Rafa Palacios axuntose con dellos representantes de l’Asociación de Trabayadores de la Normalización Llingüística a los que manifestaron el so sofitu énte los retayos de recursu.
La coalición reafitó que’l sofitu a la normalización de la llingua asturiana ye un oxetivu irrenunciable del so programa electoral y criticó la posición llingüística de Foru, IX y el restu de partíos parlamentarios.
Tres la xunta, na que el trabayadores espunxeron la difícil situación na que tienen que desenvolver el so llabor y los retayos presupuestarios que sufren, Palacios afirmó que “el votu a la nuesa coalición ye’l votu útil pa defender la oficialidá y la normalización yá que PSOE y PP son los abanderaos del apartheid llingüísticu, y el votu a IX y a Foru nun va traer nenguna meyora, porque’l so apueste pola llingua nun ye sincera nin suficiente”.
Por ello pidió espresamente a defensores y falantes d’asturianu que quieren ver respetaos los sos drechos que voten a Bloque por Asturies-UNA-Verdes pa que’l 25-M pueda cuntase un númberu de votos importantes inequívocamente a favor de la llingua.
Según Palacios, “n’Asturies tase sistemáticamente conculcando la Declaración Universal de Drechos Humanos, la Declaración Universal de Drechos Llingüísticos, la Carta Europea de les Llingües Minoritaries y la mesma Constitución Española, polo que fai falta que les persones conscientes d’esta situación camuden el so votu y ruempan colos partíos y los discursos de siempre, porque ta más que demostrao que pa los partíos qu’anguaño tán nel parlamentu, defendan lo que defendan nos sos programes, esti ye un tema menor”.
Palacios también afirmó que Foru nun fixo nada nun añu, más allá de declaraciones d’intenciones vacíes; “nin defenden la oficialidá, una midida imprescindible pa la normalización, nin aumenten la presencia del asturianu onde gobiernen sinón que tán faciendo sumise lo poco qu’había, nel so mandatu desapaecen medios de comunicación n’asturianu, amenorguen drásticamente les ayudes – cuando sí hai dineru pa la Ópera- y prometen agora que van crear la especialidá docente d’asturianu, cuando perdieron la oportunidá de faelo l’añu pasáu, cuando yá llevaben meses gobernando”.
Según Palacios “nun ye creíble que Foru se presente ante los asturianistes como’l partíu que va defender la nuesa llingua cuando tien una visión paternalista y folclórica de la mesma”. Y esta visión, según Palacios nun ye abondo cuando falamos d’un idioma que tien de ser normal, que la so tresmisión xeneracional tien de garantizase y que tien de tar al nivel del restu de les llingües oficiales, daqué que ta a años lluz de los planteamientos de Foru, y por tantu a años lluz de los mínimos que tienen d’esixir les persones defenden la normalización del idioma”.
Al respective d’IX la vocera de la coalición, afirmó que “el so programa recueye la oficialidá, pero pa ellos l’asturianu ye un elementu que figura nos postreros puestos na so llista de prioridaes y reivindicaciones, polo que nunca van ponelo nel centru del debate políticu, que ye lo qu’una llingua en peligru precisa. IX va años que considera’l problema llingüísticu amortizáu y solo asina pueden entendese les demagóxiques declaraciones de Jesús Iglesias nes que quitaba importancia a la recuperación de la toponimia, lo que da una midida de lo poco sinceru del so apueste y de lo cosméticu que resulta, cuando falamos d’una cuestión de drechos fundamentales”.
Pa cabu, Palacios comprometíose a sofitar la rede de servicios locales de normalización, pero non como entes aisllaos o isles apinaes de bones intenciones y pocu presupuestu, sinón como elementos clave d’un ambiciosu Plan de Normalización qu’asegure la normalización real, la tresmisión xeneracional, la presencia social a tolos niveles y ensin nengún complexu.
Fonte: bloque-una.com
