TPA va emitir per primer vez un llargumetraxe n’asturianu el día 27Avientu

El 27 d’avientu, n’horariu d’audiencia máxima, TPA va emitir per primer vez un llargumetraxe n’asturianu. Trátase de ‘El rostru impenetrable (One-eyed Jacks)’, película doblada por Gonzali Producciones que dirixó y protagonizó Marlon Brando.

L’ente públicu de comunicación, que güei cumple ocho años d’emisión, llevará a les pantalles de los asturianos un productu de ficción n’asturianu per primer ocasión. Esti fechu históricu ye consecuencia de la collaboración ente la productora y la RTPA, siendo la película ‘El rostru impenetrable’, única dirixida por Brando, la escoyida pa tener esi honor. Iyán Gonzali encargóse de dirixir y producir un doblaxe nel que participaron más de venti actores y actrices, ente ellos Carlos Novoa (Marlon Brando), José Antonio Lobato (Karl Malden), Ana Blanco Rozada, Ana Díaz Morán, Andrés Presumido, Carlos Alba, Alberto Rodríguez, Silvino Torre, Lluis Antón González, Olga Cuervo, Eladio Sánchez, Verónica Gutiérrez, Marisa López Diz, Ángel Héctor Sánchez, Norberto Sánchez, Carlos González, Begoña Faro, Mario Artidiello, Samuel Gradín, Hugo García, Carlos Rodríguez, Jéssica de la Paz, Xulián García y Fernando de Luxán.

Esti western, que tuvo una nominación a los Oscar del 1961 na categoría de Meyor Fotografía (collor) y llevó la Concha d'Oro a la Meyor Película nel Festival de San Sebastián d’esi mesmu añu, tuvo un repartu formáu por Marlon Brando, Karl Malden, Pina Pellicer, Katy Jurado, Ben Johnson, Slim Pickens,Larry Duran, Sam Gilman, Timothy Carey, Miriam Colon, Elisha Cook Jr., Rodolfo Acosta y Hank Worden. La cinta cuenta la historia de Rio, que ye traicionáu por Dave, el so meyor amigu y compañeru de correríes, tres un atracu a un bancu fronterizu. Por esti motivu ye apresáu pola policía mexicana y treslladáu a una cárcel de Sonora, d’onde escapa a los cincos años con sede de venganza. Al poco atopa a Dave, qu’agora ye un home respetable y sherrif de Monterrey.

‘ Rostru impenetrable’, de 145 minutos de llargor, va emitise’l vienres próximu, día 27, a les 22.30 hores pel primer canal de TPA (A7). El doblaxe de la película contó col asesoramientu llingüísticu de l’Academia de la Llingua Asturiana. Fonte: Asturies.com