L'ALLA completa l'estudiu sociollingüísticu del dominiu llingüísticu

DAMIÁN BARREIRO
L’Academia de la Llingua Asturiana acaba d’editar l’Estudiu Sociollingüísticu de Zamora (Fastera Occidental), obra de Xosé Antón González Riaño y Xosé Lluis García Arias. Con estos datos de les zones zamoranes de Senabria, La Carbayeda, Aliste y Sayago, la institución completa l’estudiu sociollingüísticu de tol dominiu asturllionés.

Según los datos recoyíos nel trabayu sobre l’occidente zamoranu, un terciu de los ciudadanos afirmen entender y falar la llingua tradicional –alredor de 9.400 persones–. Per otru llau, un 9,3% de los encuestaos diz usar la fala tradicional nel ámbitu familiar –sobremanera en Senabria–, mentes qu’un 21% diz que fala un amestáu ente asturllionés y castellanu. Según los datos, menos del 40% piensa que la fala tradicional úsase davezu na zona y camín del 60% de los encuestaos dicen que namás se fala castellanu o que la fala tradicional úsase «más bien poco», «cifra qu’habría que coyer cola mayor cautela pol nivel de confusión que se da ente la fala tradicional y el castellanu», despliquen los autores.

Precisamente, los zamoranos occidentales llamen mayoritariamente a la so manera de falar castellanu –un 42,3%–, mentes qu’hai un porcentaxe que fala de gallegu, gallego-castellanu o gallego-portugués –30%– o de denominaciones locales como alistanu –6,5%– y sayagués –6%–. Les rempuestes que falen de llionés o asturianu-llionés malpenes pasen del 2%. Otra manera, ye mayoritaria la opción que diz que les diferencies ente la fala tradicional y el castellanu nun existen –62%–, mentes que los más de los encuestaos tamién refuguen l’estatus de llingua pal asturllionés de la zona –cuasi’l 50%–, anque son ocho de cada diez los que piensen qu’usar l’idioma popular nun ye falar mal, «sinón distinto del castellanu». La percepción de xunidá llingüística col asturianu ye minoritaria anque significativa. Asina, ún de cada diez encuestaos tien sentimientu de xunidá llingüística.

Fonte: Les Noticies