Asturies ta penriba de la media d'España, la XE y la Organización pa la Cooperación y el Desarrollu Económicos (OCDE) en tolos indicadores del informe PISA 2012, que na comunidá evaluó les competencies científica, llectora y matemática de 1.611 estudiantes de 15 años en 56 centros.
Asina lo dixo esti martes en rueda prensa la conseyera d'Educación, Cultura y Deporte, Ana González, que resaltó qu'Asturies destaca más en competencia científica, con 517 puntos, anque tanto en competencia llectora, con 504 puntos, como en matemática, con 500 puntos, alcuéntrase penriba de la media.
Igualmente, remarcó que la evolución ye positiva nel Principáu al respecto de los anteriores informe del 2009 y el 2006. D'esta manera, pese a asegurar que nun-y presten los 'ranking' n'educación, indicó qu'Asturies ta nel tercer puestu de les comunidaes autónomes en competencia científica, nel cuartu en competencia llectora y nel sestu en competencia matemática, sobre la que confía en siguir "aumentando'l ritmu de meyora".
Amás, comentó que, de los 65 países analizaos, les pruebes realizaes a los alumnos asturianos dexen a la comunidá nel puestu 11 en competencia científica, nel 13 en competencia matemática y nel 15 en competencia llectora.
La conseyera destacó qu'Asturies yá superó en competencia científica (con un 11,6%) los oxetivos de la estratexa '2020' de la Unión Europa pa baxar el porcentaxe d'alumnáu nel nivel más baxu (1 o inferior a 1), marcáu nun 15%, y, con un 15,5% frente al 15% fixáu pa la XE, ta "rozándolo" en competencia llectora.
Coles mesmes, dixo que se sigue "avanzando" p'algamar los oxetivos p'Asturies, que son más esixentes que los d'España y la XE en base al puntu de partida de los territorios. Asturies, que baxó los sos índices dende'l 2009, rexistra un 18,7% en nivel 1 o inferior a 1 en competencia matemática, con un oxetivu pal 2020 del 12%; un 15,5% en competencia llectora, con un oxetivu del 12% pal 2020; y un 11,6% en competencia científica, con un oxetivu del 10% pal 2020.
Tamién fizo referencia a los niveles d'escelencia (5 y 6), nos qu'Asturies aumentó una media de trés puntos dende'l 2009 nes trés árees evaluaes, con un 12,8% d'alumnos en competencia matemática, un 8,7% en competencia llectora y un 9,3% en competencia científica.
Fonte: Europa Press
Tou nun van ser males noticies, esta ye bona.
ResponderEliminarAún asina tamos perlexos de lo que ye la cultura.
ResponderEliminarHai que mirase en Finlandia y dexase de engarradielles polítiques ente partidos pol "quítate tú pa poneme yo", hai que pensar na xente y los neños asina como la xuventú y sofitar dafechu la antigua FP colos medios de agora mesmu, con una continuidá con un solo plan d'estudiu perdurable y meyorándolo poco a poco con bona voluntá científica y non con voluntá política de machucar y desfaer todo lo anterior por tar fechu por un partido político rival. Sobren, como siempres, los políticos ignorantes y falten los científicos y estudiosos de la educación a quien nun se-yos consulta enxamás pa nada. Pa eso ta la "faltosa élite política", ¡qué pena de país!
ResponderEliminarSiguimos dando pena n'idiomes, nin los poíticos saber (bonu, como esculpa ye la mayoría d'ellos son analfabetos)
ResponderEliminar