La sociedá civil fai alcordanza de la figura d'Andrés Solar nel XXIX aniversariu de la so muerte

Delles asociaciones representatives de las sociedá civil asturiano vienen asoleyando la consideranza d'una figura perimportante nel procesu de recuperación contemporáneu de la llingua asturiana: l'escritor Andrés Solar, muertu cásique hai 30 años. Nel XXIX cabudañu d'Andrés Solar Santurio, Andecha Astur fexo un cenciellu homenaxe al que fuere una de les figures referenciales del nacionalismu asturianu y dende Darréu desixen un mayor reconocimientu a l'Alministración Publica, principalmente al Principáu d'Asturies y l'Ayuntamientu de Xixón.    Andrés Solar Santuriu "Andresu", militante del nacionalismu d'izquierda asturianu y figura cimera nel surdimientu lliterariu asturianu, ye siempres insuficientemente recordáu, y cuandu lo ye, suel tapecese el so fondu compromisu col nacionalismu d'izquierda resaltando namás l'aspeutu lliterariu. Ello asina, nel actu d'homenaxe, rializáu nel cementeriu Deva, onde Andecha Astur caltién una placa na so alcordanza, reivindicóse al Andresu que foi miembru fundaor del Ensame Nacionalista Astur, formación na que militó fasta la so tráxica muerte, y onde compartió militancia con munchos de los agora miembros d'Andecha Astur.    Dende Darréu consideren a Andrés Solar como "una figura comprometía cola lliteratura, la nuesa cultura y llingua, el país y les clases populares. La mocedá que nun escaez ta en delda coles persones que aportaron el so granín de sable en pro d'otra Asturies y ye obligación de nueso envalorar la so aportación y tresmitir esti llegáu a les xeneraciones más moces. Anque Andresu Solar refugara dafechu del escesu de simboloxía dende Darréu creemos que ye pernecesariu dignificar siempre la nuesa memoria". Ye por ello que desixen "un mayor reconocimientu a l'Alministración Publica, principalmente al Principáu d'Asturies y l'Ayuntamientu de Xixón de la figura d'Andrés Solar.   Esti escaezu paez consciente dafechu, yá que nun ye la primer vegada que la nuesa alministración, gobernada por sucursalistes, da-y la espalda a la figura y memoria d'esti llabrador de la Deva de Xixón". Andrés Solar foi un de les figures cimeres del Surdimientu y ye ensín dulda una de les figures que más marcando al asturianismu y el soberanismu nel nuesu país. Nació n'El Fondón, na parroquia de Deva de Xixón un 25 d'agostu de 1955 dientru d'una familia de llabradores.    Fonte:  Asturnews.