El IX Ruempi la Mollera, pal CP Campoamor

L'actu d'entrega de premios

  El Colexu Públicu Ramón de Campoamor llevó’l IX Concursu Ruempi la Mollera, que vivió esti miércoles l’actu d’entrega de premios. Nél participaron cerca de cien escolinos y escolines de Llingua Asturiana de quintu y sestu de Primaria pertenecientes a cuatro centros de Xixón.

  L’eventu, que se celebró esta mañana nel salón d’actos del Centru de Cultura Antiguu Institutu cola presencia de tolos alumnos participantes, tuvo presidíu por Xosé Nel Riesgo, direutor de la Fundación Municipal de Cultura, Educación y Universidá Popular, y animáu por actores de Producciones Nun Tris qu’arrancaron les risotiaes de los presentes. Asina, tres repasar caún de les trés entrugues plantegaes nel concursu d’esti añu, entamaron xuegos pa los neños y neñes, que collaboraron en too momentu.

  Estes trés cuestiones dividiéronse a lo llargo del cursu, teniendo los escolinos, cola ayuda de los sos maestros de Llingua Asturiana, que facer trabayos rellativos a la respuesta fechos en comuña nel formatu que más-yos prestara, como materiales pa la rede, comics, semeyes o maquetes. La primera, presentada n’ochobre, yera la siguiente: “Ye la primer muyer d’España que completa tolos ‘ochomiles’, ye asturiana de Cangas de Narcea, una lluchadora de la vida y el deporte. ¿Sabéis quién ye”. La respuesta yera la montañera Rosa Fernández.

  En xineru, los alumnos recibieron una segunda entruga, siendo la siguiente: ‘Vas topalos semaos polos pueblos d’Asturies formando parte del paisaxe, magar que cada vegada menos. Nel conceyu de Xixón tenemos varios y pues conocelos en detalle nun Muséu mui de nueso. Hasta Nuberu fala d’ellos nun cantar nomáu ‘Tengo de Rondar to Valle. ¿Sabéis de qué falamos?’. La respuesta, l’horru. Pa finar, n’abril llegó la cabera, que rezaba asina: ‘Asocedió va más de 200 años. Trátase d’unos acontecimientos que foron maxistralmente retrataos por Goya. Sicasí n’Asturies pocos lo conocen, anque foron bien importantes y xunieron al pueblu con un oxetivu común. ¿Sabéis que foi lo qu’asocedió’. Nesti casu, la respuesta correuta yera’l llevantamientu del 25 de mayu del 1808.

Una pizarra dixital de premiu       Finalmente, el colexu que llevó mayor puntuación polos sos trabayos foi’l Campoamor, que recibió como premiu una pizarra dixital. Mentes, el restu de participantes, l’Honesto Batalón, Los Pericones y el Clarín, tuvo como recompensa un llote de llibros n’asturianu y dellos materiales. “Ye importante participar, falar asturianu y saber coses de cultura asturiana”, comentó Antón Caamaño a los escolinos, a los qu’animó a “emplegar normalmente l’asturianu, que ye lo que ye, normal”.                                                                                                                         Fonte: asturies.com