"Pa nós la oficialidá ye irrenunciable"

Cano: “Desarrollar la Llei d’Usu sedría importante, pero pa nós la oficialidá ye irrenunciable”.

La presidenta de l’ALLA, Ana María Cano González, destaca que tolos partíos que tán representaos na Xunta Xeneral tres les eleiciones "tienen un compromisu pa cola llingua". Dende la institución ufren tola collaboración p’avanzar pola oficialidá. “El resultáu de les eleiciones tien muncho que ver col descontentu xeneral de la sociedá polos temes de corrupción y pola poca credibilidá de los políticos. Tamién influyó la división del PP. Al final ganó Foro Asturias que, como dixo Álvarez-Cascos, garró los votos que perdieron el PSOE y PP”, n’opinión de Cano.

Dende’l puntu de vista llingüísticu, la presidenta de l’Academia de la Llingua Asturiana (ALLA) destacó que los cuatro partíos con representación na Xunta Xeneral (PSOE, PP, IX-LV y FAC) “tienen un compromisu pa cola llingua asturiana, como recueyen nos sos programes políticos”. Nesi sen, Cano ta convencida de que “nun pue avanzase en serio si nun s’apuesta pola oficialidá. Pa l’ALLA, la oficialidá ye irrenunciable pa garantizar los derechos de los asturianos y la sobrevivencia de la llingua”. Por ello, la institución ufre a tolos partíos la so collaboración pa tomar esa direición nesta llexislatura nel tema del asturianu.

El programa de FAC, la fuercia ganadora de les eleiciones y la que, con casi toda probabilidá, va tomar les riendes del Gobiernu, namái recueye’l desarrollu de la Llei d’Usu y Promoción del Asturianu del 1998 y nun fala d’oficialidá, aspeutu que namái recueye IX-LV. “Ye necesario dir más allá de la Llei d’Usu”, asegura Cano que, sicasí, considera “un pasu importante’l so desarrollu total porque ésta nun se cumple”.

Fonte: Asturies.com