Reclamen más sofitu y ayuda institucional a Belenos

Riesgo reclama “más sofitu y ayuda institucional” a Belenos pa la espublización de la revista ‘Asturies’

   “Les instituciones tán obligaes a mantener la cultura asturiana y les investigaciones sobre Asturies”, afirmó Xosé Nel Riesgo na presentación del númberu 33 de la revista ‘Asturies’. Demandó “más sofitu y ayuda institucional” pa Belenos.

   L’actu, que tuvo llugar na tarde del vienres nel salón d’Actos del Xardín Botánicu Atlánticu de Xixón, contó cola presencia del direutor de la Fundación Municipal de Cultura, Educación y Universidá, y la d’Ástur Paredes, coordinador editorial de la revista, y l’etnógrafu Alberto Álvarez Peña. Amás, tamién tomaron la pallabra’l caderalgu Xulio Concepción y el naturalista Ignacio Abella, que falaron sobre los artículos que firmen nel númberu 33 de ‘Asturies, memoria encesa d’un país’.  L’encargáu d’abrir la presentación foi’l propiu direutor de la instalación, Jesús Martínez Salvador, que destacó la utilización per primer vegada del logu del Botánicu “en bable” nesti exemplar de la revista, anunciando tamién el so deseú de collaborar davezu con ella.

    Darréu tomó la pallabra Riesgo, qu’emponderó’l llabor de Martínez Salvador al frente del Botánicu, “l’equipamientu más visitáu d’Asturies gracies a l’apertura al públicu al baxar el costu de les entraes”. Nesi sen, fixo referencia a l’amplia programación tanto pa neños como pa mayores “con presencia de la cultura tradicional asturiana”. Tamién recordó la so vinculación cola revista de la Fundación Beleneos dende los sos anicios, una espublización “que pue presumir de contar cola collaboración d’un premiu Nobel, dos Príncipe d’Asturies, caderalgos de delles universidaes y profesores”, una espublización con más prestixu “fuera que dientro de les nueses fronteras”. “Nun hai nenguna revista colos conteníos de ‘Asturies’ –que toca toles estayes– y con estos parámetros de calidá en conteníos y edición”, continuó Riesgo, qu’esplicó como les persones de fuera del país qu’espublizaron nella amosaron la so “ilusión por ver los sos artículos en llingua asturiana”.

   Riesgo dexó güecu tamién pa la crítica y dixo nun entender que la Fundación Belenos recibiera del Gobiernu una ayuda de “600 euros” pa la espublización de ‘Asturies, memoria encesa d’un país’ y pa la organización del Seminariu d’Estudios Asturianos que tien llugar tolos años en La Puela. Asina, faló d’un “milagru editorial n’Asturies” que sobrevive gracies a “una sociedá asturiana que, pese a lo que se pueda pensar, sigue tando viva”. Por último, demandó una mayor renocencia pública pa la Fundación Belenos y “más sofitu y ayuda institucional”, recordando que “les instituciones tán obligaes a mantener la cultura asturiana y les investigaciones sobre Asturies”.

Del felechu a los horros beyuscos      Tres estes intervenciones de calter más institucional, Paredes y Álvarez Peña principiaron a comentar a los presentes los conteníos d’esti númberu de ‘Asturies, memoria encesa d’un país’. Asina, el coordinador editorial de la revista que tien como oxetivu “l’estudiu, caltenimientu y difusión de la cultura asturiana”, comenzó con una esplicación al traviés de semeyes de la investigación ‘Horros beyuscos: nel cantu’l desaniciu’, que firma xunto con Gausón Fernande, construcciones de cubierta a dos agües, planta cuadrada o rectangular y la posibilidá d’incorporar un sobigañu con dos pegollos más, de les que namái queden 17 en pie.

   Álvarez Peña faló a continuación del descubrimientu de ‘Un nuevu asentamientu castreñu n’Asturies: El  Castillón d’Antrialgu, Piloña’, censáu por él mesmu y otros dos miembros de Belenos, Xuan Fernández-Piloñeta y Daniel Cueli, dando detalles d’un castru del que tovía queden munches coses por descubrir. Otros artículos que se comentaron foron el dedicáu a la caza del bardión asturianu, dientro de la seición ‘Memoria Gráfica d’Asturies’; ‘A vueltes col  paxellu asturianu: les monteres’, de Gausón Fernande, que da nuevos datos sobre otres monteres utilizaes n’Asturies más allá de la picona, como la de dos ales o la de pelleyu; ‘Delles representaciones de  sierpes nos retablos asturianos’, d’Álvarez Peña, que trata del treslláu de la cultura popular al arte sacru asturianu de la imaxe de les culiebres, representando les sierpes como garante de proteición en contra de la visión habitual na relixón católica d’estos animales; y ‘La muyer xabaz qu’echa les mamielles al costín: una lleenda asturiana y los sos pareyos universales’, de Jesús Suárez López, estudiu dende’l campu xeográficu y históricu que recueye les asemeyances d’esta historia asturiana con otres de fuera del país, como la de la fema de los trolls nórdicos o la del Yeti.

   El caderalgu Concepción tomó la pallabra pa esplicar a los presentes los datos del so artículu ‘Siempre de camín, ente la casa y la cabana’, momentu qu’aprovechó pa criticar que los políticos “tan dexando de llau’l campu”, afirmando que, de nun camudar les polítiques, “Asturies sedrá paraísu ‘matorral’”. Asina, punxo l’exemplu de la situación na que s’atopa El Valledor depués del incendiu xabaz que vivió na seronda del 2011 y demandó un “mayor aprovechamientu de los recursos naturales”. Darréu, faló de la función que facíen las cabanas y esplicó’l funcionamientu de las oḷḷeras coles que la xente que vivía nos puertos más alloñaos calteníen la mantega, ente otros detalles sobre la vida d’estos ganaderos.

   Pela so parte, Abella, que destacó’l “trabayu impagable” de Belenos porque “ye tradición, pero tamién el futuru”, faló del so artículu ‘El felechu’. “El felechu ye una muestra de los que pa nós ye ‘maleza’ y pa los nuesos güelos yera ‘bueneza’”, principió’l naturalista, qu’esplicó les munches utilidaes que-y sacaba la xente a esta planta “qu’agora invade los pastos”, siendo de siempre una fonte de riqueza pa la xente probe. Abella llamentó la perda progresiva del conocimientu popular y alertó “del peligru d’incendiu enorme y la perda de riqueza” que supón la ocupación por felechos de pastos y tierres de llabor nel tránsitu natural hacia viesca. “Más temprano que tarde necesitaremos esos territorios, que son la nuesa tierra”, finó.

   Pa zarra la sesión, Álvarez Peña nomó los conteníos restantes d’esti númberu de la revista, la seición ‘L’Estoxu’ firmada por Ignaciu Llope y los ‘Cartafueyos de Belenos’, y confirmó “que yá tamos trabayando nel númberu 34”. De momento, la xente interesao pue disfrutar de tolos conteníos interesantes del 33, a la venta por 15 euros en llibreríes y puntos de venta avezaos.   Na semeya:  Martínez Salvador,  Riesgo,  Bertu Álvarez Peña,  y  Paredes.

Fonte: Asturies .com