L’Academia de la Llingua Asturiana cellebra’l vienres 10 de xunu, a les 12 la mañana, nel nuevu llar social (cai L'Águila 10, d’Uviéu), l'actu d’entrega de los premios a los ganadores de los Concursos de l’Academia de la Llingua Asturiana 2011: «Concursos d’Investigación (de recoyida de material toponímico y de léxicu asturianu)», «Concursu de llectures pa rapazos», «Concursu de creación lliteraria, premiu “Llorienzu Novo Mier”», «Concursu de material lliterario escrito, premiu “Federico González-Fierro Botas”» y «Concursu de Teatru».Más info:
14/06/2011
L’Academia entregó los sos premios lliterarios y d’investigación
Asturnews ufre una galería de semeyes de la entrega de premios.
Redacción
Ganadores de los concursos xunto a los miembros de l'ALLA
L’Academia de la Llingua Asturiana (ALLA) entregó’l vienres pasáu los premios de los sos concursos. Esti añu, per primer vegada, celebróse l’actu nel llar nuevu de la institución, nel Monesteriu de les Pelayes d’Uviéu. Nel actu tuvieron presentes la Presidenta, Ana Cano; l’Aylagueru, Carlos Lastra, y el vicepresidente Miguel Ramos Corrada. Ente los premiaos, Xosé Ramón Lozano, Rafael Valdés y Héctor Pérez Iglesias, ente otros.
El xuráu del Concursu d'Investigación de Recoyida de Material Toponímico Oral, formáu por Ana María Cano González como presidenta, Xosé Lluis García Arias como vocal y Corsino García Gutiérrez faciendo de secretariu decidió premiar con 600 € el trabayu tituláu “Toponimia de la parroquia de Barros (Llangréu)” del que ye autor Xabiel Fernández García; mientres que nel casu del Concursu d'Investigación de Recoyida de léxicu asturianu, el premiu foi pal trabayu “Léxicu de Llaiñes, Sobrescobiu” del que ye autor Xosé Ramón Lozano Cuervo.
Nel casu del Concursu de Llectures pa Rapazos el xuráu formáronlu Urbano Rodríguez Vázquez como presidente, Vicente García Oliva como vocal y Pablo Xuan Manzano como secretariu, apautando dar el premiu de 600 €, al trabayu tituláu “Eladio, el dinosauriu que ñació ayeri”, del que ye autor Alberto Menéndez García.
Ramos Corrada, Cano y Lastra
El Concursu de Creación Lliteraria, premiu "Llorienzu Novo Mier" foi nesta ocasión pa “La mano vacía”, poemariu del que ye autor Héctor Pérez Iglesias. El xuráu formáronlu Miguel Ramos Corrada como presidente, Xosé Ramón Iglesias Cueva como vocal, y Marta Mori d'Arriba como secretaria.
El Concursu de Teatru tuvo como xuráu a Miguel Ramos Corrada, Adolfo Camilo Díaz y Carlos Rubiera Tuya, que decidió facer ganador a Noel Canto Toimil por “El facedor de gomeros”.
N’últimu llugar entregóse un accesit de 150 euros del Concursu de Recoyida de Material Lliterario Escrito, premiu "Federico G.-Fierro Botas" al trabayu tituláu N’el falar de la mio tierrina de Gabino Muñiz García-Robés, del que ye autor Rafael Rodríguez Valdés. Fueron xuráu Ana María Cano González como presidenta, Xosé Lluis García Arias como vocal y Corsino García Gutiérrez faciendo de secretariu.
Los concursos d'Investigación Llingüística, Investigación sobre lliteratura asturiana, Recoyida de Material Lliterario Oral, de Curtios Cinematográficos y el Concursu de Cómics en Llingua Asturiana quedaron ermos.
Nel actu presentáronse amás delles obres ganadores n’años anteriores, pertenecientes a les colecciones “Escolín”, “Toponimia” o “Llibrería Académica”.
Semeyes del actu
Fonte: asturnews
Un magníficu momento y meyor ocasión pa plantegar y aldericar estratexes d'acción pa los tiempos que cuerren cola que ta cayendu en redol a la llingua asturiana y la so más que comprometida y precaria supervivencia.
ResponderEliminarDempués del altor que se vio pola mañana na entrega de los Premios y de que "nun se mete en política" somos bien de n'Asturies los que nos entrugamos si l'ALLA podría primir, aconseyar, dirixir, o faer munchu más pola oficialidá encauzando dalgún tipo de movimientu social como se-y ta reclamandu dende dellos llugares prósimos al asturianismu.
ResponderEliminarXuliu voy dicite que l'Academia la Llingua sin el apoyu del pueblu falante nun ye nada nin sirve a naide. Polo que debería d'implicase na llucha sobre'l terrén d'a pies, nun solu nes altures filosófiques. Con tou y con eso gocia d'enforma respetu y méritu.
ResponderEliminarYe la xente la que tien que movese y lluchar polo suyu si iye que de verdá-y interesa (que nun paez que tea pol llabor precisamente y esi ye'l problema precisamente) que ye otra hestoria bien distinta.
ResponderEliminarEl gran problema plantegáu nesti momentu n'Asturies agora mesmu, ye según paez que naide quier sacrificios, nin compromisos, nin dar la cara, nin trabayar abondo, nin faer nada pola llingua nin pola oficialidá, y asina nun salimos del pozu amiguinos.
ResponderEliminar