militar de la República y a so güelu lu maten nel primer capítulu de la novela. Nun paez mui creyible esa especie de inorancia infantil nuna moza de dieciseis años, edá na que otres moces, quiciás pola propia situación, tienen una conciencia más real de los fechos. Poca crítica pa un rellatu qu’espeya lo que fue esa llamada “tercera España”, que nun tenía sitiu en nenguna de les otres dos, y al que los perguapos dibuxos d’Asun Balzola “pespuntéen” con aciertu. Mui recomendable.              Fonte: trabayudecampu.com

Durruti noveláu. Trabayu de campu.

Autor: Vicente García Oliva

 Nun sé, llóxicamente, el nivel que teníen el restu noveles que se presentaron al Premiu Xosefa Xovellanos, pero toi cuasi seguru de que Lluvia d’agostu, del amigu Francisco Álvarez, ganólu merecidamente. Reservé la so llectura pal periodu vacacional de descansu (yá se sabe que los xubilaos tenemos munches y diverses xeres) y acerté, pues ye una novela mui entretenida.

 Nun ye fácil encadarmala, dientro de la forma novelística, nun o otru xéneru pues participa de varios d’ellos: la novela histórica, la biografía, el periodismu, inclusive la novela negra, como la parte de la preparación y l’asaltu al Bancu d’España de Xixón, pero si yo tuviera que definila según la llectura que yo fici, diría d’ella que ye una novela épica. Esiste, a lo llargo de tola historia que sigui al personaxe de Buenaventura Durruti, una esaltación, un aliendu, en definitiva, una épica qu’algama nun sólo al propiu personaxe  protagonista, sinón a los sos compañeros d’aventures/desventures (Ascaso, Jover, García Oliver…) y, más en xeneral, a tolos llibertarios y a la propia idega del anarquismu como sistema. Hai un engrandamientu, yo creo que consciente, de los valores del mésmu y escuéyense dalgunos de los momentos más “trunfales” del movimientu nos años prebélicos y, depués, na propia Guerra Civil española.

 Durruti fue un personaxe mui controvertíu, nun sólo polos sos enemigos, sinón inclusive polos del so propiu bandu. El mesmu autor recueye la conversación de Durruti y García Oliver colos anarcosindicalistes Ánxel Pestaña y Joan Peyró, onde estos últimos reprochen los sos métodos d’actuación diciendo qu’ellos son como “la lluvia d’agostu que trai falses promeses de frescor cuando más abrasa l’aire”. Ensin embargu, Francisco Álvarez nun se detién -y fai bien- nestes disputes que socavaron y muncho al movimientu anarquista, pa siguir poniendo l’acentu no  qu’a él-y interesa: la trayeutoria vital del líder y la so relación cola so compañera, los sos amigos y correlixonarios, hasta llegar a un final que yá conocemos, lo cuál nun-y quita nenguna fuercia a la narración que Paco lleva con una maestría impropia d’una primer novela, como ye’l casu.

 Podría discutise por qué l’autor escoyó éstes, en llugar d’aquelles otres anéudotes al rodiu de la vida de Durruti, o por qué se cuenta la historia con tantos dires y venires temporales, en llugar de facelo cronolóxicamente y con más orde, pero eses son decisiones del propiu autor qu’hai que respetar y que, amás, nun-y quiten valir nin méritu nengún a la so obra. Sicasí, por dicir dalgo y que nun se piense que l’amistá intervién nesti pequeñu comentariu, abúltame qu’hai dalgunos capítulos nos que l’aición se detién en demasía en coses poco importantes pal desarrollu de la novela, como la conversación ente l’Inspector Xefe y el Comisariu, de magar l’asaltu al Bancu d’España de Xixón que, anque ta ocurrente, creo que s’allarga demasiao. O el capítulu de la so intervención nel barcu que lleva a los prisioneros a África, anque sirva p’amosanos el carauter de líder de Durruti.

 Norabona, pues, a Francisco Álvarez por ufiertanos esta guapa y bien escrita novela que lu coloca, ya dende agora, dientro de los más importantes novelistes asturianos. Pa ser una primera obra nun ta mal ¿non?                    Fonte: trabayudecampu.com

N'Alcordanza

Publicao por Vicente García Oliva | en Lliteratura | el 25-06-2016

El dibuxu d'Igor Mediu

  Cellébrase estos díes una nueva convocatoria de “N’Alcordanza”, en recordatoriu d’Igor Medio y Carlos Redondo.Ye una forma de que la so memoria nun se pierda y de que, de dalguna manera, sigan ente nós.

 Nada puedo amestar de Carlos Redondo a lo que los sos amigos yá tienen dicho. Pero prestaríame dar una primicia del que fue un gran amigu y fíu de dos grandes amigos: Sonia y Luis.

 Allá pol añu 1998, pidiéronme unos testos pa un llibru de llectura empobináu a los rapazos de Tercer Ciclu de Primaria (creo recordar)

 Asina nació un llibru, güei prauticamente esapaecíu, tituláu “Los camientos de Deva y Xulián”, dientro una coleición nomada “La viesca de les lletres” y publicada por Editora del Norte. Lo curioso ye que los dibuxos qu’acompañaben a les mios histories yeren, precisamente d’Igor Medio. Guardo’l llibru con un ciñu especial porque, amás, son una veintena de dibuxos guapísimos.

 A la fin del trabayu que ficimos a comuña, pidí-y al bonu d’Igor un dibuxu dedicáu pa tener de recuerdu, y fízome ésti que güei asoleyo como’l mio homenaxe d’estos díes. Descanse en paz, l’amigu  Igor. Fonte: trabayudecampu.com

"Que nun se pierda nel aire"

Publicao por Vicente García Oliva | en Lliteratura | el 26-05-2016

  Nun tuviere tiempu, hasta agora, a mirar el llibru que salió esta Selmana de les Lletres embaxo esi títulu, y que recueye sesenta rellatos curtios d’otros tantos escritores asturianos. Ye una amuesa bien curiosa de la nomina qu’escribe anguaño n’asturianu, anque ye verdá que falten dalgunos otros escritores consagraos, como puen ser Xuan Xosé Sánchez Vicente, Berta Piñán o Antón García, por citar namás dellos exemplos. Hai minicuentos mui prestosos nesa esbilla que tengo’l duldosu honor d’aniciar, pues l’orde que se siguió fue’l de la edá, y por eso ye un duldosu honor. Yá digo qu’hai munchos que me prestaron, caún nel so estilu, pero como siempre hai qu’escoyer, quédome con esa maravía de tenrura y sensibilidá firmada por la ilustre Carmen Gómez Ojea que lleva por títulu:

“Los últimos pasinos”

         “El güelu fízose como un neñu y ñomábala “mamina”, a ella, Sildra, la nieta. Yera branu y pasaben los díes na terraza. Él nun quería salir de casa na siella ruedes. Nun pisaría la cai fasta qu’aprendiere a caminar. Sildra pensó que llograría que caminara despacín él solu. De la so mano ella diere los primeros pasos. Obligólu a ponese tiesu, pegáu a la paré. Llueu espurrió-ylos brazos. Ven, ven pa mi. Obedeció como un neñín allegre. Abrazólu felicitándolu, pero quedó quietu, espantiblemente silenciosu. Soltóse d’ella. Violu subir pel aire arriba, pente les ñubes blanques, anque los demás dixeren que taba muertu. Ellí taba seguru, esperándola.”                                                                               Fonte: trabayudecampu.com