Entrega de los Premios Lliterarios 2013

L’amor hacia la tierra y la llingua marcó los discursos de los gallardonaos nos Premios Lliterarios

 La presencia de Vicente Gotor, rector de la Universidá d’Uviéu, foi la nota más destacada de la entrega de los Premios Lliterarios 2013. Los gallardonaos amosaron nos discursos el so amor hacia la tierra y la llingua asturiana.

   A ello ayudó enforma’l fechu de que trés de los cinco premiaos tean fuera d’Asturies por motivos llaborales, como ye’l casu de Alfonso Zapico, ganador del V Premiu Alfonso Iglesias de cómic con con ‘Cuadernos d’Ítaca’; de Ricardo Candás, merecedor del XIX Premiu Xuan María Acebal de poesía; y de Beatriz R. Viado, autora de ‘Yá cuasi nunca lo facemos por amor. Conciencies mercenaries’, trabayu que llevo’l XIX Premiu Máximo Fuertes Acevedo d’ensayu. Los dos primeros viéronse obligaos en delegar n’otres persones pa recoyer el gallardón, mentes que la periodista fixo l’esfuerciu de desplazase dende Londres pa tar presente nel actu. Completaron la nómina de premiaos Marisa López Diz, VI Premiu María Xosefa Canellada de lliteratura infantil y xuvenil con ‘Tatuaxes nel corazón’; y Pablo Rodríguez Medina, XXXIV Premiu Xosefa Xovellanos de novela con ‘Fame d’amor, determín de pasión’.

   La celebración del eventu nel paraninfu de la Universidá d’Uviéu llevó al rector a querer participar na gala entrega de los premios, que tuvo conducida pola maestra Isabel Jardón y musicada por Héctor Braga. Na so intervención, Gotor compartió colos presentes la so satisfaición por acoyer nes instalaciones universitaries la entrega de los Premios Lliterarios, unos gallardones qu’amuesen que la “llingua ta viva”, y destacó que “caltener un patrimoniu tán importante ye responsabilidá de toos”. Darréu tomó la pallabra Ana Fueyo, direutora xeneral de Política Llingüística, qu’apuntó los premiaos d’esti añu son un “reflexu de la sociedá”, xente mozo qu’amuesa’l so amor “pola tierra que-yos vio nacer” y pola so llingua, amás de persones que col so trabayu “contribúin a facer más grande si cabe la lliteratura asturiana”.

Ausencia de la conseyera per segundu añu.    Tres estes intervenciones, procedióse a entregar los premios más importante de la lliteratura asturiana, función que fixeron Gotor, Fueyo y Alejandro Calvo, viceconseyeru de Cultura y Deporte, énte l’ausencia de la conseyera d’Educación, Cultura y Deporte. Si na edición anterior Ana González escudóse nuna reunión preparatoria de la Conferencia Sectorial d'Educación  pa tratar asuntos de la LOMCE pa nun tar presente nel actu que tuvo llugar na Biblioteca Pública Xovellanos, en Xixón, pidiendo disculpes a los premiaos al traviés de Calvo, nesta ocasión dio prioridá a la inauguración del espaciu nuevu de la Galería Espacio Líquido y a la esposición ‘Las propiedades extrañas’ de Milena Bonilla y Fran Meana.    

   El primeru en xubir a recoyer el gallardón foi Henrique G.Facuriella en representación de Zapico. L’escritor lleó un discursu emotivu del dibuxante nel qu’esplicaba los recuerdos diarios sobre Asturies que tien dende la so casa na ciudá occitana d’Engoulaeme y nel qu’afirmaba que “l’exiliu pue escoyese, pero l’orixe d’ún, la tierrra y llingua, son irrenunciables”. López Diz, pela so parte, señaló la so intención de contribuyir a afitar l’asturianu nel pasu de la infancia a la adolescencia pa que l’idioma continúe na vida d’estos mozos y moces al tiempu que se decaten de que “la llingua val pal so mundu”.

   R. Viado amosó la so allegría por tar de vuelta “en casa”, destacó la importancia de celebrar esti eventu “na universidá d’Asturies” y agradeció a les instituciones qu’apueste por estos gallardones que festexen a la llingua asturiana. D’igual forma, demandó a estes mesmes instituciones un esfuerciu pa que l’asturianu “tenga los mesmos derechos que’l castellanu”. “Nun sé a qué esperen”, continúo, pa depués reclamar la oficialidá del idioma: “Si nun queremos ciudadanos de segunda, tampoco deberíemos tener faltantes de segunda”.

   María Isabel Huerta, madre de Candás, recoyó’l so premiu y lleó un discursu breve nel que l’autor apuntó que los Premios Lliterarios “dignifiquen la llingua asturiana y normalicen una lliteratura que pola falta d’oficialidá paez que va contracorriente”. Mentes, Rodríguez Medina, agradeció al xuráu del XXXIV Xosefa Xovellanos el so apueste por una “obra difícil de premiar”, un reconocimientu que-y fixo sentir otra vegada “como aquel neñu que diba a la universidá y que suañaba con escribir pa ganar el Xosefa Xovellanos”, recordando que nel 2001 tuviera que compartir esti mesmu gallardón –con Esther Prieto–. Darréu apuntó que “la llingua asturiana lleva tirando p’alantre 1.000 años” y naguó porque eses pallabres continúen na boca de los asturianos y asturianes nel futuru.

   L’actu finalizó cola llectura d’un discursu de Calvo nel qu’emponderó la trayeutoria de los premiaos nos gallardones lliterarios más importantes d’una llingua “que non siempre se siente reconocida y sofitada”.

Na semeya, momentu nel que Rodríguez Medina recibe'l so premiu. 
    Fonte:  Asturies.com