Iris Díaz Trancho presenta ‘Pincelaes’, con ilustraciones de Miguel Pérez Iñesta
La llibrería-galería xixonesa Cornión va acoyer el vienres la presentación del llibru ‘Pincelaes’, d’Iris Díaz Trancho. Amás, coincidiendo con esti actu, va inaugurase una esposición coles ilustraciones de Miguel Pérez Iñesta pa esta obra.
‘Pincelaes’ (Ediciones Trabe) trátase d’un llibru que tien el so orixe nel espaciu de mesmu nome del programa de RPA ‘Paraísu Natural’ protagonizáu por Díaz Trancho ente los años 2008 y 2009. Nél, la escritora xixonesa fixo venti pincelaes pequeñes de dellos llugares del mundu, al traviés de referencies históriques y culturales, como Valparaíso, Bandiagara o Ta Prohm, que se recuperen agora de la mano d’Esther García, de Trabe, correxíos y ameyoraos, como un cuadernu de viaxes. Pa zarrar el redondel, el llibru suma acuareles de Miguel Pérez Iñesta, eses pincelaes de les que Díaz Trancho siempre quixo falar.
La presentación d’esta obra va tener llugar el vienres, a les 19 hores, na Llibrería-galería Cornión, asitiada na cai La Mercé númberu 45, actu que va presentar Pablo Texón. Nel mesmu, Díaz Trancho va facer una llectura d’ún de los testos acompañada pol clarinete de Pérez Iñesta, que, amás, va inaugurar una muestra de les ilustraciones del llibru que va poder visitase na galería del comerciu xixonés. Fonte: Asturies.com
Ye güey na tardi.
ResponderEliminar