El proyeutu presupuestariu contempla una baxada pa Política Llingüística de cerca'l 5%

IVÁN LLERA Xuben les partíes pa servicios de normalización y Academia de la llingua y baxen les sovenciones a medios de comunicación, música y llibros n'asturianu. Sanidá consume'l 39% del presupuestu El proyeutu de presupuestos pa 2014 presentáu pol Gobiernu d'Asturies y pendiente d'alderique na Xunta Xeneral contempla una baxada del 4,9% pa los fondos de Política Llingüística. D'aprobase, la direición xeneral d'Ana Fueyo vería amenorgada la so partida en 106.735 euros , pasando de 1.706.735 euros d'anguaño a los 1.623.624 previstos pal 2014. La propuesta de cuentes de la FSA-PSOE pal próximu añu ameyora la partida pa l'Academia de la Llingua Asturiana en casi 3.000 euros, hasta los 170.000 euros, y caltién el presupuestu de los premios lliterarios nos 15.000 euros. Amás, amonta les sovenciones a los conceyos pal caltenimientu de los servicios de normalización llingüística, que pasa de los 157.000 a los 176.400 euros pola incorporación de los nuevos servicios de Castrillón y Llanes. Les ayudes a la normalización repártense ente: Mancomunidá de la Sidra (15.840), Mancomunidá del Cabu Peñes (14.400), Avilés (12.960), Siero (14.400), Mieres (9.360), Llangréu (14.400), Llena (14.400), Cangas del Narcea (14.400), Samartín del Rei Aurelio (9.360), Corvera (12.960), Llaviana (9.360), Mancomunidá Oscos-Eo (15.840), Castrillón (9.360) y Llanes (9.360). Les que sí que caen son les ayudes a la normalización del asturianu nos medios de comunicación, que pasen de 168.000 euros anguaño a 127.000; la música n'asturianu pierde 16.000 euros y pasa de los 40.000 de 2013 a 24.000 pal próximu añu; mientres que les publicaciones n'asturianu caen hasta los 90.000 euros (-10.000). "Falta de compromisu" Pa la Xunta pola Defensa de la Llingua Asturiana el proyeutu de cuentes "nun vien más que a sumase a más brutales recortes que vien sufriendo la supuesta 'política llingüística' gubernamental nos últimos años" y añeden que los recorte fain ver que "les verdaderes intenciones de la clase dirixente asturiana son facer desaparecer la llingua de la nuestra memoria y el nuesu futuru". Pa Inaciu Galán, presidente d'Iniciativa pol Asturianu, estes cifres amuesen la "falta de compromisu cola normalización del asturianu" y rescampla que "lo más grave nun ye la baxada de la cantidá, sinón que les partíes nun tán diseñaes pensando en normalizar l'asturianu". Galan propón un nuevu modelu nes que les sovenciones a los medios de comunicación dexen de llimitase a páxines concretes "en llugar de sovencionar un usu por porcentaxes, qu'equilibre l'usu del asturianu ente les distintes seiciones del periódicu o la programación d'un mediu audiovisual". Fonte: Queyeho.com