Galán continúa na presidencia d’Iniciativa pol Asturianu tres renovar la confianza de los socios

Na semeya, Inaciu Galán acompañáu pol secretariu Rubén Martín-Llames

   Iniciativa pol Asturianu celebró’l sábadu en Xixón el segundu Congresu, nel que repasó l’actividá desendolcada nos 3 años de vida de la organización y nel que los socios escoyeron xunta direutiva. Inaciu Galán va repetir como presidente y amplia’l númberu de vocalíes p’aumentar l’actividá reivindicativa.

   Dalgunos de los direutivos actuales repiten nos sos cargos, al igual que’l secretariu Rubén Martín-Llames o l’ayalgueru Teno Prau. Asina, Xosé B. Álvarez continúa al frente de la vocalía de Rellaciones Internacionales; Álex Ordiales, de la d’Imaxe; y Sabel Tuñón, de la de voluntariáu, abriéndose tamién otres víes de trabayu como Medios de Comunicación (Iván Llera), Deportes (David Valdés) y Samuel Gradín (Proyeutos Audiovisuales).

   La estaya d’enseñu, de gran importancia pal futuru del idioma, divídese en trés: Primaria (Alba Llaneza), Secundaria y Bachilleratu (Fonsu Martín Sánchez) y Universidá (Claudia Elena Menéndez Fernández y Darío de Dios). Mentes, ente les incorporaciones a la xunta d’Iniciativa pol Asturianu apaecen los nomes de Javier Cubero (Aición Social), Marisa Bordallo (Activisimu en Redes Sociales), Xuan Fernández Bas (Formación), Pablo Arce (Asturies Esterior), Mario César González (Toponimia), Xesús Nel García Muñiz (Actividaes Musicales) y Laura Iglesia San Martín (Artes escéniques). Otra manera, el vocal pa Uviéu ye Xurde Menéndez Caravia.

   Nel Congresu celebráu en La Revoltosa tamién se presentó la ‘Memoria de Trabayu 2014’ con tola información sobre l’actividá entamada pola organización. D’igual forma, punxéronse les bases al trabayu de los meses vinientes cola aprobación d’una fueya de ruta presentada pola direutiva nueva, que sigue liderada por Galán y que pasa de diez a venti miembros.                      Fonte: asturies.com