L'asturianu y el mirandés xunten esfuercios

Ana María Cano robla conveniu en Miranda de l Douro 

  Ana María Cano, presidenta de l'ALLA, tuvo'l sábadu en Miranda de l Douro pa roblar un conveniu de collaboración con entidaes llocales.

  La Cámara Municipal de Miranda, presidida por Artur Nunes, y l’Associaçon de la Lhéngua i Cultura Mirandesa, por Carlos Ferreira, son les organizaciones que firmaron cola Academia de la Llingua Asturiana (ALLA) un alcuerdu "pal desendolcu de xeres conxuntes qu’afiten l’estudiu y espardimientu de la llingua nel dominio ástur", apunten dende la institución académica asturiana, que tamién tuvo representada pol vicepresidente Xosé Antón González Riaño y por Pablo Xuan Manzano. D'esta forma, diose formalidá a los alcuerdos algamaos nuna xunta celebrada n'Uviéu'l 29 d'abril.

  Medios llocales fixéronse ecu d'esti conveniu importante pa les dos varientes del mesmu tueru llingüísticu, siendo la portuguesa oficial en Miranda de l Douro dende l'añu 1999. Nunes apuntó qu'esta robla "anicia un ciclu de rellaciones culturales y económiques" ente Asturies y Miranda.                                                                                      Fonte: asturies.com