17/5/11

Abiertu'l plazu pa la preba de conocencia de l'ALLA



El sábadu 28 de mayu ta convocada la preba semestral de conocencia qu’entama l’Academia de la Llingua Asturiana (ALLA). Esti llunes la institución abre'l plazu de matriculación, que va zarrase'l xueves día 26. L’ALLA vien años convocando esta preba col oxetivu de que les persones que quieran que se-yos reconoza la so conocencia d’asturianu puean recibir un documentu acreitativu.



Pa ello, la institución convoca un esame en xineru y otru en mayu nel que los matriculaos deben superar una preba escrita y otra oral. Éstes van centrase en dos estayes: la llingüística y la de ‘llingua y sociedá’. Na primer d’elles va evaluase’l conocimientu del funcionamientu gramatical del idioma y de la normativa académica, l’emplegu amañosu de la llingua na escritura al traviés d’exercicios, y el so usu nuna conversación. Mentes, na segunda va esaminase la conocencia del allugamientu del asturianu dientro la sociedá asturiana y el procesu de normalización.



Los interesaos en presentase a la preba de conocencia, que va cellebrase’l sábadu 28 de mayu a les 9.30 hores na Facultá de Formación del Profesoráu y Educación d'Uviéu, van tener de plazu fasta’l xueves día 26. Pa ello han de pasar pela sé académica, asitiada na cai L’Aguila númberu 10 d’Uviéu, o llamar al teléfonu 985.21.18.37. Tamién pue tramitase la matrícula na rede nel corréu lletrónicu alla@asturnet.es.


Fonte: Asturies.com

1 comentario:

Los comentarios tán pendientes de moderación. Espublizaránse lo primero dable.