La oficialidá del asturianu. Normalización y dignificación de la llingua

Xosé González González
La cuestión llinguística n’Asturies sufre d’un problema crónicu. Nel Gobiernu del Principáu d’Asturies dende siempres impónse l'inmovilismu no que se refier a drechos básicos como ye’l casu de "la oficialidá del asturianu", los politicos siguen tornando cualesquier intentu de poner en marcha un procesu d’oficialización y normalización de la llingua.
Nun se-y escapa a naide que la decisión sobre'l futuru del idioma asturianu ye política, pero la clas politica asturiana nun ta pol llabor de centrar l’asturianu nes llendes de la racionalidá, ésta tien que comprometese d’alcuerdu col so deber a facer una política de normalización llinguistica qu’abra espacios d’usu al asturianu y que lo faiga dalgo normal na vida de los asturianos, tien que comprometese a poner "la oficialidá del asturianu" nel centru del debate políticu. Yá que ye políticamente irresponsable allargar la desproteición de los drechos llinguisticos de les persones, o lo que ye peor dexar morrer el nuesu patrimoniu llinguisticu.
El fechu de que l'asturianu nun sía llingua oficial nun pue ser un obstáculu nin tampoco una cuartada pa que nun se dean pasos na normalización llingüística, pa estes coses namás fai falta voluntá política. Tienen que dir dándose pasos pa contribuyir nel incrementu de la reconocencia de los drechos llinguísticos y l’usu del asturianu a tolos niveles, como la educación, los medios de comunicación o l’Alministración y que nun seya ensin más un adornu anecdóticu o folclóricu. La so presencia en tolos ámbitos de la sociedá tamién depende de nós, tenemos que nos convertir en factores activos de la pervivencia del asturianu.
Llevar a cabu la normalización llinguística ye bien fácil yá que bastaría simplemente con la Llei d’usu y promoción del bable/asturianu y un gobiernu que quixera ponera en práutica. Dicha Llei promovida ya impulsada por Partíu Asturianista y aprobada pola Xunta Xeneral del Principáu d’Asturies nel añu 1998, foi y sigue siendo l'únicu instrumentu llegal col que los asturianos podemos desixir los nuesos drechos llinguísticos, ye esta una llei capaz de garantizar los mecanismos válidos p’asegurar la sobrevivencia de la llingua, una ferramienta positiva na direición de defender el nuesu patrimoniu llingüísticu y los drechos de los falantes.
La oficialidá de la llingua y la reconocencia de la nacionalidá p’Asturies tien que ser recoyida na reforma del Estatutu d’Autonomía, namái cola oficialidá la llingua asturiana sedrá una más de les llingües nacionales d’España.
Agora ye’l momentu de movilizase en defensa de los nuesos drechos llinguisticos "pola normalizacion y dignificación del asturianu". Que nun se diga que los falantes d’asturianu nun tiramos p’alantre "Saca la llingua y fala n’asturianu" ensin cortate pa reivindicar los tos drechos como falante d’asturianu.

Fonte: Infoasturies