L’Asociación Xuvenil Mezá entama per sestu añu un festival de música, arte y lliteratura en Bual

    L’Outono en Bual, denominación nueva que reciben les xornaes ‘Outono Cultural’, va celebrase esti vienres y sábadu. L’Asociación Xuvenil Mezá tien programaes delles actividaes nes que la música, l’arte y la lliteratura van ser protagonistes.

    Esti coleutivu mozu pretende con esta iniciativa nacida nel añu 2008 “motivar y dar un pouco de vida al occidente asturiano”, apostando por ufrir actividaes de baldre pese a nun recibir sofitu económicu nengún de Política Llingüística. “A cultura asequible pral público é a base da filosofía del Asociación Xuvenil Mezá, que xa ta conseguindo afianzarse y ferse un furaco dentro das entidades organizadoras d’eventos de relevancia cultural en Asturias”, apunten.

    L’actividá va principiar mañana, a les 19.30 hores, cola presentación de les xornaes na Casa Cultura de Bual, actu nel que ta prevista la presencia del alcalde, Antonio Barrietos, y dellos miembros de la organización. Darréu, a les 20 hores, el grupo de gaites Os Pampirolos de Grandas va tocar pelos chigres de la villa nuna folixa nomada ‘Pasa-pasabares 2013’. Va zarrar esti primer día del VI Outono en Bual, a partir de les 22.30 hores, un magosto nel Recinto Ferial de Bual de Riba que va tar amenizáu por Os Pampirolos.

    El sábadu va abrise col actu de presentación, previstu pal meudía, del llibru de Miguel Rodríguez Monteavaro ‘Todos os tristes de mayo’, que va tar conducíu por Esther Prieto, de Trabe. Yá de tarde, a les 17 hores, va celebrase la mesa redonda ‘Espacios colectivos en Asturias: La Madreña, La Casa Azul, Cambalache y La Semiente. Propostas y futuro’, cola presencia de Delfín Valdés, activista y músico de L’Entregu (La Semiente); d'Eva Martínez, colaboradora del Local Cambalache d’Uviéu; de Faustino Loi, de La Casa Azul de Navia; y de Jara Coscuruella, una de les responsables del CSOA La Madreña d’Uviéu. Tres la charra, a les 19.30 hores, Mapi Quintana y Elías García, dúu qu’amiesta jazz con tradición asturiana que ta trabayando nel so primer discu, va ufrir un conciertu íntimu.

Actuaciones a partir de les 00.30 hores     Pa zarrar el VI Outono en Bual, l’Asociación Xuvenil Mezá entama un 'cenador' con precios populares –con menú vexetarianu y pa neños y neñes–, a partir de les 22 hores, y un conciertu nel Recinto Ferial de Bual de Riba, coles actuaciones previstes de La Tarrancha –que repiten depués del ésitu del añu pasáu– y los madrilanos Skainhead na so primer visita al occidente del país. Esti grupu, formáu nel 2007, tien la mesma filosofía que la banda de mecigayu-ska, al apostar pola espublización de los sos dos trabayos baxo una llicencia llibre.              Fonte:  Asturies.com